Ӧксыяслӧн 3 небӧг 7 - Коми Библия 2023

Ӧксы керка лэптӧм

¹ Ассьыс керкасӧ Соломон лэптіс дас куим во чӧж.

² Керка пытшкас сійӧ вӧчис торъя ыджыд вежӧс да нимтіс сійӧс ливанса сус пу керкаӧн. Тайӧ вежӧсыс вӧлі сё гырддза кузьта, ветымын гырддза пасьта да комын гырддза судта. Сійӧ мыджсис нёль визьӧн сувтӧдӧм сус пу сюръяяс вылӧ, а сюръяяс вылас вомӧнӧн вӧлі пукталӧма сус пу матичьяс.

³ Сус пуысь вольсалӧм йиркыс кутчысис матичьяс вылас. Матичьясыс кутчысисны нелямын вит сюръя вылын. Быд визьын вӧлі дас вит сюръя.

⁴ Ӧшиньяссӧ вӧлі писькӧдӧма куим визьӧн, воча стенъясын ӧшиньяссӧ вӧлі вӧчӧма ӧта-мӧд весьтас.

⁵ Ӧдзӧсъясыс да ӧдзӧс куричьясыс вӧліны нёль пельӧсаӧсь. Ӧшиньяссӧ вӧлі писькӧдӧма ӧта-мӧдыслы воча куим визьӧн.

⁶ Керка пытшкас Соломон вӧчис сюръяяса ыджыд вежӧс – ветымын гырддза кузьта да комын гырддза пасьта. Вежӧс водзас вӧчис сюръяяса посводз, пыранінас вӧчис пос.

⁷ Нӧшта вӧчис юралан керка, кӧні юралан пуклӧссянь сійӧ веськыда мыждіс войтырсӧ. Джоджыс сэні дзоньнас вӧлі сус пуысь.

⁸ Соломонлӧн олан керкаыс сулаліс мӧд йӧрын, юралан керка сайын. Сылӧн олан керкаыс вӧлі юралан керка кодь жӧ. Соломон вӧчис татшӧм жӧ керка фараон нывлы, кодӧс сійӧ босьтіс гӧтырӧ.

⁹ Став тайӧ лэптӧм керкаяссӧ подувсяньыс керка вевтӧдзыс и ортсы стенсяньыс ыджыд йӧрӧдзыс вӧлі вӧчӧма колана ыджда серти кералӧм-лӧсалӧм гырысь бур изъясысь. Изъяссӧ вӧлі шыльӧдӧма керка ортсыладорсяньыс и пытшкӧсладорсяньыс.

¹⁰ Подувсӧ вӧлі вӧчӧма дас гырддза ыджда и кӧкъямыс гырддза ыджда изъясысь.

¹¹ На вылӧ вӧлі пуктӧма колана ыджда серти кералӧм изъяс да сус пу пӧвъяс.

¹² Ӧксы керкалысь ыджыд йӧрсӧ вӧлі кытшалӧма кералӧм изъясӧн: быд куим судта тэчӧм изъяс вылӧ вӧлі пуктӧма ӧти судта сус пу керъяс. Татшӧм ногӧн вӧлі кытшалӧма тшӧтш Господьлӧн крамлысь пытшкӧс йӧрсӧ да посводзсӧ.

Крамса сюръяяс да дозмук-кӧлуй

¹³ Соломон корис Тир карысь Хирам нима мортӧс.

¹⁴ Сійӧ вӧлі Неффалим чужанкотырысь, дӧвалӧн пи. Батьыс сылӧн вӧлі ыргӧнысь вӧчасьысь. Хирам вӧлі зэв киподтуя, кужис вӧчавны ыргӧнысь быдсяматорсӧ. Хирам локтіс Соломон ӧксы дінӧ да вӧчис быд уджсӧ, мый сылы индыліс ӧксы.

¹⁵ Хирам вӧчис ыргӧнысь кык ыджыд сюръя. Быд сюръя вӧлі дас кӧкъямыс гырддза судта, а медым сюръясӧ гӧгӧртны, колӧ вӧлі дас кык гырддза кузьта кӧв.

¹⁶ Кыкнан сюръя йылас Хирам сывдӧмӧн вӧчис вит гырддза судта юр.

¹⁷ Юр гӧгӧрыс ӧшліс чепъясысь вӧчӧм сизим мичмӧдантор.

