Олӧм 11 - Коми Библия 2023

Вавилонса башня

¹ Став му пасьтала вӧлі дзик ӧти кыв да ӧти сёрнисикас.

² Асыввылысь петӧм бӧрын йӧзыс аддзисны Сеннар муысь паськыдін да овмӧдчисны сэтчӧ.

³ Ӧта-мӧдныслы шуисны: «Вӧчамӧй сёйысь биын сотӧмӧн кирпич». Тадзи из пыдди кутісны вӧдитчыны кирпичӧн, а кориз пыдди – сьӧд сирӧн.

⁴ Найӧ шуисны: «Лэптамӧй аслыным кар да башня, джуджданас мед лоӧ енэжӧдз. Тадзи нимӧдам асьнымӧс да став му пасьталаыс огӧ разалӧй».

⁵ Господь лэччис видзӧдлыны лэптан карсӧ да башнясӧ.

⁶ Сійӧ шуис: «Тайӧ йӧзыс – ӧти войтыр, налӧн ӧти кыв. Мый нӧ кутісны вӧчны! Найӧ кӧ босьтчисны, вайӧдасны помӧдз!

⁷ Вай лэччам да сорлалам налысь кывсӧ, медым дугдасны гӧгӧрвоны ӧта-мӧднысӧ».

⁸ И разӧдіс найӧс Господь сэтысянь став му пасьталаыс. Тадзи найӧ дугдісны лэптыны карсӧ [да башнясӧ].

⁹ Карыслы сетӧма Вавилон ним, ӧд сэні Господь сорлаліс йӧзлысь кывсӧ да сэтысянь разӧдіс найӧс став му пасьтала.

Симсянь чужысьяс

¹⁰ Симсянь чужысьяс йылысь. Симлы вӧлі сё арӧс, кор сылӧн чужис Арфаксад. Тайӧ лои ыджыд ойдлӧм бӧрын кык во мысти.

¹¹ Арфаксад чужӧмсянь Сим оліс витсё во. Сылӧн чужисны на пиян да нывъяс. [Сэсся сійӧ куліс.]

¹² Арфаксадлы вӧлі [сё] комын вит арӧс, кор сылӧн чужис [Кенан. Кенан чужӧмсянь Арфаксад оліс куимсё комын во, сылӧн чужисны на пиян да нывъяс. Сэсся сійӧ куліс. Кенанлы вӧлі сё комын арӧс, кор сылӧн чужис] Шелах.

¹³ Шелах чужӧмсянь Арфаксад оліс нёльсё куим во. Сылӧн чужисны на пиян да нывъяс. [Сэсся сійӧ куліс.]

¹⁴ Шелахлы вӧлі [сё] комын арӧс, кор сылӧн чужис Эвер.

¹⁵ Эвер чужӧмсянь Шелах оліс нёльсё куим во. Сылӧн чужисны на пиян да нывъяс. [Сэсся сійӧ куліс.]

¹⁶ Эверлы вӧлі [сё] комын нёль арӧс, кор сылӧн чужис Пелег.

¹⁷ Пелег чужӧмсянь Эвер оліс нёльсё комын во. Сылӧн чужисны на пиян да нывъяс. [Сэсся сійӧ куліс.]

¹⁸ Пелеглы вӧлі [сё] комын арӧс, кор сылӧн чужис Рагав.

¹⁹ Рагав чужӧмсянь Пелег оліс кыксё ӧкмыс во. Сылӧн чужисны на пиян да нывъяс. [Сэсся сійӧ куліс.]

²⁰ Рагавлы вӧлі [сё] комын кык арӧс, кор сылӧн чужис Серуг.

²¹ Серуг чужӧмсянь Рагав оліс кыксё сизим во. Сылӧн чужисны на пиян да нывъяс. [Сэсся сійӧ куліс.]

²² Серуглы вӧлі [сё] комын арӧс, кор сылӧн чужис Нахор.

²³ Нахор чужӧмсянь Серуг оліс кыксё во. Сылӧн чужисны на пиян да нывъяс. [Сэсся сійӧ куліс.]

²⁴ Нахорлы вӧлі кызь ӧкмыс арӧс, кор сылӧн чужис Терах.

²⁵ Терах чужӧмсянь Нахор оліс сё дас ӧкмыс во. Сылӧн чужисны на пиян да нывъяс. [Сэсся сійӧ куліс.]

²⁶ Терахлы вӧлі сизимдас арӧс, кор сылӧн чужисны Ӧврам, Нахор да Харан.

²⁷ Терахсянь чужысьяс йылысь. Терахлӧн чужисны Ӧврам, Нахор да Харан. Харанлӧн чужис Лот.

²⁸ Харан куліс аслас Терах батьыс дырйи на Ур карын, аслас Калдея чужан муын.

²⁹ Ӧврам да Нахор гӧтрасисны. Ӧврамлӧн гӧтырыс вӧлі Сара, а Нахорлӧн – Милка, Харанлӧн нылыс. Харан вӧлі Милкалӧн да Искалӧн бать.

³⁰ Саралӧн эз вӧв ныв-пиыс, эз вермы сьӧктынысӧ да.

³¹ Терах босьтіс аскӧдыс Ӧврам писӧ, Харан пиыслысь Лот писӧ да Сара моньсӧ, Ӧврамлысь гӧтырсӧ. Калдея Урысь найӧ мӧдӧдчисны Ханаан мулань. Но кор воисны Харанӧ, сувтісны сэтчӧ.

³² [Харанын] Терах оліс кыксё вит арӧсӧдз. Сійӧ куліс Харанын.