Олӧм 15 - Коми Библия 2023

Ен кӧрталӧ йитӧд Ӧврамкӧд

¹ Тайӧ лоӧмторъясыс бӧрын Ӧврамлы петкӧдчис Господь да шуис: «Эн пов, Ӧврам, Ме – тэнад сайӧдыд. Тэныд вичмас ыджыд тырдон».

² Ӧврам шуис: «Господьӧй Ыджыдӧй! Мый Тэ сетан меным? Менам ныв-пиӧй абу, овмӧсӧн веськӧдлӧ Дамаскысь Элизер».

³ Ӧврам нӧшта шуис: «Менам став овмӧсӧй вичмас сылы, ӧд Тэ эн сет меным пи».

⁴ Господь шуис сылы: «Оз кесйӧгыдлы, а тэсянь чужысьлы вичмас тэнад овмӧсыд».

⁵ Господь петкӧдіс Ӧврамӧс ывлаӧ да шуис: «Видзӧдлы енэжас да лыддьы кодзувъяссӧ, верман кӧ. Та мында жӧ лоас тэсянь чужысьыс».

⁶ Ӧврам эскис Господьлы, та вӧсна Господь шуис сійӧс веськыдӧн.

⁷ Господь шуис Ӧврамлы: «Ме Господь, коді петкӧдіс тэнӧ Калдея Урысь, медым сетны тайӧ мусӧ тэныд».

⁸ Ӧврам шуис: «Господьӧй Ыджыдӧй! Мый серти ме тӧдмала, мый тайӧ муыс менам лоӧ?»

⁹ Господь шуис сылы: «Вай Меным куим арӧса куканьӧс, куим арӧса кӧзаӧс, куим арӧса межӧс, гулюӧс да гулюпиӧс».

¹⁰ Ӧврам босьтіс найӧс ставнысӧ, керыштіс шӧрипӧв да пуктіс ӧта-мӧдныслы воча, а лэбачьяссӧ эз керышт.

¹¹ Шойяс вылӧ уськӧдчис кырныш-варыш чукӧр, но Ӧврам вӧтлаліс найӧс.

¹² Шонді лэччигӧн Ӧврам чорыда унмовсис. Ыджыд полӧм сійӧс топӧдіс, сап пемыд вевттис сійӧс.

¹³ Господь шуис Ӧврамлы: «Тӧд, тэсянь чужысьяс овмӧдчасны йӧз муӧ. Нёльсё во чӧж найӧ лоӧны сэні кесйӧг туйынӧсь да нартитӧм улынӧсь.

¹⁴ Но найӧс нартитысь войтырӧс Ме мыжда. Та бӧрти тэсянь чужысьясыд петасны сэтысь [да локтасны татчӧ] ыджыд озырлунӧн.

¹⁵ Тэ вуджан аслад батьяс дінӧ лӧнь сьӧлӧмӧн да шудаӧн. Ыджыд арлыдаӧн дзебасны тэнӧ.

¹⁶ Сӧмын нёльӧд чужанвужйын тэсянь чужысьяс бӧр локтасны татчӧ, ӧд аморейяслӧн мыж лыдыс эз на тыр».

¹⁷ Шонді пуксьӧм бӧрын лои сап пемыд. Шӧрипӧв керыштӧм пемӧсъяс костті пачысь моз пуркнитіс тшын да мунісны ыпъялысь би кывъяс.

¹⁸ Тайӧ лунӧ Господь кӧрталіс Ӧврамкӧд йитӧд. Господь шуис: «Египет юсянь ыджыд Ефрат юӧдз Ме сета тэсянь чужысьяслы тайӧ мусӧ,

¹⁹ кӧні олӧны кенейяс, кенезейяс, кедмонейяс,

²⁰ хеттейяс, перезейяс, рефаяс,

²¹ аморейяс, ханаансаяс, [хивейяс,] гергесейяс да евуссаяс».