Ӧксыяслӧн 4 небӧг 25 - Коми Библия 2023

¹ Та вӧсна Седекейлӧн ӧкмысӧд веськӧдлан воӧ дасӧд тӧлысьлӧн дасӧд лунӧ вавилонса Навукодоносор ӧксы аслас тышкайӧзкӧд уськӧдчис Ерусалим кар вылӧ. Найӧ кытшалісны карсӧ да лэптісны сы гӧгӧр тымӧд.

² Карыс вӧлі кытшын Седекей ӧксылӧн дас ӧтиӧд веськӧдлан воӧдз.

³ Нёльӧд тӧлысьлӧн ӧкмысӧд лунӧ, кор карас войтырыс ёна тшыгъяліс, и налы нинӧм вӧлі сёйнысӧ,

⁴ карсӧ кытшалысь калдеяса тышкайӧз жугӧдісны карса стенсӧ. Войнас иудаса тышкайӧз петісны Ерусалим карысь дзиръяӧд, мый вӧлі кыкпӧвста стенмас ӧксылӧн сад дорын. Седекей ӧксы аслас йӧзкӧд пышйис Йӧрдан ковтыслань.

⁵ Но калдеяса тышкайӧз вӧтчисны ӧксы бӧрся да суӧдісны сійӧс Ерикон кардорса ковтысын. Ӧксылӧн тышкайӧзыс эновтісны сійӧс да пышйисны-разалісны.

⁶ Седекей ӧксыӧс кутісны да вайӧдісны вавилонса ӧксы дінӧ Ривлаӧ, и сэні сійӧс мыждісны.

⁷ Седекейлысь пиянсӧ виисны сылӧн син водзын. Сэсся вавилонса ӧксы бытшкис Седекейлысь кыкнан синсӧ, дорис сійӧс ыргӧн чепъясӧн да нуӧдіс Вавилонӧ.

Ерусалим кар кисьтӧм да крам бырӧдӧм

⁸ Вавилонса Навукодоносор ӧксылӧн дас ӧкмысӧд веськӧдлан воӧ витӧд тӧлысьлӧн сизимӧд лунӧ Ерусалимӧ локтіс Навузардан, ӧксыӧс видзысьяслӧн юралысь, вавилонса ӧксылӧн кесъялысь.

⁹ Сійӧ сотіс Ерусалимысь Господьлысь крамсӧ, ӧксылысь керкасӧ да став ыджыд керкасӧ.

¹⁰ Навузарданлӧн калдеяса тышкайӧзыс жугӧдісны Ерусалимӧс кытшалысь стенсӧ.

¹¹ А карас кольӧм войтырсӧ, весиг вавилонса ӧксы дор вуджӧм йӧзӧс, Навузардан, ӧксыӧс видзысьяслӧн юралысь, нуӧдіс Вавилонӧ.

¹² Сӧмын гӧль йӧз пӧвстысь этшаникӧс Навузардан кольӧдіс уджавны виноград йӧрын да видз-му вылын.

¹³ Калдеяса тышкайӧз жуглісны Господьлӧн крамысь ыргӧн сюръяяссӧ, мыссян доз улысь джекъяссӧ да ыргӧн вайӧртӧдсӧ. Ыргӧнсӧ нуисны Вавилонӧ.

¹⁴ Найӧ босьтісны тшӧтш пӧим чукӧртан воръяс, пӧим куралан зыръяс, пуртъяс, кӧшъяс да ыргӧнысь вӧчӧм мукӧд дозмуксӧ, мыйӧн вӧдитчисны крамын кесъялігӧн.

¹⁵ Ӧксыӧс видзысьяслӧн юралысь босьтіс зарниысь да эзысьысь вӧчӧм дозмук: ӧгыр пӧртъяс да вир резан тасьтіяс.

¹⁶ Кык сюръя, вайӧртӧд да джекъяс, мый вылын сулалісны мыссян дозъяс, коркӧ Господьлӧн крамӧ вӧчліс Соломон. Тайӧ вӧчӧмторъясас ыргӧныс вӧлі сы мында, мый весиг эз позь веситнысӧ.

