Олӧм 22 - Коми Библия 2023

Ӧвраамлӧн вись

¹ Тайӧ лоӧмторъясыс бӧрын Ӧвраамӧс тӧдмалӧм могысь Ен шыасис: «Ӧвраам!» Ӧвраам вочавидзис: «Ме тані».

² Ен шуис: «Босьт Исаактӧ, радейтана ӧтка питӧ, да мун Мориа муӧ. Сэні керӧс вылын, кутшӧмӧс инда тэныд, вай сійӧс Меным сотан вись пыдди».

³ Ӧвраам чеччис водз, босьтіс осёлсӧ, кык кесйӧгӧс да Исаак писӧ. Сэсся поткӧдліс пес, медым вайны сотан вись, да мӧдӧдчис сэтчӧ, кытчӧ тшӧктіс сылы Ен.

⁴ Коймӧд луннас Ӧвраам ылісянь на аддзис сійӧ местасӧ.

⁵ Кесйӧгъясыслы Ӧвраам шуис: «Кольччӧй татчӧ, видзӧдӧй осёл бӧрся, а ми пикӧд ветлам да копыртчылам Енлы, сэсся бӧр локтам».

⁶ Ӧвраам босьтіс пессӧ да пуктіс Исааклы пельпом вылас. Ачыс босьтіс бива, пурт да мӧдӧдчис Исааккӧд.

⁷ Исаак шыасис Ӧвраам дінӧ: «Батьӧй!» «Мый нӧ, пиӧй?» – юаліс Ӧвраам. Мӧдыс воча юаліс: «Миян эм бива, пес, а кытысь ми босьтам сотан вись пыдди баляӧс?»

⁸ Ӧвраам шуис: «Пиӧй, Енмыс аддзас Аслыс сотан вись пыдди балясӧ». Найӧ кыкнанныс мунісны водзӧ.

⁹ Воисны местаӧдз, кытчӧ тшӧктіс мунны Ен. Ӧвраам сувтӧдіс висьпуктанін, пукталіс сэтчӧ пессӧ. Сэсся кӧрталіс Исаак писӧ да пуктіс пес вылӧ вись пыдди.

¹⁰ Ӧвраам босьтіс пурт да лэптіс кисӧ, медым сатшкыны писӧ.

¹¹ Но Господьлӧн андел шыасис енэжсянь: «Ӧвраам, Ӧвраам!» «Ме тані», – вочавидзис Ӧвраам.

¹² Андел шуис: «Эн лэпты китӧ пиыд вылӧ, эн вӧрӧд сійӧс. Ӧні ме тӧда, мый тэ полан Енмысь. Тэ вӧлін дась весиг ассьыд ӧтка питӧ сетны Енлы».

¹³ Ӧвраам бергӧдчис да аддзис межӧс. Сійӧ вӧлі сюрнас сибдӧма увъясӧ. Ӧвраам матыстчис да босьтіс межсӧ, вайис сійӧс сотан вись пыдди. Эз пиыс, а тайӧ межыс лои сотан висьнас.

¹⁴ Тайӧ местасӧ Ӧвраам нимтіс Яхве-ире, мый лоӧ ”Господь аддзӧ”. Ӧнӧдз на шуӧны, мый Господьлӧн керӧс вылын ставыс тыдовтчас.

¹⁵ Господьлӧн андел мӧдысь шыасис Ӧвраам дінӧ енэжсянь:

¹⁶ «Тэ вӧлін дась сетны Меным ассьыд ӧтка питӧ. Та вӧсна Ме Ачым тэныд кыв сета, – висьталӧ Господь, –

¹⁷ мый озыра бурсиа тэнӧ да сета тэныд уна чужысьӧс. Найӧ лоасны сы мында, мыйта енэжас кодзулыс да саридз дорын лыаыс. Найӧ босьтасны вӧрӧглысь каръяссӧ.

¹⁸ Сыысь, мый тэ кывзысин Менсьым, тэсянь чужысьяс пыр вуджас бурсиӧмыс быд войтырлы».

¹⁹ Ӧвраам бӧр локтіс кесйӧгъяс дінас, и найӧ мӧдӧдчисны Бер-Шеваӧ, кӧні олісны.

Нахорлӧн пиян

²⁰ Тайӧ лоӧмторйыс бӧрын Ӧвраамлы юӧртісны, мый Милка, Нахор вокыслӧн гӧтырыс, чужтӧма пиянӧс:

²¹ Уцӧс, медводдза писӧ, Бузӧс, Кемуэлӧс, Арамлысь батьсӧ,

²² Кеседӧс, Хазоӧс, Пилдашӧс, Идлафӧс да Бетуэлӧс.

²³ Бетуэллӧн чужис Ревекка. Тайӧ кӧкъямыснан писӧ Ӧвраамлӧн Нахор воклы чужтіс Милка.

²⁴ Нахорлӧн Реума нима кесйӧг-гӧтырыс чужтіс Тевахӧс, Гахамӧс, Тахашӧс да Маакӧс.