Ӧксыяслӧн 3 небӧг 8 - Коми Библия 2023

Йитӧд кудсӧ крамӧ вайӧм

¹ Соломон ӧксы корис ас дінас Ерусалимӧ израильса юрнуӧдысьясӧс, быд чужанкотырысь юралысьӧс да рӧдкутысьясӧс, медым вайны Давид карысь, мӧд ногӧн кӧ, Сионысь, Господьлысь Йитӧд кудсӧ.

² Гажӧдчан лунъяс дырйи, этаним нима сизимӧд тӧлысьӧ, израильсаяс чукӧртчисны Соломон ӧксы дінӧ.

^3-4 Израильса юрнуӧдысьяслӧн локтӧм бӧрын попъяс босьтісны Господьлысь Йитӧд кудсӧ, вежа чомсӧ да вежа дозмук-кӧлуйсӧ, мый вӧлі вежа чомйын, да ставсӧ тайӧс левитъяскӧд нуисны крамӧ.

⁵ Соломон ӧксы да Йитӧд куд водзӧ чукӧртчӧм Израиль войтыр вайисны вись пыдди ыж-кӧзаӧс да ӧш-мӧскӧс. Пемӧсыс вӧлі сы мында, мый некод эз вермы лыддьынысӧ.

⁶ Попъяс пыртісны Господьлысь Йитӧд кудсӧ крамлӧн пыді вежӧсӧ – Вежасьыс-вежаинӧ – да пуктісны сійӧс индӧм местаӧ херувимъяслӧн бордъяс улӧ.

⁷ Херувимъяслӧн бордъясыс вӧлі шевкнитчӧмаӧсь Йитӧд куд весьтын. Бордъяснаныс найӧ вевттисны кудсӧ да куд новлӧдлан потшъяссӧ.

⁸ Потшъясыс вӧліны сэтшӧм кузьӧсь, мый налысь помсӧ мортыс вермис аддзыны Вежасьыс-вежаин водзвылын ортсы вежӧсас сулалігӧн, мӧд ногӧн кӧ, Вежаинын сулалігӧн. Но ылыстчыны кӧ, потшъясыс эз тыдавны. Найӧ ӧнӧдз сэнӧсь.

⁹ Кудйын вӧлі сӧмын кык изпӧв, найӧс сэтчӧ Хорив керӧсын пуктыліс Мӧисей. Буретш сэні Израиль войтырлӧн Египет муысь петӧм бӧрын Господь кӧрталіс накӧд йитӧд.

¹⁰ Кор попъяс петісны Вежаинысь, Господьлысь крамсӧ тыртіс кымӧр.

¹¹ Кымӧр вӧсна попъяс эз вермыны водзӧ кесъявны, ӧд Господьлӧн дзирдлуныс тыртіс Господьлысь крамсӧ.

¹² Сэки Соломон шуис: «Господь висьтавліс, мый Сійӧ лоӧ сьӧд кымӧрын.

¹³ Господьӧй, Тэныд ме лэпті керка, медым Тэ олін сэні нэмъяс чӧж».

Соломон шыасьӧ войтырыс дінӧ

¹⁴ Соломон ӧксы бергӧдчис сы водзын сулалысь Израиль войтырлань да бурсиис найӧс.

¹⁵ Сійӧ шуис: «Ошкӧм Господьлы, Израильлӧн Енлы! Ӧні Господь збыльмӧдіс сійӧ, мый Аслас вомӧн кӧсйысьліс менам Давид батьлы. Господь шуліс:

¹⁶ ”Ассьым Израиль войтырӧс Египетысь петкӧдӧмсянь Израиль чужанкотыръяслы вичмӧдӧм муясын Ме эг бӧрйывлы некутшӧм кар, медым сэні лэптісны Меным керка. [А ӧні Ме бӧрйи Ерусалим кар, медым сэні вӧлі Менам нимӧй.] Ме бӧрйи Давидӧс, медым сійӧ веськӧдліс Менам Израиль войтырӧн”.

¹⁷ Менам Давид батьӧй сьӧлӧмсяньыс кӧсйис лэптыны Господьлы, Израильлӧн Енлы, крам.

¹⁸ Но Господь шуис сылы: ”Зэв бур, мый тэ кӧсъян лэптыны крам, кӧні лоас Менам нимӧй.

¹⁹ Но он тэ лэпты, а тэсянь чужысь пиыд лэптас Меным крам”.