¹⁷ Быд сюръя вӧлі дас кӧкъямыс гырддза судта. Сюръя йылас вӧлі ыргӧнысь вӧчӧм юр, сылӧн судтаыс вӧлі куим гырддза. Юр гӧгӧрыс вӧліны чепъясысь вӧчӧм мичмӧданторъяс да гранат кодь сяръяс. Сюръяясыс вӧліны ӧткодьӧсь. Ставсӧ вӧлі вӧчӧма ыргӧнысь.

¹⁸ Навузардан, ӧксыӧс видзысьяслӧн юралысь, босьтіс Серай аркирейӧс да сылы отсасьысь Софоний попӧс, тшӧтш крам пыранін видзысь куим попӧс.

¹⁹ Карсьыс босьтіс ыджыд чина мортӧс, коді кывкутіс тышкайӧз вӧсна, босьтіс ӧксылысь вит туйдӧдысьӧс, кодъяс вӧлі кольӧмаӧсь на карас, тшӧтш тышкайӧзлӧн юралысьлысь гижалысьсӧ, коді пасъяліс небӧгӧ тышӧ мунысьясӧс. Нӧшта Навузардан босьтіс карсьыс квайтымын мортӧс, кодъяс шедісны сы киӧ.

²⁰ Ставнысӧ Навузардан, ӧксыӧс видзысьяслӧн юралысь, вайӧдіс вавилонса ӧксы дінӧ Ривлаӧ.

²¹ Ривлаын, Хамат муын, вавилонса ӧксы виис найӧс. Тадзи Иуда войтырӧс вӧлі нуӧдӧма пленӧ аслас муысь.

Иуда муын Гедалийлӧн юралӧм

²² Вавилонса Навукодоносор ӧксы пуктіс Шафан Ахикамлысь Гедалий писӧ веськӧдлыны Иуда муын кольӧм войтырӧн.

²³ Кор иудаса тышкайӧзӧн веськӧдлысьяс кылісны Гедалийӧс юралысьӧ пуктӧм йылысь, найӧ локтісны асланыс йӧзкӧд Гедалий дінӧ Миспаӧ. Веськӧдлысьясыс вӧліны: Нетанийлӧн Измаил пиыс, Карейлӧн Иоханан пиыс, Нетофаысь Танхуметлӧн Серай пиыс да Язаний, кодлӧн батьыс вӧлі Маакаысь.

²⁴ Гедалий кыв сетӧмӧн шуис веськӧдлысьяслы да налӧн тышкайӧзлы: «Энӧ полӧй калдеяса юралысьясысь. Кольччӧй тайӧ муас да кесъялӧй вавилонса ӧксылы. Сэки тіянлы лоӧ бур».

²⁵ Но сизимӧд тӧлысьӧ Миспаӧ локтіс Элишам Нетанийлӧн Измаил пиыс, коді вӧлі ӧксы рӧдысь. Сыкӧд тшӧтш локтіс дас морт. Найӧ виисны Гедалийӧс, тшӧтш иудаса да калдеяса йӧзӧс, кодъяс вӧліны сыкӧд Миспаын.

²⁶ Та бӧрын став войтырыс ичӧтсянь ыджыдӧдз, тшӧтш тышкайӧзӧн веськӧдлысьяс, пышйисны Египетӧ. Найӧ ёна полісны калдеяса йӧзысь.

Еконей ӧксы дінӧ бурсьӧлӧмтчӧм

²⁷ Иудаса Еконей ӧксыӧс пленӧ нуӧдӧм бӧрын комын сизимӧд вонас дас кыкӧд тӧлысьлӧн кызь сизимӧд лунӧ вавилонса Эвил-Меродак ӧксы бурсьӧлӧмтчис иудаса Еконей ӧксы дінӧ да лэдзис сійӧс дзескыдінысь. Буретш тайӧ вонас Эвил-Меродак лоис ӧксыӧн.

²⁸ Сійӧ бура сёрнитіс Еконейкӧд да пуктіс сійӧс Вавилонын олысь мукӧд ӧксыяс дорысь вылӧджык.

²⁹ Еконей пӧрччис дзескыдінын пукалан паськӧмсӧ да пасьталіс мӧд паськӧм. Сійӧ кадсяньыс да олӧм помӧдзыс Еконей сёйис-юис вавилонса ӧксылӧн пызан сайын.

³⁰ Вавилонса ӧксы сетіс сылы быд лун кежлӧ став коланаторсӧ, и тадзи вӧлі Еконейлӧн олӧм помӧдзыс.