Ӧксыяслӧн 4 небӧг 14 - Коми Библия 2023

Иуда муын Амасейлӧн ӧксыалӧм

¹ Израильса Йоас ӧксылӧн, Иохаз пилӧн, мӧд веськӧдлан воӧ Иуда муын ӧксыӧ пуксис иудаса Йоас ӧксылӧн Амасей пиыс.

² Ӧксыӧ пуксигас сылы вӧлі кызь вит арӧс. Кызь ӧкмыс во чӧж сійӧ юраліс Ерусалимын. Сылӧн мамыс вӧлі Ерусалимысь Еходань.

³ Амасей вӧчис Господь водзын шогманасӧ, но эз сідзи, кыдзи вӧчис сылӧн Давид пӧльыс. Амасей ставсӧ вӧчис Йоас батьыс моз.

⁴ Сійӧ эз бырӧд вись ваян мылькъяс, и войтырыс важ мозыс вайліс сэні висьяс да тшынӧдчис.

⁵ Кор Амасейлӧн юралӧмыс зумыдмис, сійӧ виис ассьыс кесйӧгъяссӧ, кодъяс виисны сылысь батьсӧ, Йоас ӧксыӧс.

⁶ Но налысь челядьсӧ эз ви, а вӧчис Господьлӧн тшӧктӧм серти, кыдзи гижӧма Мӧисей Индӧдын: «Пиыслӧн мыж вӧсна батьсӧ оз ков вины, и батьыслӧн мыж вӧсна писӧ оз ков вины. Быдӧнӧс аслас мыж вӧсна мед лоӧ мыждӧма кулӧм вылӧ».

⁷ Амасей пасьвартіс Сола ковтысын дас сюрс эдомса тышкамортӧс. Сійӧ босьтіс налысь Села кар да сетіс сылы выль ним – Иоктеэл. Тайӧ карыс ӧнӧдз тадзи шусьӧ.

⁸ Сэсся Амасей мӧдӧдіс израильса Йоас ӧксы дінӧ юӧртысьӧс. Йоас вӧлі Иохазлӧн пи, Иохаз – Ехулӧн. Амасей тшӧктіс висьтавны Йоаслы, мый кӧсйӧ аддзысьлыны сыкӧд.

⁹ Израильса Йоас ӧксы ыстіс иудаса Амасей ӧксылы татшӧм воча юӧр: «Ливанса йӧн ыстіс юӧр ливанса сус пулы. Сійӧ корис, сет пӧ менам пи сайӧ ассьыд нывтӧ. Но ливанса звер ветлӧдліс да таляліс йӧнсӧ.

¹⁰ Тэ шуан, мый пасьвартін эдомсаясӧс, и таысь тэ ышнясян да вылӧ кыпӧдчан. Пукав гортад, эн корсь аслыд шогсӧ, сэки тэ да тэкӧд тшӧтш Иуда войтырыд онӧ усьӧй».

¹¹ Но Амасей эз кывзы Йоасӧс. Сэки израильса Йоас ӧксы петіс тышӧ иудаса Амасей ӧксылы паныд. Найӧ паныдасисны Иуда муын Бет-Шемеш карын.

¹² Израильсаяс пасьвартісны иудаса тышкайӧзӧс, и найӧ пышйисны гортаныс.

¹³ Бет-Шемешын израильса Йоас ӧксы босьтіс пленӧ иудаса Амасей ӧксыӧс, Ахазий Йоаслысь писӧ. Сэсся Йоас тышкайӧзыскӧд муніс Ерусалимӧ. Сэні сійӧ жугӧдіс карса стенсӧ нёльсё гырддза пасьта – Ефрем дзиръясянь Пельӧс дзиръяӧдз.

¹⁴ Йоас ӧксы петкӧдіс Господьлӧн крамысь да ӧксы керкаса озырлун видзанінъясысь став эзысь-зарнисӧ да дозмук-кӧлуйсӧ. Сійӧ босьтіс аскӧдыс Амасейлӧн тӧдчана йӧз пӧвстысь ӧткымынӧс, медым Амасей эз кыпӧдчы сылы паныд. Сэсся Йоас бӧр муніс Самарияӧ.

