Ӧксыяслӧн 4 небӧг 23 - Коми Библия 2023

Иосей ӧксылӧн Господьлы кӧсйысьӧм

¹ Иосей ӧксы чукӧртіс Иуда муысь да Ерусалим карысь став юрнуӧдысьсӧ.

² Сэсся ӧксы муніс Господьлӧн крамӧ. Сыкӧд тшӧтш мунісны Иуда войтыр да Ерусалимын олысьяс, попъяс да пророкъяс – муніс став войтырыс, том и пӧрысь. Ӧксы гораа лыддис ставнас Йитӧд небӧгсӧ, мый аддзисны Господьлӧн крамысь.

³ Сэсся ӧксы сувтіс джуджыд пос вылӧ да Господь водзын кӧсйысис видзны йитӧд, мый Господь кӧртавліс Аслас войтыркӧд. Ӧксы кӧсйысис кывзысьны Господьлысь да став сьӧлӧмсяньыс овны Сылӧн индӧд-тшӧктӧмъяс серти, медым видзны небӧгӧ гижӧм йитӧдлысь кывъяссӧ. Став войтырыс тшӧтш кӧсйысис видзны тайӧ йитӧдсӧ.

⁴ Ӧксы тшӧктіс Хилки аркирейлы, попъяслы да крам пыранін видзысьяслы петкӧдны Господьлӧн крамысь став юрбитанторсӧ, мый вӧлі вӧчӧма Ваал да Астарта идолъяслы да енэжвыв вынъяслы. Сійӧ сотіс ставсӧ Ерусалим кар сайын Кедрон ковтысын да нуис пӧимсӧ Вефильӧ.

⁵ Ӧксы вӧтлаліс аслас муысь ылӧг енъяслы кесъялысь попъясӧс, кодъясӧс иудаса ӧксыяс индылісны, медым иудаса каръясын да Ерусалим гӧгӧр вись ваян мылькъяс вылын сотны висьяс Вааллы да Астарталы, нӧшта шонділы, тӧлысьлы да кодзувъяслы – став енэжвыв выныслы.

⁶ Сійӧ петкӧдіс Астарта бӧлбанӧс Господьлӧн крамысь Ерусалим кар сайӧ Кедрон ковтысӧ да сотіс сэні. Сэсся пызьӧдз нырис, а пызьсӧ койыштіс шойна вылӧ.

⁷ Сійӧ бырӧдіс Господьлӧн крам йӧрысь кырсалысьяслысь керкаяс, кӧні аньяс кыисны Астарта бӧлбанлы паськӧм.

⁸ Ӧксы вуджӧдіс иудаса мукӧд каръясысь став попсӧ Ерусалимӧ да пежаліс Гевасянь Бер-Шеваӧдз вись ваян мылькъяс, кӧні найӧ сотісны висьяс. Сійӧ жугліс карса юралысь Исуслӧн дзиръя дорысь вись ваян мылькъяс, кодъяс сулалісны карӧ пыран дзиръя шуйгаладорын.

⁹ Вись ваян мылькъяс вылын кесъялысь попъяслы эз позь кесъявны Ерусалимын Господьлӧн висьпуктанін дорын, но мукӧд попъяскӧд найӧ вермисны сёйны шомтӧм нянь.

¹⁰ Ӧксы пежаліс Бен-Хинном ковтысын Тофет нима висьваянін, медым йӧзыс дугдісны сэні сотны ассьыныс ныв-пинысӧ Молок идоллы.

¹¹ Сійӧ бырӧдіс тшӧтш иудаса ӧксыясӧн шонділы сиӧм вӧвъясӧс, кодъяс сулалісны Господьлӧн крам пыранін водзын Нетан-Мелеклӧн, ыджыд чина мортлӧн, вежӧс дорын. Шонділы сиӧм тарантасъяс ӧксы сотіс.

