Олӧм 19 - Коми Библия 2023

Анделъяс Лот ордынӧсь

¹ Рытнас тайӧ кык анделыс локтісны Содомӧ. Карса дзиръя дорын пукаліс Лот. Сійӧ аддзис локтысьясӧс да чеччис найӧс вочаавны. Муӧдзыс копыртчӧмӧн шыасис на дінӧ:

² «Пыдди пуктанаяс, ме тіян кесйӧг. Локтӧй ме ордӧ. Мыськанныд кокнытӧ, узянныд, а асывнас мунанныд водзӧ». Но найӧ шуисны: «Огӧ, ми ывлаын узям».

³ Лот ёна корис, и найӧ мунісны сыкӧд. Лот дасьтіс сёян, пӧжаліс шомтӧм нянь да вердіс найӧс.

⁴ Локтысьяслӧн узьны водтӧдз Содом карса айулов, том и пӧрысь, кытшалісны Лотлысь керкасӧ.

⁵ Найӧ горзісны Лотлы: «Кӧнӧсь найӧ, кодъяс локтісны тэ ордӧ войколӧн? Вайӧд найӧс миян дінӧ, ми кӧсъям узьны накӧд».

⁶ Лот петіс на дінӧ, ас бӧрсяыс тупкис ӧдзӧссӧ

⁷ да шыасис: «Вокъяс, энӧ вӧчӧй налы лёксӧ.

⁸ Менам эм кык ныв, найӧ абу на верӧс сайынӧсь. Петкӧда найӧс тіянлы. Мый кӧсъянныд, сійӧс и вӧчӧй накӧд. Но энӧ лысьтӧй вӧрӧдны менам керка вевт улӧ локтысьясӧс!»

⁹ Найӧ шуисны: «Вешйы! Тэ, локтӧм морт, кӧсъян ыджыдавны тані! Ӧні ми тэныд аслыд лёкджыка на вӧчам!» Найӧ уськӧдчисны Лот вылӧ да кӧсйисны жугӧдны ӧдзӧссӧ.

¹⁰ Но анделъяс кыскыштісны Лотӧс керкаас, а ӧдзӧссӧ йигналісны.

¹¹ Ывлаын сулалысь пӧрысь да том йӧзлысь найӧ пемдӧдісны синнысӧ. Некод эз аддзы керкаӧ пыранінсӧ, кӧть мудзтӧдзыс корсис.

Лот пышйӧ Содомысь

¹² Кык локтысьыс шуисны Лотлы: «Эм кӧ тэнад зять, ныв-пи да нӧшта кодкӧ тані карас, петкӧд найӧс татысь,

¹³ ӧд ми бырӧдам тайӧ карсӧ. Ыджыд горзӧм кыптӧ Господьӧдз татчӧс олысьяс вылӧ, сійӧн Господь ыстіс миянӧс бырӧдны карсӧ».

¹⁴ Лот петіс да шуис аслас зятьпуяслы: «Петӧй тайӧ карсьыс, ӧд Господь бырӧдас сійӧс». Но найӧ эз эскыны сылы.

¹⁵ Водз асывнас анделъяс кутісны тэрмӧдлыны Лотӧс: «Чеччы, босьт гӧтыртӧ, кыкнан нывтӧ да пет карсьыс, мед онӧ кулӧй мукӧдлӧн мыжъяс вӧсна».

¹⁶ Но Лот ньӧжмасис. Сэки анделъяс Господьлӧн буралӧмыс вӧсна босьтісны киӧдныс Лотӧс, гӧтырсӧ, кыкнан нывсӧ да петкӧдісны найӧс кар сайӧ.

¹⁷ «Пышйы керӧсӧ – видз ассьыд олӧмтӧ. Мунігад ковтысӧ эн сувт, бӧрвылад эн видзӧд, мед он кув», – шуис ӧти анделыс Лотлы.

