Олӧм 20 - Коми Библия 2023

Ӧвраам да Авимелек

¹ Ӧвраам мӧдӧдчис лунвывлань, овмӧдчис Кадеш да Шур костӧ, а сэсся мыйтакӧ оліс Герар карын.

² Ӧвраам ассьыс Сарра гӧтырсӧ шуис чойӧн. [Ӧд сійӧ поліс шуны гӧтырнас, мед сэтчӧс карса олысьяс эз вины сы вӧсна Ӧвраамӧс.] Авимелек, Герар карса ӧксы, тшӧктіс аслас йӧзлы вайӧдны Сарраӧс ас ордас.

³ Войнас Ен петкӧдчис Авимелеклы да шыасис сы дінӧ вӧтас: «Тэ кулан ань вӧсна, кодӧс босьтін аслыд, ӧд сылӧн эм верӧс».

⁴ Но Авимелек эз на инмӧдчыв Сарра дінӧ, та вӧсна шуис: «Господьӧй, бырӧдан ӧмӧй мыжтӧм войтырӧс?

⁵ Ӧд тайӧ мортыс аньсӧ шуис чойӧн, а аньыс сійӧс – вокӧн. Менам сьӧлӧмӧй да киӧй сӧстӧм».

⁶ Ен шуис сылы вӧтас: «Ме тӧда, тэнад сьӧлӧмыд сӧстӧм. Та вӧсна Ме видзи тэнӧ мыж вӧчӧмысь, эг лэдз инмӧдчывны ань дінӧ.

⁷ Ӧні гӧтырсӧ бӧр сет верӧсыслы, ӧд сійӧ пророк. Сійӧ кевмысяс тэ вӧсна, и тэ ловйӧн колян. А он кӧ сет, тэ гортсаыдкӧд кулан».

⁸ Авимелек чеччис водз, корис кесйӧгъяссӧ да висьталіс налы ставсӧ. Найӧ ёна повзисны.

⁹ Авимелек корис Ӧвраамӧс да шуис: «Мый тэ вӧчин миянкӧд? Мыйӧн ме мыжа тэ водзын, мый татшӧм сьӧкыд мыжӧ тэ кыскин менӧ да менсьым войтырӧс? Тадзи ӧмӧй позьӧ вӧчны?»

¹⁰ Авимелек нӧшта юаліс: «Тадзисӧ вӧчигӧн тэ эськӧ мый кӧсйин?»

¹¹ Ӧвраам шуис: «Ме чайті, мый татчӧс йӧзыс оз повны Енсьыс да гӧтыр вӧсна вермасны вины менӧ.

¹² Збыльвылас кӧ, сійӧ менам чой и эм, батьӧйлӧн ныв, сӧмын мӧд мамсянь. Ӧні сійӧ менам гӧтыр.

¹³ Кор Ен тшӧктіс меным петны бать керкаысь да ветлыны муясӧд, ме кори гӧтырӧс вӧчны меным буртор – шуны менӧ аслас вокӧн быдлаын, кытчӧ ми воам».

¹⁴ Авимелек козьналіс Ӧвраамлы [сюрс сикель эзысь,] ыжъясӧс, мӧсъясӧс, кесйӧг айуловӧс да аньясӧс. Бӧр сетіс сылы Сарраӧс

¹⁵ да шуис: «Менам муӧй тэ водзын. Овмӧдчы, кытчӧ кӧсъян».

¹⁶ А Сарралы шуис: «Вокыдлы ме сеті сюрс сикель эзысь. Тайӧ козиныс став тэнад матыссалы висьталӧ, мый тэ абу мыжа».

¹⁷ Ӧвраам кевмысис Енлы, и Ен бурдӧдіс Авимелекӧс, сылысь гӧтырсӧ да кесйӧг аньяссӧ. Найӧ бара вермисны чужтыны.

¹⁸ Ӧд Ӧвраамлӧн Сарра гӧтыр вӧсна Господь вӧчліс сідз, мый Авимелек керкаын аньясыс эз вермыны кынӧмасьнысӧ.