¹² Сійӧ бырӧдіс висьпуктанінъяс, кодъясӧс иудаса ӧксыяс сувтӧдісны Ахазлӧн керка вевт вылӧ. Бырӧдіс тшӧтш Господьлӧн крам кыкнан йӧрысь Манассейӧн сувтӧдӧм висьпуктанінъяс. Жугліс найӧс торпыригӧдз, нырис пызьӧдз да шыблаліс Кедрон ковтысӧ.

¹³ Ӧксы пежаліс вись ваян мылькъяс, кодъяс сулалісны Ерусалимсянь асыввылын, Бырӧдӧмлӧн керӧссянь лунвылын. Найӧс коркӧ вӧчліс израильса Соломон ӧксы, мед юрбитны сидонсаяслӧн зывӧк Астарта идоллы, моавсаяслӧн зывӧк Кемош идоллы да аммон войтырлӧн зывӧк Милком идоллы.

¹⁴ Ӧксы жугліс юрбитан изъяс, пӧрӧдіс юрбитан пуяс да тыртіс сійӧ местасӧ морт лыясӧн.

¹⁵ Иосей ӧксы жугӧдіс Вефильысь висьпуктанін да вись ваян мыльк, мый коркӧ вӧчліс Неватлӧн Еровам пиыс, коді кежӧдіс Израиль войтырӧс мыжас. Иосей сотіс юрбитан пу да вись ваян мыльк, сэтысь изъяссӧ нырис пызьӧдз.

¹⁶ Гӧгӧрбок видзӧдалігӧн Иосей аддзис керӧс пӧлӧнысь шойна. Сійӧ тшӧктіс перъявны сэтысь лыяссӧ да сотіс найӧс висьпуктанін вылын. Тадзи пежаліс висьпуктанінсӧ Господьлӧн шуӧмыс серти, мый йылысь Енлӧн морт водзынджык юӧртліс. [Сійӧ юӧртліс та йылысь сэки, кор Еровам ӧксы сулаліс гаж дырйи висьпуктанін водзын. А ӧні гӧгӧрбок видзӧдалігӧн Иосей аддзис дзебанінсӧ Енлӧн мортлысь, коді водзвыв висьтавліс тайӧ лоӧмторйыс йылысь.]

¹⁷ Гӧгӧрбок видзӧдалігӧн Иосей юаліс: «Мыйсяма казьтылан из ме аддза?» Карса олысьяс вочавидзисны: «Тайӧ Ен мортлӧн дзебаніныс. Сійӧ воліс Иуда муысь да водзвыв висьтавліс сы йылысь, мый тэ ӧні вӧчин вефильса висьпуктанінкӧд».

¹⁸ «Энӧ вӧрӧдӧй сылысь лыяссӧ да дзебанінсӧ», – шуис ӧксы. Тадзи вӧлі видзӧма тайӧ мортыслысь лыяссӧ, нӧшта Самарияысь локтӧм пророклысь лыяссӧ.

¹⁹ Иосей ӧксы бырӧдіс тшӧтш Самария каръясысь вись ваян мылькъяс вылын сулалысь юрбитанінъяс, кодъясӧс вӧчлісны израильса ӧксыяс. Тайӧн найӧ дӧзмӧдлісны Господьӧс. Иосей вӧчис сэтчӧс юрбитанінъяскӧд сійӧ жӧ, мый вӧчис Вефильын.

²⁰ Вись ваян мылькъяс вылын кесъялысь попъясӧс Иосей виис налӧн висьпуктанінъяс вылын, тшӧтш сотіс сэні шойнаысь перйӧм лыяссӧ. Та бӧрын ӧксы бӧр локтіс Ерусалимӧ.

²¹ Иосей ӧксы тшӧктіс став войтырыслы: «Пасйӧй асланыд Господь Енлысь Ыджыд лунсӧ, кыдзи гижӧма Йитӧд небӧгас».

²² Израильын тадзисӧ эз на пасйывны Ыджыд лунсӧ ёрдысьяслӧн веськӧдлан кад бӧрти, кор Иудаын да Израильын юралісны ӧксыяс.

²³ Тайӧ Ыджыд лунсӧ вӧлі пасйӧма Иосей ӧксылӧн дас кӧкъямысӧд веськӧдлан воӧ Ерусалимын. Гажсӧ вӧлі сиӧма Господьлы.