²⁰ Господь збыльмӧдіс Ассьыс шуӧм кывсӧ. Ӧні ме пукала Давид батьлӧн юралан пуклӧсын да веськӧдла Израильӧн, кыдзи Господь и шуліс. Ме лэпті Израильлӧн Господь Енлы крам.

²¹ Крамас ме дасьті места Господьлӧн Йитӧд кудлы, кытчӧ пуктӧма йитӧдлысь изпӧвъяс. Тайӧ йитӧдсӧ Сійӧ кӧрталіс миян батьяскӧд Египет муысь найӧс петкӧдӧм бӧрын».

Соломонлӧн кевмысьӧм

²² Став Израиль войтыр водзын Соломон сувтіс Господьлӧн висьпуктанін водзӧ, лэптіс кисӧ енэжлань

²³ да шуис: «Господьӧй, Израильлӧн Енмӧй! Тэ кодь мӧд енмыс абу енэжас ни му вылас! Тэ видзан кӧрталӧм йитӧдтӧ да буралӧмтӧ Аслад кесйӧгъясыд дінӧ, кодъяс став сьӧлӧмсяньыс олӧны Тэнад кӧсйӧм серти.

²⁴ Тэ кутін Ассьыд кывтӧ, мый шулін Аслад Давид кесйӧглы, менам батьлы. Ӧні Тэ збыльмӧдін сійӧс, мый шулін Аслад вомӧн.

²⁵ Господьӧй, Израильлӧн Енмӧй, збыльмӧд тшӧтш Ассьыд мӧд кӧсйысьӧмтӧ, мый Тэ шулін Аслад кесйӧглы, менам Давид батьлы. Тэ ӧд шулін сылы: ”Тэсянь чужысьяс кӧ тэ моз кутасны ветлыны Ме водзын веськыд туйӧд, сэки на пӧвстысь пыр лоӧ ӧксы, коді кутас веськӧдлыны Израиль войтырӧн Ме водзын”.

²⁶ Израильлӧн Енмӧй, мед инас Тэнад кӧсйысьӧмыд, мый Тэ шулін Аслад Давид кесйӧглы, менам батьлы.

²⁷ Збыльысь, му вылын-ӧ Енмыслы овны? Енэжыс да енэжвывса енэжъясыс кӧ оз вермыны тӧрӧдны Тэнӧ, дерт нин, тайӧ крамыс, кодӧс ме лэпті [Тэнад нимлы], оз вермы тӧрӧдны Тэнӧ.

²⁸ Господьӧй Енмӧй, бергӧдчы Аслад кесйӧглань да кывзы сылысь корӧмсӧ! Кыв Аслад кесйӧглысь Тэ водзын талун кевмысьӧмсӧ!

²⁹ Тэнад синмыд мед лун и вой видзӧдас тайӧ крамыс вылӧ. Тэ ӧд шулін, мый Тэнад нимыд лоас сэні. Кыв Аслад кесйӧглысь тайӧ крамас кевмысьӧмсӧ.

³⁰ Кыв Аслад кесйӧглысь да Аслад Израиль войтырлысь кевмӧмсӧ, кор найӧ шыасясны Тэ дінӧ тайӧ крамас. Кыв найӧс енэжсяньыд, Аслад оланінсянь. Кыв найӧс да прӧстит найӧс.

³¹ Мыжаласны кӧ кодӧскӧ мӧд мортлы паныд мыж вӧчӧмысь, и сылы ковмас локны тайӧ крамас да Тэнад висьпуктанін водзын кыв сетӧмӧн шуны, мый абу мыжа,

³² сэки Тэ кыв енэжсяньыд да веськыда мыжды ассьыд кесйӧгъястӧ: мыжаӧс мыжды, мед сылы юр вылас усьӧ аслас мыжыс, а мыжтӧмӧс дорйы да мынтысь сылы веськыдлуныс серти.

³³ Тэнад Израиль войтырыд кӧ Тэныд паныд мыж вӧчас да та вӧсна вӧрӧг пасьвартас найӧс, а сэсся кӧ найӧ шыасясны Тэ дінӧ, кутасны нимӧдны Тэнӧ да корны-кевмыны Тэ водзын тайӧ крамас,

³⁴ сэки Тэ кыв енэжсяньыд да прӧстит Израиль войтырыдлысь мыжсӧ. Бӧр бергӧд найӧс сійӧ муас, мый Тэ сетін налӧн батьяслы.

