Олӧм 23 - Коми Библия 2023

Сарраӧс дзебӧм

¹ Сарра оліс сё кызь сизим арӧсӧдз.

² Сійӧ куліс Ханаан муын, [ковтысса] Киръят-Арбаын, тайӧ ӧнія Хеврон кар. Ӧвраам бӧрдіс-шогсис Сарра вӧсна.

³ Сэсся шой дінысь чеччӧм бӧрын муніс хеттейяс дорӧ.

⁴ «Ме локтысь морт, абу тіян войтырысь, – шыасис на дінӧ Ӧвраам. – Вузалӧй меным му, медым дзебны гӧтырлысь шойсӧ».

⁵ Хеттейяс шуисны Ӧвраамлы:

⁶ «Кывзы миянӧс, ыджыдӧй. Енмыс пуктӧма тэнӧ ӧксыӧ миян пӧвстӧ. Босьт миянлысь медбур дзебанінсӧ. Быдӧн лэдзас тэныд дзебны гӧтыртӧ аслас дзебанінӧ».

⁷ Ӧвраам чеччис да копыртчыліс сэтчӧс муын олысь хеттейяслы.

⁸ Сійӧ шуис: «Лэдзанныд кӧ меным дзебны гӧтырӧс, кывзӧй менӧ. Корӧй Цохарлӧн Ефрон пилысь,

⁹ мед вузалас меным аслас му помысь Макпела кырта горссӧ. Мыйта корас, сы мында и мынта сылы тіян дырйи. Сэки тайӧ кырта горсйыс лоӧ менам рӧдлы дзебанінӧн».

¹⁰ Ефрон пукаліс карса дзиръя дорын чукӧртчӧм хеттейяс пӧвстын. Став йӧзыс водзын сійӧ вочавидзис Ӧвраамлы:

¹¹ «Кывзы, ыджыдӧй, ме сета тэныд тайӧ мусӧ кырта горснас. Аслам войтыр дырйи шуа, мый козьнала сійӧс тэныд. Дзеб ассьыд гӧтыртӧ сэтчӧ».

¹² Ӧвраам копыртчыліс хеттейяслы

¹³ да шуис Ефронлы став йӧз дырйиыс: «Кывзы менӧ, босьт тайӧ эзысьсӧ. Ме мынтыся мусьыд, медым дзебны сэтчӧ гӧтырӧс».

¹⁴ Ефрон вочавидзис Ӧвраамлы:

¹⁵ «Ыджыдӧй, кывзы менӧ. Муыслӧн доныс нёльсё сикель эзысь – тэа-меалы мый тайӧ? Дзеб гӧтыртӧ».

¹⁶ Тайӧс кылӧм бӧрын Ӧвраам торйӧдіс нёльсё сикель сьӧкта эзысь – татшӧм дон вӧлі лӧсьӧдӧма вузасьысьяс костын.

¹⁷ Тадзи Макпелаысь Мамре дорысь Ефронлӧн муыс кырта горснас да пуяснас вуджис

¹⁸ Ӧвраамлы. Тайӧс аддзылісны хеттейяс, кодъяс вӧліны карса дзиръя дорын.

¹⁹ Ӧвраам дзебис ассьыс Сарра гӧтырсӧ кырта горсйӧ, мый вӧлі Макпела му вылын. Дзебаніныс вӧлі Ханаан муын Мамре дорын, ӧнія Хеврон дорын.

²⁰ Тадзи тайӧ муыс да кырта горсйыс хеттейяссянь вуджисны Ӧвраамлы, и сэтчӧ кутісны дзебны кулӧмаясӧс.