Олӧм 14 - Коми Библия 2023

Ӧврам мездӧ Лотӧс

¹ Сійӧ кадас сеннарса Амрафел ӧксы, элласарса Ариок ӧксы, эламса Кедорлаомер ӧксы да гоимса Тидал ӧксы

² петісны тышӧ содомса Бер ӧксылы, гомораса Бирша ӧксылы, адмаса Шинав ӧксылы, севоимса Шемевер ӧксылы да беласа, мӧд ногӧн цоарса, ӧксылы паныд.

³ Тайӧ вит ӧксыыс чукӧртчисны асланыс тышкайӧзкӧд Сиддим ковтысӧ, ӧні сэні Сола саридз.

⁴ Дас кык во чӧж найӧ олісны Кедорлаомер кипод улын, а дас коймӧд вонас кыпӧдчисны сылы паныд.

⁵ Дас нёльӧд вонас Кедорлаомер ӧксы да сыкӧд ӧтувтчӧм ӧксыяс локтісны да пасьвартісны рефаясӧс Аштерот-Карнаимын, зузъясӧс Гамын, эмиясӧс Шаве-Киръятаимын,

⁶ хориясӧс Сеир керӧсвыв муын Эл-Паранӧдз, овтӧмин дорӧдз.

⁷ Сэтысь найӧ локтісны Эн-Мишпатӧ, ӧнія Кадешӧ, да пасьвартісны став амалик войтырӧс да Хацацон-Тамарын олысь аморей войтырӧс.

⁸ Сэки содомса, гомораса, адмаса, севоимса да беласа, мӧд ногӧн цоарса, ӧксыяс петісны тышӧ Сиддим ковтысын

⁹ эламса Кедорлаомер ӧксылы, гоимса Тидал ӧксылы, сеннарса Амрафел ӧксылы да элласарса Ариок ӧксылы паныд. Нёль ӧксы тышкасисны витлы паныд.

¹⁰ Сиддим ковтысын вӧлі уна сир гу. Содомса да гомораса ӧксыяс пышйиганыс усьласисны сир гуясӧ, а мукӧдыс пышйисны керӧсъясӧ.

¹¹ Вермысьяс босьтісны Содомысь да Гомораысь став овмӧс-эмбурсӧ да сёянсӧ, сэсся мунісны.

¹² Босьтісны тшӧтш став эмбурнас Ӧврам воклысь Лот писӧ, коді оліс Содомын.

¹³ Пышйӧмаяс пӧвстысь ӧти морт локтіс еврей Ӧврам дінӧ. Ӧврам сэки оліс Мамре нима аморейлӧн тупу раскын. Мамре вӧлі Эшколлӧн да Анерлӧн вокыс. Найӧ вӧлі кӧрталӧмаӧсь йитӧд Ӧврамкӧд.

¹⁴ Ӧврам мыйӧн тӧдмаліс Лотӧс пленӧ босьтӧм йылысь, чукӧртіс куимсё дас кӧкъямыс кесйӧгӧс, кодъяс чужлісны сы ордын, да Лотӧс босьтысьяс бӧрся вӧтчис Данӧдз.

¹⁵ Войнас сійӧ юкліс ассьыс тышкайӧзсӧ чукӧръяс вылӧ, уськӧдчис Лотӧс пленӧ босьтысьяс вылӧ да пасьвартіс найӧс. Ловйӧн кольысьясӧс вӧтӧдісны Дамаск войвывладорса Ховаӧдз.

¹⁶ Ӧврам мездіс вокыслысь Лот писӧ, аньясӧс да Лотлысь став йӧзсӧ, бӧр мырддис вӧрӧг киысь Лотлысь став эмбурсӧ.

Мелкиседек бурсиӧ Ӧврамӧс

¹⁷ Кедорлаомерӧс да сыкӧд вӧлысь куим ӧксыӧс пасьвартӧм бӧрын Ӧврам бӧр бергӧдчис. Содомса ӧксы локтіс Шаве ковтысӧ, ӧнія Ӧксы ковтысӧ, медым вочаавны Ӧврамӧс.

¹⁸ Салим карса Мелкиседек ӧксы, Медвылысса Енлы кесъялысь поп, петкӧдіс Ӧврамлы нянь да вина.

¹⁹ Ӧврамӧс бурсиӧмӧн Мелкиседек шуис: «Мед бурсиас тэнӧ Медвылысса Ен, коді вӧчис енэжсӧ да мусӧ.

²⁰ Ошкӧм Медвылысса Енлы, коді сетіс вӧрӧгтӧ тэнад киӧ». Ӧврам сетіс Мелкиседеклы тышын став шедӧдӧмсьыс дасӧд юкӧнсӧ.

²¹ Содомса ӧксы шуис Ӧврамлы: «Вай меным ассьым йӧзӧс, а эмбурсӧ аслыд босьт».

²² Но Ӧврам шуис содомса ӧксылы: «Лэпта киӧс Господьлань, енэжсӧ да мусӧ вӧчысь Медвылысса Енлань, да кыв сета,

²³ мый кӧмкот кӧв ни весиг сунис тэнсьыд ог босьт, медым тэ эн шу: ”Ме озырмӧді Ӧврамӧс”.

²⁴ Меным оз ков нинӧм, тырмана сійӧ, мыйӧн менам йӧз пӧткӧдчисны. Анер, Эшкол да Мамре, меным отсасьысьяс, мед босьтасны ассьыныс пайнысӧ».