Олӧм 21 - Коми Библия 2023

Сарра чужтӧ Исаакӧс

¹ Господь эз вунӧд Сарраӧс. Ассьыс кӧсйысьӧмсӧ Сійӧ збыльмӧдіс.

² Сарра кынӧмасис да индӧм кадӧ пӧрысьмӧм Ӧвраамлы чужтіс пиӧс.

³ Ӧвраам пуктіс пиыслы Исаак ним.

⁴ Кӧкъямысӧд луннас Ӧвраам вундыштіс Исааклысь чильган йывсьыс кучикторсӧ, кыдзи тшӧктыліс сылы Ен.

⁵ Ӧвраамлы вӧлі сё арӧс, кор сылӧн чужис Исаак.

⁶ Сарра шуис: «Нимкодьтор вӧчис меным Ен. Коді кылас ме йылысь, тшӧтш кутас нимкодясьны мекӧд».

⁷ Сэсся содтіс: «Коді эськӧ вермис шуны Ӧвраамлы, мый Сарра кутас нёньӧдны кага? Но пӧрысьӧ-нэмӧ ме чужті сылы пиӧс».

⁸ Кага быдмис, сійӧс дугӧдісны морӧсысь. Тайӧ лунӧ Ӧвраам лӧсьӧдіс ыджыд гаж.

Агарӧс да Измаилӧс вӧтлӧм

⁹ Сарра аддзис, мый египетса Агарлӧн пиыс, кодӧс сійӧ чужтіс Ӧвраамлы, сералӧ [сылӧн Исаак пиыс вылын].

¹⁰ Сарра шуис Ӧвраамлы: «Вӧтлы тайӧ кесйӧг аньсӧ пиыскӧд. Тэнад овмӧсыд мед оз вудж сылӧн пилы, а вуджас сӧмын менам Исаак пилы».

¹¹ Измаил пиыс вӧсна Ӧвраам шогӧ усис.

¹² Но Ен шуис сылы: «Зонка вӧснаыд да кесйӧг ань вӧснаыд эн шогсьы. Вӧч сідзи, кыдзи тшӧктас тэныд Сарра, ӧд Исааксянь чужысьясӧс шуасны тэнад ныв-пиӧн.

¹³ Кесйӧг писяньыд Ме тшӧтш сета чужны [уна лыда] войтырлы, ӧд сійӧ тэсянь чужысь».

¹⁴ Ӧвраам чеччис водз асывнас, босьтіс нянь да кучик дозйын ва, ӧшӧдіс нопсӧ Агарлы пельпом вылас да ыстіс сійӧс пиыскӧд. Агар муніс да вошис Бер-Шева овтӧминын.

¹⁵ Кор кучик дозсьыс бырис ваыс, сійӧ пу улӧ колис ассьыс писӧ.

¹⁶ Ачыс вешйис бокӧ, ньӧввуж лыян ылнаӧ, ӧд эз кӧсйы аддзыны пиыслысь кулӧмсӧ. Агар пуксис да пондіс ырзӧмӧн бӧрдны.

¹⁷ Енмыс кыліс зонкалысь ымзӧмсӧ. Енлӧн андел шыасис Агар дінӧ енэжсянь: «Агар, мый тэкӧд? Эн пов, Енмыс кыліс зонкалысь бӧрдӧмсӧ сэтысянь, кытчӧ тэ сійӧс колин.

¹⁸ Чеччы, босьт зонкатӧ киӧдыс да отсав сылы. Ме сета сысянь чужны уна лыда войтырлы».

¹⁹ Ен восьтіс Агарлысь синсӧ, и сійӧ аддзис ва юкмӧс. Матыстчис сэтчӧ, гумовтіс кучик дозйӧ ва да юкталіс зонкасӧ.

²⁰ Енмыс пыр вӧлі зонкакӧд. Сійӧ быдмис да оліс овтӧминын, лои ньӧввужйысь лыйсьысьӧн.

²¹ Кор Измаил оліс Паран овтӧминын, мамыс вайӧдіс сылы гӧтырсӧ Египет муысь.

Ӧвраам сёрнитчӧ Авимелеккӧд

²² Сійӧ кадас Авимелек [Ахузаткӧд, коді колльӧдіс Авимелеклысь гӧтырпусӧ кӧлысь дырйи,] да тышкайӧзӧн веськӧдлысь Пикол шуисны Ӧвраамлы: «Тэкӧд Ен, Сійӧ быдторйын отсалӧ тэныд.

²³ Ӧні Ен водзын меным кыв сет, мый он ӧтдорт менӧ, менсьым челядьӧс да месянь чужысьясӧс. Кыдзи ме бурногӧн олі тэкӧд, сідзи и тэ бурногӧн ов мекӧд тэнӧ сибӧдысь муын».

²⁴ «Кыв сета», – шуис Ӧвраам,

²⁵ а сэсся кутіс норасьны Авимелеклы, мый Авимелеклӧн кесйӧгъясыс мырддисны юкмӧссӧ.

²⁶ Авимелек шуис: «Ме ог тӧд, коді тайӧс вӧчис. Тэ меным эн висьтавлы, ме ӧнӧдз та йылысь эг кывлы».

²⁷ Ӧвраам козьналіс ыжъясӧс да мӧсъясӧс Авимелеклы, и найӧ кӧрталісны йитӧд.

²⁸ Сэсся Ӧвраам торйӧдіс чукӧрсьыс сизим ыжӧс.

²⁹ Авимелек юаліс: «Мыйла тэ торйӧдін тайӧ сизим ыжсӧ?»

³⁰ Ӧвраам шуис: «Босьт тайӧ сизим ыжсӧ. Тайӧ лоӧ пасӧн, мый юкмӧсыс менам, ӧд ме кодйи сійӧс».

³¹ Та вӧсна нимтіс местасӧ Бер-Шеваӧн, ӧд тані кыв сетісны ӧта-мӧдныслы.

³² Бер-Шеваын йитӧд кӧрталӧм бӧрын Авимелек [Ахузаткӧд, коді колльӧдіс Авимелеклысь гӧтырпусӧ кӧлысь дырйи,] да тышкайӧзӧн веськӧдлысь Пикол бӧр мунісны Филистим муӧ.

³³ Бер-Шеваын Ӧвраам пуктіс тамариск пу да шыасис Господь нимӧ, пыр олысь Ен дінӧ.

³⁴ Ӧвраам оліс Филистим муын уна во чӧж на.