Олӧм 1 - Коми Библия 2023

Муюгыд вӧчӧм

¹ Медводз Ен вӧчис енэж да му.

² Муыс вӧлі мыгӧртӧм да куш, пыдӧстӧм йир весьтын вӧлі пемыд, и Енлӧн Лов шлывъяліс ва весьтын.

³ Ен шуис: «Мед лоас югыд». И лои югыд.

⁴ Ен аддзис, мый югыдыс бур, да торйӧдіс сійӧс пемыдысь.

⁵ Ен нимтіс югыдсӧ лунӧн, а пемыдсӧ – войӧн. Вӧлі рыт, вӧлі асыв – медводдза лун.

⁶ Ен шуис: «Мед лоас енэжвевт да торйӧдас васӧ». [И лои тадз.]

⁷ Ен вӧчис енэжвевт да торйӧдіс улыс васӧ вылыс ваысь. И лои тадз.

⁸ Ен нимтіс енэжвевтсӧ енэжӧн. [Ен аддзис, мый тайӧ бур.] Вӧлі рыт, вӧлі асыв – мӧд лун.

⁹ Ен шуис: «Енэжувса ваыс мед чукӧрмас ӧтилаӧ, да тыдовтчас косін». И лои тадз. [Енэжувса ваыс чукӧрмис аслас местаӧ, и тыдовтчис косін.]

¹⁰ Ен нимтіс косінсӧ муӧн, а чукӧрмӧм васӧ – саридзӧн. Ен аддзис, мый тайӧ бур.

¹¹ Ен шуис: «Муыс мед быдтас быдсяма пусӧ да веж быдмӧгсӧ, кодъяс пондасны вайны ассьыныс кӧйдыс-вотӧс». И лои тадз.

¹² Муыс быдтіс быдсяма пусӧ да веж быдмӧгсӧ, и найӧ пондісны вайны ассьыныс кӧйдыс-вотӧс. Ен аддзис, мый тайӧ бур.

¹³ Вӧлі рыт, вӧлі асыв – коймӧд лун.

¹⁴ Ен шуис: «Енэжвевтын мед лоасны югдӧданторъяс. Найӧ мед [югдӧдасны мусӧ,] торйӧдасны лунсӧ войысь, петкӧдласны лунъяс, вояс да кадъяс

¹⁵ и югдӧдасны мусӧ енэжвевтсянь». И лои тадз.

¹⁶ Ен вӧчис кодзувъяс да кык гырысь югдӧдантор – ыджыдджыксӧ, медым веськӧдлыны лунӧн, ичӧтджыксӧ, медым веськӧдлыны войӧн.

¹⁷ Ен пуктіс найӧс енэжвевтӧ югдӧдны мусӧ,

¹⁸ веськӧдлыны лунӧн да войӧн, торйӧдны югыдсӧ пемыдысь. Ен аддзис, мый тайӧ бур.

¹⁹ Вӧлі рыт, вӧлі асыв – нёльӧд лун.

²⁰ Ен шуис: «Ваыс мед тырас ловъя олысьясӧн. Лэбачьяс мед лэбаласны му весьтӧд, енэжвевттіыс». [И лои тадз.]

²¹ Ен вӧчис быдсикас черисӧ да ваын олысь-уялысьсӧ, а сідзжӧ быдсикас лэбач-пӧткасӧ. Ен аддзис, мый тайӧ бур.

²² Ен бурсиис найӧс шуалӧмӧн: «Чужтысьӧй-рӧдмӧй да олӧй саридзын, а лэбачьяс мед рӧдмасны му вылын».

²³ Вӧлі рыт, вӧлі асыв – витӧд лун.

²⁴ Ен шуис: «Муыс мед чужтас быдсикас ловъя олысьӧс: мувыв пемӧсъясӧс да гаг-веглясьысьясӧс». И лои тадз.

²⁵ Ен вӧчис быдсяма мувыв пемӧссӧ да гаг-веглясьысьсӧ. Ен аддзис, мый тайӧ бур.

²⁶ Ен шуис: «Вӧчамӧй мортӧс Миян кодьӧн да Миян ногаӧн. Сійӧ мед ыджыдалас саридзса черияс да енэжвыв лэбачьяс вылын, мувыв пемӧсъяс вылын, мувыв гаг-веглясьысьяс вылын да став муыс вылын».

²⁷ Ен вӧчис мортӧс Ас кодьнас. Аймортӧс да аньӧс Ен кодьӧн вӧчис.

²⁸ Ен бурсиис найӧс шуалӧмӧн: «Чужтысьӧй-рӧдмӧй, овмӧдӧй мусӧ да видзӧй сійӧс, ыджыдалӧй саридзса черияс да енэжвыв лэбачьяс вылын, [мувыв пемӧсъяс вылын, став муыс да] му вылас став котралысь-веглясьысь вылын».

²⁹ Ен шуис: «Ме сета тіянлы став кӧйдыса-вотӧса быдмӧгсӧ да пусӧ. Тайӧ лоӧ тіянлы сёянӧн.

³⁰ А став мувывса пемӧслы да енэжвыв лэбачлы, котралысь-веглясьысьлы сёянӧн лоӧ веж турун». И лои тадз.

³¹ Ен видзӧдліс Аслас вӧчӧмторъяс вылӧ и аддзис, мый ставыс вывті бур. Вӧлі рыт, вӧлі асыв – квайтӧд лун.