Ӧксыяслӧн 4 небӧг 1 - Коми Библия 2023

Ахазий ӧксылӧн кулӧм

¹ Ахавлӧн кулӧм бӧрын моавсаяс кыпӧдчисны Израильлы паныд.

² Самарияын олігас Ахазий аслас керкаын усис вылі судта ӧшиньӧдыс да ёна доймис. Сійӧ корис ассьыс йӧзсӧ да шуис: «Ветлӧй экронса Ваал-Зевув ен дінӧ да юалӧй, бурда-ӧ ме тайӧ доймӧмсьыс?» [Мӧдӧдӧмаяс мунісны.]

³ Но Тишби карын олысь Иллялы Господьлӧн андел шуис: «Пет воча самарияса ӧксылӧн мӧдӧдӧмаяслы да висьтав налы: ”Мыйла ті мунанныд юасьны экронса Ваал-Зевув енлысь? Израильын ӧмӧй абу Енмыс?

⁴ Господь тадзи висьталӧ ӧксыныдлы: тэ он чеччы вольпась вывсьыд, кӧні куйлан. Тэ кулан”». Илля муніс [да висьталіс тайӧс налы].

⁵ Мӧдӧдӧмаяс бӧр мунісны Ахазий ӧксыныс дінӧ. Сійӧ юаліс налысь: «Мыйла ті сэтшӧм ӧдйӧ бӧр бергӧдчинныд?»

⁶ Найӧ вочавидзисны: «Миянлы паныдасис морт, коді тшӧктіс миянлы бӧр бергӧдчыны ӧксыным дінӧ да шуны, мый Господь тадзи висьталӧ: ”Мыйла тэ мӧдӧдін ассьыд йӧзтӧ юасьны экронса Ваал-Зевув енлысь? Израильын ӧмӧй абу Енмыс? Тэ он чеччы вольпась вывсьыд, кӧні куйлан. Тэ кулан”».

⁷ Ӧксы юаліс: «Кутшӧмджык сійӧ мортыс, коді паныдасис тіянлы да висьталіс тайӧс?»

⁸ Ӧксылы вочавидзисны: «Сы вылын вӧлі гӧна паськӧм, коскас – кучик тасма». Ӧксы шуис: «Тайӧ Тишби карысь Илля».

⁹ Ӧксы мӧдӧдіс Илля дінӧ ветымын тышкамортӧс налӧн веськӧдлыськӧд. Илля пукаліс керӧс йылын, кор тышкакотырӧн веськӧдлысь кайис сы дінӧ да шуис: «Енлӧн мортӧй! Ӧксы тшӧктӧ тэныд лэччыны».

¹⁰ Илля вочавидзис: «Ме кӧ Енлӧн морт, мед лэччас енэжсяньыс би да сотас тэнӧ да тэнсьыд ветымын тышкаморттӧ». Сэки енэжсяньыс лэччис би да сотіс тышкакотырӧн веськӧдлысьӧс да сылысь йӧзсӧ.

¹¹ Ӧксы нӧшта мӧдӧдіс Илля дінӧ ветымын тышкамортӧс налӧн веськӧдлыськӧд. Веськӧдлысьыс шуис Иллялы: «Енлӧн мортӧй! Ӧксы тшӧктӧ, мед тэ ӧдйӧджык лэччин».

¹² Илля вочавидзис: «Ме кӧ Енлӧн морт, мед лэччас енэжсяньыс би да сотас тэнӧ да тэнсьыд ветымын тышкаморттӧ». Сэки енэжсяньыс лэччис Енлӧн би да сотіс тышкакотырӧн веськӧдлысьӧс да сылысь йӧзсӧ.

¹³ Ӧксы коймӧдысь мӧдӧдіс ветымын тышкамортӧс налӧн веськӧдлыськӧд. Веськӧдлысьыс кайис Илля дінӧ да пидзӧс вылас сувтӧмӧн корис: «Енлӧн мортӧй! Ло бур сьӧлӧма ме дінӧ да тайӧ ветымын мортыс дінӧ, аслад кесйӧгъяс дінӧ. Эн бырӧд миянӧс.

¹⁴ Ме тӧда, мый енэжсяньыс лэччис би да сотіс кык тышкакотырсӧ да налысь веськӧдлысьяссӧ. Но ӧні ло бур сьӧлӧма ме дінӧ. Эн бырӧд миянӧс».

¹⁵ Господьлӧн андел шуис Иллялы: «Мун сыкӧд. Эн пов сыысь». Илля муніс тышкакотырӧн веськӧдлыськӧд ӧксы дінӧ.

¹⁶ Ӧксылы Илля шуис: «Господь тадзи висьталӧ: ”Израильын ӧмӧй абу Енмыс, кодлысь позьӧ юавны? Тэ мӧдӧдін йӧзтӧ юасьны экронса Ваал-Зевув енлысь. Та вӧсна тэ он чеччы вольпась вывсьыд, кӧні куйлан. Тэ кулан”».

¹⁷ Ахазий куліс, кыдзи Господь висьталіс Илля пыр. Ахазийлӧн эз вӧв пиыс, та вӧсна сы бӧрти ӧксыӧ пуксис Иорам [Ахазийлӧн вокыс]. Тайӧ вӧлі иудаса Иорам ӧксылӧн, Иосафат пилӧн, мӧд веськӧдлан воӧ.

¹⁸ Ахазий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.