²⁴ Иосей бырӧдіс кулӧмаӧс корысьясӧс да тунасьысьясӧс, гортса бӧлбанъясӧс, идолъясӧс да став пежторсӧ, мый вӧлі Иуда муын да Ерусалимын. Тадзи сійӧ збыльмӧдіс Индӧд кывъяссӧ, мый вӧлі гижӧма небӧгӧ, кодӧс аддзис Господьлӧн крамысь Хилки поп.

Иосей ӧксылӧн кулӧм

²⁵ Таӧдз эз вӧв Иосей кодь ӧксыыс, коді эськӧ став сьӧлӧмнас, олӧмнас да став выннас шыасис Господь дінӧ да оліс Мӧисейлӧн Индӧд серти. И Иосейлӧн кулӧм бӧрти сы кодь ӧксыыс эз вӧв.

²⁶ Но Господь эз кусӧд Ассьыс ыджыд скӧрлунсӧ. Господьлӧн скӧрлуныс ыпъяліс Иуда вылӧ, ӧд Манассей ёна дӧзмӧдіс Сійӧс.

²⁷ Господь шуис: «Израильӧс моз Ме ӧтдорта Иуда войтырӧс. Ме эновта Ерусалим кар, мый Ме бӧрйи, и крам, мый йылысь Ме шулі, мый сэні лоас Менам нимӧй».

²⁸ Иосей ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

²⁹ Иосейлӧн ӧксыалігӧн Неко фараон, египетса ӧксы, мӧдӧдчис Ефрат ю дорӧ ассурса ӧксылы отсӧг вылӧ. Иосей ӧксы петіс фараонлы паныд тышӧ, но Мегиддо кар дорын фараон виис сійӧс.

³⁰ Иосейлӧн кесйӧгъясыс вайисны Мегиддоысь сылысь шойсӧ Ерусалимӧ да дзебисны сійӧс аслас дзебанінӧ. Сэсся Иуда войтыр мавтыштіс Иосейлысь Иохаз писӧ да пуктіс сійӧс ӧксыӧ Иосей батьыс пыдди.

Иуда муын Иохазлӧн ӧксыалӧм

³¹ Ӧксыӧ пуксигас Иохазлы вӧлі кызь куим арӧс. Куим тӧлысь чӧж сійӧ юраліс Ерусалимын. Сылӧн мамыс вӧлі Хамуталь, Ливнаысь Еремейлӧн нылыс.

³² Батьясыс моз Иохаз вӧчис Господь водзын шогмытӧмсӧ.

³³ Хамат муын Ривла карын Неко фараон пуксьӧдіс Иохазӧс дзескыдінӧ, тадзи вештіс сійӧс Ерусалимын ӧксыалӧмысь. Иуда войтырлы фараон тшӧктіс мынтыны вот – сё талант эзысь да [сё] талант зарни.

Иуда муын Ехоякимлӧн ӧксыалӧм

³⁴ Неко фараон пуктіс ӧксыӧ Иосейлысь Эляким писӧ да сетіс сылы Ехояким ним. Иохазӧс фараон нуӧдіс Египетӧ, кӧні Иохаз куліс.

³⁵ Ехояким мынтіс фараонлы эзысь да зарни. Медым сетны фараонлы сьӧм сылӧн корӧм серти, Ехояким ӧксы перйис аслас войтырыслысь вот. Быд мортлысь сійӧ чукӧртіс эзысь да зарни сылысь овмӧссӧ донъялӧм серти, сэсся чукӧртӧмасӧ сетіс фараонлы.

³⁶ Ӧксыӧ пуксигас Ехоякимлы вӧлі кызь вит арӧс. Дас ӧти во чӧж сійӧ юраліс Ерусалимын. Сылӧн мамыс вӧлі Зевудда, Румаысь Педайлӧн нылыс.

³⁷ Батьясыс моз Ехояким вӧчис Господь водзын шогмытӧмсӧ.