³⁵ Израиль войтырлӧн Тэныд паныд мыж вӧчӧм вӧсна кӧ енэжыс оз сет зэрсӧ, но сэсся кӧ найӧ кевмысясны тайӧ крамас, нимӧдасны Тэнӧ да бергӧдчасны мыжсьыныс, мыйысь Тэ мыждін найӧс,

³⁶ сэки Тэ кыв найӧс енэжсяньыд да прӧстит Аслад кесйӧгъяслысь да Израиль войтырыдлысь мыжсӧ. Петкӧдлы налы бур туйсӧ, кыті налы колӧ мунны, да мӧдӧд зэрсӧ Аслад му вылӧ, мый Тэ вичмӧдін Аслад войтырыдлы.

³⁷ Налӧн му вылӧ кӧ пуксяс тшыг кад либӧ паськалас пӧрӧс висьӧм, налысь няньсӧ кӧ бырӧдас сотысь тӧвру, кутшӧмкӧ висьӧм, саранча либӧ лёльӧ, налӧн му вылӧ кӧ уськӧдчас вӧрӧг, суас кӧ найӧс ускӧттьӧ либӧ висьӧм,

³⁸ но Тэнад Израиль войтырысь кӧ кӧть ӧти морт либӧ ставнас войтырыд шыасяс Тэ дінӧ да кевмысяс аслас шог дырйи, и найӧ кӧ нюжӧдасны кинысӧ тайӧ крамланьыс,

³⁹ сэки Тэ кыв найӧс енэжсяньыд, Аслад оланінсянь, да прӧстит найӧс. Тэ ӧд тӧдан быдӧнлысь сьӧлӧмсӧ, сӧмын ӧтнадӧн Тэ тӧдан мортлысь сьӧлӧмсӧ. Мынтысь быдӧнлы сылӧн уджъясыс серти,

⁴⁰ медым Тэнад войтырыд став олӧм чӧжыс оліс Тэысь полӧмӧн-вежавидзӧмӧн сійӧ муас, мый Тэ сетін миян батьяслы.

^41-42 Весиг кӧ йӧз муысь локтысь, коді абу Тэнад Израиль войтыр пӧвстысь, кылас Тэнад ыджыд нимыд, вына киыд да ён сойыд йылысь, локтас ылі муысь Тэнад нимыд вӧсна и кутас кевмысьны тайӧ крамланьыс бергӧдчӧмӧн,

⁴³ сэки Тэ кыв сійӧс енэжсяньыд, Аслад оланінсянь. Кора Тэнӧ, вӧч йӧз муысь локтысьлӧн кевмӧм серти, медым мувывса войтыръяс тӧдісны Тэнсьыд нимтӧ да Тэнад Израиль войтырыд моз полісны-вежавидзисны Тэысь. Сэки найӧ тӧдмаласны, мый Тэнад нимлы сиӧма тайӧ крамсӧ, мый ме лэпті.

⁴⁴ Тэнад тшӧктӧм серти кӧ Тэнад войтырыд тышӧ петас вӧрӧглы паныд, кутас кевмысьны Тэныд, Господьӧй, да бергӧдчас Тэнад бӧрйӧм карлань да крамлань, мый ме лэпті Тэныд,

⁴⁵ сэки Тэ кыв налысь корӧм-кевмӧмсӧ енэжсяньыд да отсав налы.

⁴⁶ Но кор найӧ мыж вӧчасны Тэныд паныд, ӧд мыж вӧчтӧм мортыс абу, и Тэ скӧрман на вылӧ да сетан найӧс вӧрӧг киӧ, и кор найӧс нуӧдасны пленӧ ылӧ либӧ матӧ,

⁴⁷ и сэні кӧ найӧ сьӧлӧмсяньныс бергӧдчасны да Тэ водзын кевмысьӧмӧн висьтасясны, ми пӧ мыжмим, лёксӧ да мыжсӧ вӧчим,

⁴⁸ и став сьӧлӧмсяньныс кӧ шыасясны Тэ дінӧ вӧрӧг муын, кытчӧ найӧс нуӧдісны, пондасны кевмысьны Тэныд да кевмысиганыс бергӧдчасны асланыс мулань, мый Тэ сетін налӧн батьяслы, карлань, мый Тэ бӧрйин, да крамлань, мый ме лэпті Тэныд,

⁴⁹ сэки Тэ кыв налысь корӧм-кевмӧмсӧ енэжсяньыд, Аслад оланінсянь, да отсав налы.

⁵⁰ Прӧстит Ассьыд войтыртӧ, ӧд найӧ мыж вӧчисны Тэныд паныд. Прӧстит налысь мыжъяснысӧ. Небзьӧд пленӧ босьтысьяслысь сьӧлӧмсӧ, медым найӧ вӧліны бур сьӧлӧмаӧсь Тэнад войтырыд дінӧ.

