Олӧм 12 - Коми Библия 2023

Ен корӧ Ӧврамӧс

¹ Господь шуис Ӧврамлы: «Коль ассьыд мутӧ, рӧдвужтӧ да бать керкатӧ. Ме инда тэныд му – сэтчӧ мун.

² Ме сета тэсянь чужны унасьыс-уна войтырлы, бурсиа да нимӧда тэнӧ, и тэ лоан мукӧдлы бурсиӧмӧн!

³ Тэнӧ бурсиысьӧс Ме бурсиа, тэнӧ ёрысьӧс Ме ёра. Тэ пыр вуджас бурсиӧмыс быд войтырлы».

⁴ Ӧврам мӧдӧдчис туйӧ, кыдзи тшӧктіс сылы Господь. Сыкӧд тшӧтш муніс Лот. Ӧврамлы вӧлі сизимдас вит арӧс, кор сійӧ петіс Харанысь.

⁵ Ӧврам босьтіс Сара гӧтырсӧ, вокыслысь Лот писӧ, став эмбурсӧ, йӧзӧс, кодъяс кесъялісны налы Харанын, да мӧдӧдчис Ханаан муӧ. Ханаанӧ воӧм бӧрын

⁶ Ӧврам кытшовтіс тайӧ мусӧ да матыстчис Сикемлань. Сійӧ сувтіс Морэ нима тупу дорӧ. Сэки тайӧ муас оліс ханаан войтыр.

⁷ Сэні Ӧврамлы петкӧдчис Господь да шуис: «Тайӧ мусӧ Ме сета тэсянь чужысьяслы». Ӧврам сувтӧдіс висьпуктанін Господьлы, коді петкӧдчис сылы.

⁸ Сэтысянь Ӧврам мӧдӧдчис керӧслань, Вефильсянь асыввылӧ. Сэні сувтӧдіс ассьыс чомсӧ сідз, мый Вефиль вӧлі рытыввылын, а Гай – асыввылын. Сэсся вӧчис Господьлы висьпуктанін да шыасис Господь дінӧ.

⁹ Та бӧрын Ӧврам чеччис да мӧдӧдчис Негев муӧ.

¹⁰ Тайӧ муас йӧзыс кутісны ёна тшыгъявны, та вӧсна Ӧврам муніс овны Египетӧ.

¹¹ Египетӧ матыстчигӧн сійӧ шуис Сара гӧтырыслы: «Тэ мича ань.

¹² Кор египетсаяс аддзасны тэнӧ да тӧдмаласны, мый тэ менам гӧтыр, виасны менӧ, а тэнӧ ловйӧн колясны.

¹³ Висьтав, мый тэ менам чой. Таысь меным бур лоас, и тадзи тэ видзан менсьым олӧмӧс».

¹⁴ Ӧврам воис Египетӧ. Египетсаяс аддзисны, мый Сара зэв мича ань.

¹⁵ Фараонлӧн ыджыд чина йӧзыс тшӧтш аддзылісны Сараӧс да ошкисны сійӧс фараонлы. Сараӧс вайӧдісны фараон керкаӧ.

¹⁶ Сара вӧсна фараон вӧлі бур сьӧлӧма Ӧврам дінӧ. Сійӧ сетіс Ӧврамлы ыжъясӧс, мӧсъясӧс, осёлъясӧс, верблюдъясӧс, кесйӧг айуловӧс да аньясӧс.

¹⁷ Но Господь ыстіс чорыд висьӧм фараонлы да сылӧн йӧзлы Ӧврамлӧн Сара гӧтыр вӧсна.

¹⁸ Фараон корис Ӧврамӧс да шуис: «Мый тэ вӧчин мекӧд? Мыйла тэ эн висьтав, мый сійӧ тэнад гӧтыр?

¹⁹ Мыйла шуин сійӧс аслад чойӧн? Ме сійӧс аслым гӧтырӧ босьті. Ӧні бӧр босьт ассьыд гӧтыртӧ да мун».

²⁰ Фараонлӧн тшӧктӧм серти сылӧн йӧзыс ыстісны Ӧврамӧс да сылысь гӧтырсӧ Египетысь налӧн став эмбурнас. [Ыстісны тшӧтш Лотӧс.]