Олӧм 25 - Коми Библия 2023

Ӧвраамсянь чужысьяс

¹ Ӧвраам выль пӧв гӧтрасис. Сылӧн Кетура нима гӧтырыс

² чужтіс сылы Зимранӧс, Иокшанӧс, Меданӧс, Мадианӧс, Ишбакӧс да Шуахӧс.

³ Иокшанлӧн чужисны Шевей [да Теман] да Дедан пиян. [Деданлӧн чужисны Рагуил да Навдеил.] Дедан рӧдысь петісны ашшурейяс, летушейяс да леуммейяс.

⁴ Мадианлӧн вӧліны Эфай, Эфер, Енок, Авид да Эльдаг пиян. Ставныс найӧ вӧліны Кетуралӧн пиянсянь чужысьяс.

⁵ Ӧвраам ставсӧ, мый сылӧн вӧлі, колис аслас Исаак пиыслы.

⁶ Олігас на сійӧ сеталіс козинъяс кесйӧг-гӧтыръясыслӧн пияныслы да ыстіс найӧс Исаак пи дорсьыс ылӧджык, асыввыв муясӧ.

⁷ Ӧвраам оліс сё сизимдас вит арӧсӧдз.

⁸ Сійӧ куліс пӧрысь кадӧ, олӧмнас пӧтӧмаӧн вуджис батьясыс дінӧ.

⁹ Исаак да Измаил пияныс дзебисны сійӧс Макпела кырта горсйӧ. Дзебаніныс вӧлі Мамре дорын, хеттей Цохар Ефронлӧн му вылын.

¹⁰ Тайӧ мусӧ [кырта горснас] Ӧвраам вӧлі ньӧбӧма хеттейяслысь. Сэтчӧ дзебӧма Ӧвраамӧс да сылысь Сарра гӧтырсӧ.

¹¹ Ӧвраам кулӧм бӧрын Ен бурсиис сылысь Исаак писӧ. Исаак оліс Бер-Лахай-Рои дорын.

¹² Измаилсянь чужысьяс йылысь. Измаил вӧлі Ӧвраамлӧн пи, кодӧс чужтіс Агар, Сарралӧн египетса кесйӧг аньыс.

¹³ Измаил пиянлӧн нимъясныс чужан во сертиныс: Измаиллӧн медводдза пиыс вӧлі Невайот, нӧшта сылӧн вӧліны Кедар, Адбел, Мивсам,

¹⁴ Мишмай, Думай, Массай,

¹⁵ Хадад, Темай, Етур, Нафиш да Кедмай пиян.

¹⁶ Тайӧ Измаиллӧн пияныс, дас кык чужанкотырлӧн ӧксыяс. На серти нимтісны тшӧтш налысь оланінъяссӧ.

¹⁷ Измаил оліс сё комын сизим арӧсӧдз. Сэсся куліс да вуджис батьясыс дінӧ.

¹⁸ Измаилсянь чужысьяслӧн оланіныс вӧлі Хавиласянь Шурӧдз. Шур вӧлі Египетсянь асыввылын Ассурлань. Найӧ олісны ӧта-мӧдныскӧд зыксьӧмӧн.

Исав да Яков

¹⁹ Исааклӧн рӧд йылысь. Ӧвраамлӧн чужис Исаак.

²⁰ Исааклы вӧлі нелямын арӧс, кор сійӧ босьтіс гӧтырӧ Бетуэллысь Ревекка нывсӧ, Лаванлысь чойсӧ. Найӧ вӧліны Месопотамияын олысь арамейяс.

²¹ Исаак кевмысис Господьлы гӧтырыс вӧсна, ӧд гӧтырыс эз вермы сьӧктынысӧ. Господь кыліс сійӧс, и Ревекка кынӧмасис.

²² Пияныс кынӧмас кутісны дзескӧдны ӧта-мӧдсӧ. Ревекка шуис: «Мый бара менӧ виччысьӧ-а?» Сійӧ муніс юасьны Господьлысь.

²³ Господь висьталіс: – Кык войтыр тэ пытшкын, кык чужанкотыр кынӧмсьыд петас. Ӧтиыс лоӧ вынаджык мӧдсьыс, ыджыдджыкыс кутас кесъявны ичӧтджыкыслы.

²⁴ Воис кад чужтыны. Ревеккалӧн чужис кык пи.

²⁵ Медводдза чужысьлӧн кучикыс вӧлі гӧрд да ставнас гӧна. Сылы пуктісны Исав ним.

²⁶ Мӧдыс петіс Исав вокыслы коклябӧрас кутчысьӧмӧн. Сылы пуктісны Яков ним. Исааклы вӧлі квайтымын арӧс, кор найӧ чужисны.

Исав вузалӧ медводдза чужысьлысь нимсӧ

²⁷ Пияныс быдмисны. Исав лои бур вӧралысьӧн. Сійӧ ветлӧдліс кыйсьыны, а рам сьӧлӧма Яковлы кажитчис гортас овны.

²⁸ Исаак радейтіс сёйны пӧтка яй, та вӧсна сылы мусаджык вӧлі Исав, а Ревеккалы мусаджык вӧлі Яков.

²⁹ Ӧтчыд Яков пуис сёян. Исав локтіс кыйсянінысь ёна мудзӧмаӧн.

³⁰ Исав шуис Яковлы: «Ме ёна мудзи. Вай меным сёйыштны этайӧ гӧрдов пуӧмторсӧ». Та вӧсна Исавӧс нимтісны Эдомӧн.

³¹ Но Яков шуис: «Вузав меным ассьыд медводдза чужысьлысь нимтӧ».

³² «Ме куланвыйын, – вочавидзис Исав. – Мый меным тайӧ медводдза чужысьлӧн нимсьыс?»

³³ Яков шуис: «Медводз кыв сет меным». Исав кыв сетіс, тадзи вузаліс Яковлы ассьыс медводдза чужысьлысь нимсӧ.

³⁴ Яков сетіс Исавлы нянь да чечевица шыд. Сійӧ сёйис-юис, чеччис да муніс, медводдза чужысьлӧн нимыс сылы вӧлі веськодь.