¹⁵ Йоас ӧксыалӧм дырйи мукӧд лоӧмторъяс йылысь, сылӧн тӧдчана уджъяс йылысь да иудаса Амасей ӧксыкӧд тышкасьӧм йылысь гижӧма израильса ӧксыяслӧн каднебӧгӧ.

¹⁶ Йоас куліс да вуджис батьясыс дінӧ. Сійӧс дзебисны Самария карӧ, израильса ӧксыяскӧд орччӧн. Йоас бӧрти ӧксыӧ пуксис сылӧн Еровам пиыс.

¹⁷ Израильса Йоас ӧксылӧн, Иохаз пилӧн, кулӧм бӧрын иудаса Амасей ӧксы, Йоаслӧн пиыс, оліс нӧшта на дас вит во.

¹⁸ Амасей ӧксыалӧм дырйи мукӧд лоӧмторъяс йылысь гижӧма иудаса ӧксыяслӧн каднебӧгӧ.

¹⁹ Йӧзыс кыпӧдчисны Амасейлы паныд Ерусалимын, и сійӧ пышйис Лакиш карӧ. Но паныд кыпӧдчысьяс мӧдӧдісны сэтчӧ ассьыныс йӧзсӧ, и сэні найӧ виисны Амасейӧс.

²⁰ Амасейлысь шойсӧ вайисны вӧв вылын Ерусалимӧ да дзебисны сійӧс Давид карӧ батьясыскӧд орччӧн.

²¹ Амасей ӧксы бӧрти Иуда войтыр пуктіс ӧксыӧ Амасейлысь дас квайт арӧса Азарий писӧ.

²² Амасей ӧксылӧн кулӧм бӧрын да батьясыс дінӧ вуджӧм бӧрын Азарий бӧр босьтіс Элат кар да выльысь лэптіс сійӧс.

Израиль муын Еровамлӧн ӧксыалӧм

²³ Иудаса Амасей ӧксылӧн, Йоас пилӧн, дас витӧд веськӧдлан воӧ Израиль муын ӧксыӧ пуксис Йоаслӧн Еровам пиыс. Нелямын ӧти во чӧж сійӧ юраліс Самария карын.

²⁴ Еровам вӧчис Господь водзын шогмытӧмсӧ, эз эновтчы сійӧ мыжъяссьыс, мыйӧн Неватлӧн Еровам пиыс коркӧ кежӧдіс Израиль войтырӧс мыжас.

²⁵ Но сійӧ бӧр бергӧдіс Израильлы Лево-Хаматсянь Сола саридз дорӧдз мусӧ. Тадзи иніс Господьлӧн, Израиль Енлӧн, шуӧмыс, мый Сійӧ висьталіс Аслас Иона кесйӧг пыр, коді вӧлі Амиттайлӧн пи, Гат-Хеферысь пророк.

²⁶ Господь аддзис, кутшӧма сьӧкыдалӧ Израиль войтыр – ичӧтсянь ыджыдӧдз некод эз коль, медым отсавны Израильлы.

²⁷ Но Господь эз кӧсйы дзикӧдз бырӧдны Израиль войтырӧс енэж увсьыс, та вӧсна мездіс найӧс Йоаслӧн Еровам пиыс пыр.

²⁸ Еровам ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ. Сэтчӧ нӧшта гижӧма, кыдзи Еровам тышкасис да бӧр бергӧдіс Израильлы Дамаск да Хамат каръяс, кодъяс коркӧ вӧліны Иуда чужанкотырлӧн кипод улынӧсь.

²⁹ Еровам куліс да вуджис батьясыс дінӧ, израильса ӧксыяс дінӧ. Сы бӧрти ӧксыӧ пуксис сылӧн Закар пиыс.