⁵¹ Ӧд найӧ – Тэнад войтыр да Тэнад бӧрйӧм йӧз. Тэ петкӧдін найӧс Египетысь, тайӧ донӧдӧм пачсьыс.

⁵² Енмӧй, эн вешты синтӧ аслад кесйӧг да Аслад Израиль войтыр вылысь, [веськӧд пельтӧ налань,] кыв налысь корӧм-кевмӧмсӧ, кор найӧ шыасясны Тэ дінӧ.

⁵³ Господьӧй Ыджыдӧй, Египетысь батьяснымӧс петкӧдігӧн Тэ торйӧдін найӧс Аслыд мувывса став войтыр пӧвстысь, кыдзи шулін аслад Мӧисей кесйӧг пыр».

Соломон бурсиӧ Израиль войтырӧс

⁵⁴ Висьпуктанін водзын пидзӧс вылас сулалӧмӧн да кисӧ енэжлань лэптӧмӧн Соломон вайис став ассьыс корӧм-кевмӧмсӧ Господьлы. Кор помаліс кевмысьӧмсӧ, сувтіс пидзӧс вывсьыс.

⁵⁵ Сэсся гораа шуалӧмӧн бурсиис став Израиль войтырсӧ:

⁵⁶ «Ошкӧм Господь Енлы, коді сетіс Аслас Израиль войтырлы лӧнь олӧм, кыдзи и кӧсйысис. Сійӧ збыльмӧдіс став бур кӧсйысьӧмсӧ, мый шуліс Аслас Мӧисей кесйӧг пыр.

⁵⁷ Господь, миян Енным, мед пыр лоӧ миянкӧд, кыдзи Сійӧ пыр вӧлі миян батьяскӧд. Сійӧ мед оз коль да оз эновт миянӧс.

⁵⁸ Мед бергӧдас миянлысь сьӧлӧмнымӧс Асланьыс, медым ми ветлім Сылӧн туйясӧд да олім Сылӧн индӧд-тшӧктӧмъяс серти, мый Сійӧ сетіс миян батьяслы.

⁵⁹ Мед менам кевмысьӧмӧй, мый ме талун вайи Господь Еннымлы, лун и вой лоӧ Сы водзын. Мед Сійӧ быд кадӧ отсалас меным, Аслас кесйӧглы, да Аслас Израиль войтырлы.

⁶⁰ Сэки му вылас олысь войтыръяс тӧдмаласны, мый Господь эм Ен, и мӧдыс абу.

⁶¹ Тіян сьӧлӧмныд мед лоӧ йитчӧма Господькӧд, миян Енкӧд, медым и водзӧ ті олінныд Сылӧн индӧд-тшӧктӧмъяс серти».

Крам вежӧдӧм

⁶² Ӧксы да сыкӧд став Израиль войтыр вайисны висьяс Господьлы.

⁶³ Соломон вайис Господьлы бурасян вись пыдди кызь кык сюрс ӧшкӧс да сё кызь сюрс ыжӧс. Тадзи ӧксы да став Израиль войтыр вежӧдісны Господьлысь крамсӧ.

⁶⁴ Сійӧ жӧ лунӧ ӧксы вежӧдіс Господьлӧн крам йӧрлысь шӧр юкӧнсӧ, сотіс сэні сотан вись да нянь вись, тшӧтш бурасян вись пыдди вайӧм пемӧсъяслысь госсӧ. Ӧд ыргӧн висьпуктаніныс, мый сулаліс Господь водзын, вӧлі ичӧт, сэтчӧ эз тӧр сотан вись, нянь вись да пемӧсъяслӧн госыс.

⁶⁵ Сійӧ лунъясӧ Соломон став Израиль войтыркӧд пасйис гаж. Лево-Хаматсянь Египет мудорса шорӧдз израильсаяс чукӧртчисны Соломонкӧд ӧтвыв тайӧ гаж вылас. Асланыс Господь Ен водзын найӧ гажӧдчисны сизим лун чӧж, сэсся нӧшта на гажӧдчисны сизим лун – ставнас дас нёль лун. [Крам дорын найӧ сёйисны-юисны да кевмысисны Господь Ен водзын.]

⁶⁶ Гажӧдчан лунъяс помасьӧм бӧрын Соломон лэдзис войтырсӧ. Найӧ бурсиисны ӧксыӧс да мунісны гортаныс долыд сьӧлӧмӧн, нимкодясисны став бурсьыс, мый Господь вӧчис Аслас Давид кесйӧглы да Аслас Израиль войтырлы.