Олӧм 13 - Коми Библия 2023

Ӧврам да Лот торйӧдчӧны

¹ Ӧврам босьтіс ставсӧ, мый сылӧн вӧлі, сэсся гӧтырыскӧд да Лоткӧд Египетысь мӧдӧдчис Негев муӧ.

² Ӧврам ёна озырмис, сылӧн вӧлі уна ыж-мӧс да эзысь-зарни.

³ Негевысь сійӧ муніс бӧр Вефильлань. Сэні, Вефиль да Гай костын, коркӧ сулавліс нин сылӧн чомйыс.

⁴ Ӧврам локтіс аслас водзынджык вӧчлӧм висьпуктанін дорӧ да шыасис Господь дінӧ.

⁵ Лот ветлӧдліс Ӧврамкӧд. Сылӧн тшӧтш вӧлі уна ыж-мӧс да аслас чомъяс.

⁶ Ыджыд овмӧс-эмбурныс вӧсна налы лои дзескыд ӧтвыв овнысӧ.

⁷ Ӧврамлӧн да Лотлӧн ыж-мӧс видзысьясыс кутісны зыксьыны ӧта-мӧдныскӧд. Сійӧ кадас тайӧ муас нӧшта олісны ханаансаяс да перезейяс.

⁸ Ӧврам шуис Лотлы: «Ми ӧд рӧдвуж тэкӧд. Мыйла миянлы да миян ыж-мӧс видзысьяслы зыксьынысӧ?

⁹ Вай торйӧдчам. Став муыс тэ водзын. Тэ кӧ мунан шуйгавылӧ, ме муна веськыдвылӧ, а мунан кӧ веськыдвылӧ, ме муна шуйгавылӧ».

¹⁰ Лот аддзис, мый Йӧрдан ковтыс Цоар карӧдз вӧлі Господьлӧн сад йӧр кодь да уна ваа Египет му кодь. Тайӧ вӧлі Господьӧн Содом да Гомора каръяс бырӧдтӧдз на.

¹¹ Лот бӧрйис Йӧрдан ковтыс да веськӧдчис асыввылӧ. Тадзи найӧ Ӧврамкӧд торъялісны ӧта-мӧдсьыныс.

¹² Ӧврам кольччис Ханаан муӧ, а Лот кутіс овны Йӧрдан ковтыс каръяс дорын. Чомъяснас ветлӧдлігӧн Лот воис Содом карӧдз.

¹³ Содомын олысьяс вӧліны зэв лёкӧсь, найӧ уна мыж вӧчисны Господьлы паныд.

¹⁴ Лотлӧн мунӧм бӧрын Господь шуис Ӧврамлы: «Видзӧдлы войвылӧ и лунвылӧ, асыввылӧ и рытыввылӧ.

¹⁵ Тайӧ мусӧ, мый тэ аддзан, Ме сета тэныд да тэсянь чужысьяслы пыр кежлӧ.

¹⁶ Тэсянь чужысьыс лыа чир мында лоас. Вермас кӧ кодкӧ артавны лыа чирсӧ, вермас артавны и тэсянь чужысьсӧ.

¹⁷ Чеччы, кытшовт тайӧ мусӧ кузьтанас и пасьтанас, ӧд сійӧс Ме сета тэныд [да тэсянь чужысьяслы пыр кежлӧ]».

¹⁸ Ӧврам чомъяснас вешйис Хевронӧ, Мамре тупу раскӧ. Сэтчӧ сувтӧдіс Господьлы висьпуктанін.