Олӧм 16 - Коми Библия 2023

Агар да Измаил

¹ Ӧврамлӧн Сара гӧтырыс эз вермы сьӧктыны. Саралӧн вӧлі Агар нима египетса кесйӧг ань.

² Сара шуис Ӧврамлы: «Господь оз сет меным челядьӧс. Босьт менсьым кесйӧг аньӧс, гашкӧ, сійӧ чужтас меным пи». Ӧврам кывзысис гӧтырыслысь.

³ Сара сетіс Агарӧс аслас верӧслы гӧтыр пыдди. Тайӧ лои Ӧврамлӧн Ханаан муӧ овмӧдчӧмсянь дас во мысти.

⁴ Ӧврам узис Агаркӧд, и Агар кынӧмасис. Кынӧмасьӧм бӧрас сійӧ кутіс нинӧмӧ пуктыны Сараӧс, ассьыс ыджыдсӧ.

⁵ Сара шуис Ӧврамлы: «Тэ мыжа менӧ увтыртӧмысь. Ме сеті кесйӧг аньӧс тэныд, а сійӧ кынӧмасьӧм бӧрас кутіс нинӧмӧ пуктыны менӧ. Господь мед лоас ёрдысьӧн тэа-меа костын».

⁶ Ӧврам шуис Саралы: «Тэнад кесйӧгыд аслад киын, мый кӧсъян, сійӧс и вӧч». Сара кутіс дзескӧдны Агарӧс, и сійӧ пышйис.

⁷ Господьлӧн андел аддзис Агарӧс овтӧминса ва петанін дорысь, Шурӧ мунан туй вылысь,

⁸ да юаліс: «Агар, Саралӧн кесйӧг ань, кытысь тэ локтан да кытчӧ мунан?» Сійӧ вочавидзис: «Ме пышъя аслам Сара ыджыдысь».

⁹ Господьлӧн андел шуис сылы: «Бӧр бергӧдчы аслад ыджыд дінад да кывзысь сылысь.

¹⁰ Ме содтӧмӧн содта тэсянь чужысьясӧс, найӧ лоӧны сы мында, мый некод лыддьынысӧ оз вермы.

¹¹ Тэ ӧні кынӧма. Тэ чужтан пиӧс да пуктан сылы Измаил ним, ӧд тэнад шоглун дырйи Господь кыліс тэнӧ.

¹² Йӧз пӧвстын тэнад пиыд лоас вӧлявывса осёл кодь, сійӧ лэптас кисӧ быдӧн вылӧ, и сы вылӧ быдӧн кисӧ лэптас. Сійӧ овны кутас вокъясыскӧд зыксьӧмӧн».

¹³ Агар шуис сыкӧд сёрнитысь Господьлы: «Тэ – Эл-Рои, менӧ аддзысь Ен», ӧд мӧвпыштіс, аслам синмӧн пӧ збыльысь аддзылі Сійӧс, коді аддзӧ менӧ.

¹⁴ Та вӧсна ва петаніныс шусьӧ Бер-Лахай-Рои. Сійӧ сулалӧ Кадеш да Беред костын.

¹⁵ Агар чужтіс Ӧврамлы пи. Ӧврам пуктіс аслас пиыслы Измаил ним.

¹⁶ Ӧврамлы вӧлі кӧкъямысдас квайт арӧс, кор Агар чужтіс сылы Измаилӧс.