¹⁸ Но Лот шуис: «Ыджыдӧй,

¹⁹ тэ зэв шань да бур сьӧлӧма ме дінӧ, аслад кесйӧгыд дінӧ. Тэ мездін менсьым олӧмӧс. Но ме пола, мый кулӧмыс суӧдас менӧ керӧсӧ вотӧдз на.

²⁰ Со, матынджык эм ичӧтик кар, кытчӧ ме верма котӧртны. Лэдз меным сэтчӧ пышйыны, сэки ме ловйӧн коля [тэ вӧсна]».

²¹ Андел шуис сылы: «Пышйы сэтчӧ, тэ вӧсна ме видза сійӧ карсӧ.

²² Ӧдйӧджык котӧрт сэтчӧ, ӧд ме нинӧм ог вермы вӧчны, кытчӧдз тэ он во сэтчӧ». Тайӧ карыслӧн нимыс Цоар, ӧд Лот тадзи шуис.

Содом да Гомора каръяс бырӧдӧм

²³ Шондіыс вӧлі вылын нин, кор Лот воис Цоарӧ.

²⁴ Сэки Господь кисьтіс енэжсянь Содом да Гомора вылӧ тэгъя-биа зэр,

²⁵ Сійӧ бырӧдіс кыкнан карсӧ да дзоньнас ковтыссӧ, став карса олысьсӧ да быдмӧг-пусӧ.

²⁶ Лотлӧн гӧтырыс видзӧдліс бӧрвылас да пӧри сов сюръяӧ.

²⁷ Ӧвраам чеччис водз асывнас да муніс сэтчӧ, кӧні сійӧ сулавліс Господь водзын.

²⁸ Видзӧдліс Содом да Гомора каръяслань, став ковтыс вылӧ да аддзис, мый ломтысьысь пачысь моз муысь кыптӧ тшын.

²⁹ Ковтысысь каръяссӧ бырӧдігӧн Ен эз вунӧд Ӧвраамӧс, и отсаліс Лотлы петны бырӧдан карысь, кӧні сійӧ оліс.

³⁰ Цоарысь Лот муніс кыкнан нылыскӧд керӧсӧ. Сійӧ поліс овны тайӧ карас, та вӧсна овмӧдчис нывъясыскӧд кырта горсйӧ.

Лотлӧн нывъяс чужтӧны пиян

³¹ Ыджыдджык чойыс шуис ичӧтджыкыслы: «Батьным миян пӧрысьмис. Тані абу мортыс, коді эськӧ босьтіс миянӧс гӧтырӧ, кыдзи вӧчӧны став му пасьтала.

³² Юктӧдам винаӧн батьнымӧс да узям сыкӧд, тадзи асланым батьсянь чужтам кага».

³³ Найӧ юкталісны винаӧн батьнысӧ, и сійӧ войнас ыджыдджык нылыс узис батьыскӧд. Батьыс эз и тӧдлы, кор нылыс водіс да кор чеччис.

³⁴ Мӧд луннас ыджыдджык чойыс шуис ичӧтджыкыслы: «Тӧрыт ме узи батькӧд. Тавой сійӧс бара юктӧдам винаӧн, и тэ узян сыкӧд, тадзи батьнымсянь чужтам кага».

³⁵ Найӧ бара юкталісны винаӧн батьнысӧ, и сійӧ войнас ичӧтджык нылыс узис батьыскӧд. Батьыс эз и тӧдлы, кор нылыс водіс да кор чеччис.

³⁶ Тадзи Лотлӧн кыкнан нылыс кынӧмасисны асланыс батьсянь.

³⁷ Ыджыдджыкыс чужтіс пиӧс да пуктіс Моав ним [шуис, менам батьсянь пӧ сійӧ]. Сысянь чужис моав войтыр.

³⁸ Ичӧтджыкыс сідзжӧ чужтіс пиӧс да пуктіс Бен-Амми ним [шуис, сійӧ пӧ менам рӧдлӧн пи]. Сысянь чужис ӧнія аммон войтыр.