Ӧксыяслӧн 4 небӧг 22 - Коми Библия 2023

Иуда муын Иосейлӧн ӧксыалӧм

¹ Ӧксыӧ пуксигас Иосейлы вӧлі кӧкъямыс арӧс. Комын ӧти во чӧж сійӧ юраліс Ерусалимын. Сылӧн мамыс вӧлі Едида, Боцкатысь Адайлӧн нылыс.

² Иосей вӧчис Господь водзын шогманасӧ. Сійӧ ветліс Давид пӧльыслӧн туйӧд, эз кежлыв сэтысь веськыдвылӧ ни шуйгавылӧ.

³ Аслас дас кӧкъямысӧд веськӧдлан воӧ Иосей ӧксы ыстіс Господьлӧн крамӧ ассьыс Шафан гижалысьӧс. Шафан вӧлі Ацалийлӧн пи, Ацалий – Мешулламлӧн. Иосей шуис Шафанлы:

⁴ «Мун Хилки аркирей дінӧ. Тшӧкты, мед сійӧ арталас Господьлӧн крамӧ вайӧм сьӧмсӧ, мый пыранін видзысьяс чукӧртісны войтырыслысь.

⁵ Чукӧртӧм сьӧмсӧ мед сетасны Господьлысь крамсӧ дзоньталӧм вӧсна кывкутысьяслы, а найӧ мед юкласны сьӧмсӧ уджалысьяслы, кодъяс дзоньталӧны Господьлысь крамсӧ:

⁶ тшупсьысьяслы, керка лэптысьяслы да стен кыпӧдысьяслы. Нӧшта тайӧ сьӧм вылас крам дзоньталӧм могысь мед ньӧбасны из да кер.

⁷ Крам дзоньталӧм вӧсна кывкутысьяслысь энӧ корӧй сьӧм видзӧм йылысь пасйӧдъяс, ӧд найӧ вӧчӧны ассьыныс уджнысӧ пӧръясьтӧг».

⁸ Хилки аркирей шуис Шафан гижалысьлы: «Господьлӧн крамысь ме аддзи Индӧд небӧг». Хилки сетіс небӧгсӧ Шафанлы. Шафан лыддис сійӧс.

⁹ Сэсся Шафан гижалысь бӧр локтіс ӧксы дінӧ да шуис: «Тэнад кесйӧгъясыд босьтісны крамӧ чукӧртӧм сьӧмсӧ да сетісны крам дзоньталӧм вӧсна кывкутысьяслы».

¹⁰ Нӧшта Шафан содтіс, Хилки поп пӧ сетіс меным небӧг. Шафан лыддис сійӧс ӧксылы.

¹¹ Индӧд небӧгысь кывъяссӧ кылӧм бӧрын ӧксы косяліс ассьыс паськӧмсӧ.

¹² Хилки поплы, Шафанлӧн Ахикам пилы, Микайлӧн Акбор пилы, Шафан гижалысьлы да аслас Асай кесйӧглы ӧксы тшӧктіс:

¹³ «Мунӧй да юалӧй Господьлысь, мый меным да менам войтырлы колӧ вӧчны. Юалӧй, мый Иуда войтырлы колӧ вӧчны тайӧ небӧгас гижӧмаыс серти. Ӧд Господьлӧн ыджыд скӧрлуныс ыпнитіс миян вылӧ сыысь, мый миян батьяс эз кывзысьны да эз овны тайӧ небӧгас гижӧм кывъясыс серти».

¹⁴ Хилки поп, Ахикам, Акбор, Шафан да Асай мунісны Олдана пророк ань дінӧ. Сылӧн верӧсыс вӧлі Шаллум, коді вӧлі вежа паськӧм видзысьӧн. Шаллумлӧн батьыс вӧлі Тиквай, Тиквайлӧн – Хархас. Олдана оліс Ерусалим карлӧн мӧд юкӧнас. Локтысьяс висьталісны сылы ӧксылысь корӧмсӧ.

¹⁵ Олдана шуис: «Господь, Израильлӧн Ен, тадзи висьталӧ: ”Тіянӧс мӧдӧдысьлы шуӧй,

¹⁶ мый Господь тадзи висьталӧ: Ме ыста ыджыд шог тайӧ карыс да сэні олысьяс вылӧ. Ме олӧмӧ пӧрта ставсӧ, мый гижӧма сійӧ небӧгас, кодӧс лыддис иудаса ӧксы.

¹⁷ Тайӧ войтырыс эновтіс Менӧ, найӧ сотісны висьяс мукӧд енъяслы, ёна дӧзмӧдісны Менӧ асланыс киӧн вӧчӧмторъясӧн. Таысь Менам скӧрлунӧй ыпъялӧ тайӧ карыс вылӧ да оз куслы”.

¹⁸ Иудаса ӧксылы, коді ыстіс тіянӧс шыасьны Господь дінӧ, висьталӧй, мый Господь, Израильлӧн Ен, сійӧ кывъясыс йылысь, мый тэ кывлін, тадзи висьталӧ:

¹⁹ ”Ме висьтавлі тайӧ карыс да сэні олысьяс йылысь, мый найӧ лоӧны повзьӧданторйӧн да ёранторйӧн. Тайӧс кылӧм бӧрын тэ небзьӧдін сьӧлӧмтӧ да раммӧдчин Ме водзын, косялін паськӧмтӧ да бӧрдін Ме водзын, та вӧсна Ме кылі тэнӧ, – висьталӧ Господь. –

²⁰ Ме вуджӧда тэнӧ батьясыд дінӧ. Тэ лӧня кулан, и тэнӧ пуктасны дзебанінӧ. Тэнад синмыд оз аддзыв сійӧ ыджыд шогсӧ, мый Ме ыста тайӧ карыс вылӧ”». Мӧдӧдӧмаяс бӧр локтісны да висьталісны ӧксылы тайӧ кывъяссӧ.