Ӧксыяслӧн 4 небӧг 24 - Коми Библия 2023

¹ Ехоякимлӧн юралан кадӧ Иуда му вылӧ уськӧдчис вавилонса Навукодоносор ӧксы. Куим во чӧж Ехояким вӧлі Навукодоносорлӧн кипод улын, но сэсся кыпӧдчис сылы паныд.

² Господь мӧдӧдіс Ехоякимлы паныд калдея, арамей, моав да аммон тышкайӧзӧс, медым бырӧдны Иуда му, кыдзи висьталіс Господь Сылы кесъялысь пророкъяс пыр.

³ Ставыс тайӧ суис Иуда муӧс, ӧд тадзи вӧлі шуӧма Господьлӧн. Господь вештіс Иуда войтырӧс Аслас чужӧмбан водзысь Манассей ӧксылӧн мыжъяс вӧсна, мый сійӧ вӧчис.

⁴ Манассей кисьтіс мыжтӧм йӧзлысь вирсӧ сы мында, мый Ерусалим тырис вирӧн. Та вӧсна Господь эз прӧстит сійӧс.

⁵ Ехояким ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

⁶ Ехояким куліс да вуджис батьясыс дінӧ. Ехояким бӧрти ӧксыӧ пуксис сылӧн Еконей пиыс.

⁷ Египетса ӧксы эз нин петавлы тышӧ аслас муысь, ӧд вавилонса ӧксы босьтіс Египет кипод улысь став мусӧ Египет мудорса шорсянь Ефрат ю дорӧдз.

Иуда муын Еконейлӧн ӧксыалӧм

⁸ Ӧксыӧ пуксигас Еконейлы вӧлі дас кӧкъямыс арӧс. Куим тӧлысь чӧж сійӧ юраліс Ерусалимын. Сылӧн мамыс вӧлі Нехушта, Ерусалимысь Элнатанлӧн нылыс.

⁹ Батьыс моз Еконей вӧчис Господь водзын шогмытӧмсӧ.

¹⁰ Сійӧ кадас вавилонса Навукодоносор ӧксылӧн тышкайӧзыс уськӧдчисны Ерусалим вылӧ да кытшалісны сійӧс.

¹¹ Навукодоносор локтіс сэтчӧ, кор сылӧн тышкайӧзыс вӧлі кытшалӧны карсӧ.

¹² Сэки иудаса Еконей ӧксы аслас мамкӧд, кесйӧгъясыскӧд, веськӧдлысьясыскӧд да ыджыд чина йӧзыскӧд сетчис вавилонса ӧксылы. Навукодоносор босьтіс Еконейӧс пленӧ аслас кӧкъямысӧд веськӧдлан воӧ.

¹³ Навукодоносор босьтіс Господьлӧн крамысь да ӧксы керкаысь став озырлунсӧ. Сійӧ жугліс став зарни дозмук-кӧлуйсӧ, мый коркӧ вӧчліс израильса Соломон ӧксы Господьлӧн крамын кесъялӧм вылӧ. Тадзи иніс Господьлӧн шуӧмыс.

¹⁴ Ерусалимысь став олысьсӧ, став веськӧдлысьсӧ да тышкайӧзсӧ Навукодоносор нуӧдіс пленӧ. Налӧн лыдыс вӧлі дас сюрс морт. Сійӧ нӧшта нуӧдіс пленӧ став тшупсьысьсӧ да дорччысьсӧ, колис Ерусалимӧ сӧмын гӧль йӧзӧс.

¹⁵ Еконей ӧксыӧс, сылысь мамсӧ да гӧтыръяссӧ, ыджыд чина йӧзӧс да иудаса юралысьясӧс Навукодоносор нуӧдіс Ерусалимысь пленӧ Вавилонӧ.

¹⁶ Нӧшта нуӧдіс Вавилонӧ став тышкайӧзсӧ – сизим сюрс мортӧс, тшӧтш тшупсьысьясӧс да дорччысьясӧс – сюрс мортӧс. Ставныс найӧ вӧліны тышӧ петны вермысьяс.

¹⁷ Ерусалимын Навукодоносор пуктіс ӧксыӧ Еконейлысь Маттанай дядьсӧ да сетіс сылы Седекей ним.

Седекей – Иуда муын медбӧръя ӧксы

¹⁸ Ӧксыӧ пуксигас Седекейлы вӧлі кызь ӧти арӧс. Дас ӧти во чӧж сійӧ юраліс Ерусалимын. Сылӧн мамыс вӧлі Хамуталь, Ливнаысь Еремейлӧн нылыс.

¹⁹ Ехояким моз Седекей вӧчис Господь водзын шогмытӧмсӧ.

²⁰ Иуда муын да Ерусалим карын олысьяс вылӧ Господьлӧн скӧрлуныс вӧлі сэтшӧм ыджыд, мый вӧтліс найӧс Аслас чужӧмбан водзысь. Седекей кыпӧдчис вавилонса ӧксылы паныд.