¹⁸ Мичмӧданторъяс вылас кык визьӧн вӧчис гранат кодь сяръяс, медым вевттьыны сюръяяслысь юрсӧ.

¹⁹ Посводзын сулалысь сюръяяслӧн юръясыс вӧліны нёль гырддза судта лилия дзоридз кодьӧсь.

²⁰ Кыкнан сюръялӧн юр вылас чепъясысь вӧчӧм мичмӧданторъяс вылӧ вӧлі вӧчӧма гранат кодь кыксё сяр.

²¹ Тайӧ сюръяяссӧ Соломон сувтӧдіс крам посводзӧ, ӧтисӧ – веськыдладорас, мӧдсӧ – шуйгаладорас. Веськыдвыв сюръяыслы сетіс Якин ним, а шуйгаыслы – Воаз ним.

²² Кыкнан сюръялӧн юрыс вӧлі лилия дзоридз кодь. Сюръяяс вӧчӧм бӧрын

²³ Хирам вӧчис ыргӧнысь ыджыд гӧгрӧс вайӧртӧд, шуисны сійӧс саридзӧн. Ӧтар дорышсяньыс мӧдар дорышӧдзыс сійӧ вӧлі дас гырддза пасьта, джуджданас вӧлі вит гырддза, а гӧгӧртны кӧ сійӧс кӧвйӧн, колана вӧлі комын гырддза кузьта кӧв.

²⁴ Вайӧртӧдлысь доргӧгӧрсӧ вӧлі серпасалӧма тыкваясӧн. Быд гырддза пасьтаын вӧлі дас тыква кык визьӧн. Серпасъяссӧ вӧлі ӧтторъя сывдӧма вайӧртӧдыскӧд.

²⁵ Вайӧртӧдыс сулаліс дас кык ӧш вылын: куим ӧшкыс видзӧдісны войвылӧ, куимыс – рытыввылӧ, куимыс – лунвылӧ, и куимыс – асыввылӧ. Ӧшъяслысь бекнысӧ вӧлі веськӧдӧма вайӧртӧд шӧрлань, на вылӧ и мыджсис вайӧртӧдыс.

²⁶ Вайӧртӧдлӧн стенмыс вӧлі ки пыдӧс кызта, а дорышыс вӧлі чаша сяма, лилия дзоридз кодь. Сэтчӧ тӧрис кык сюрс бат мында ва.

²⁷ Хирам нӧшта вӧчис ыргӧнысь дас джек. Быд джек вӧлі нёль гырддза кузьта, нёль гырддза пасьта да куим гырддза судта.

²⁸ Джек дор пӧвъяссӧ пельӧсӧдыс вӧлі топӧдӧма дзавйӧн.

²⁹ Джек дор пӧвъясас да дзавъяс вылас вӧлі серпасалӧма левъясӧс, ӧшъясӧс да херувимъясӧс, а левъяс да ӧшъяс весьтас вылысяньыс да улысяньыс вӧлі серлӧдлӧма гартчан быдмӧг.

³⁰ Быд джек сулаліс нёль ыргӧн гӧгыль вылын, гӧгыль тасъясыс тшӧтш вӧліны ыргӧнысь. Джеклӧн нёльнан пельӧсас вӧліны тшупӧдъяс, на вылын сулаліс мыссян дозйыс. Тшупӧдъяссӧ вӧлі сывдӧма ыргӧнысь да серлӧдлӧма гартчан быдмӧгӧн.

³¹ Мыссян дозсӧ пуктӧм могысь джек шӧрын вӧлі ӧти гырддза джуджда гӧгрӧс кытш. Кытшыс пасьтанас вӧлі гырддза да джын, сійӧс вӧлі серлӧдлӧма. Ачыс джекыс эз вӧв гӧгрӧс, а вӧлі нёль пельӧса.

³² Джек дор пӧвъяс улас вӧлі нёль гӧгыль, гӧгыль чӧрссӧ вӧлі пысалӧма джек бердас. Быд гӧгыль вӧлі гырддза да джын ыджда.

³³ Гӧгыльясыс вӧліны тарантас гӧгыль кодьӧсь. Гӧгыль чӧрссӧ, кытшсӧ, тассӧ да трубичасӧ – ставсӧ вӧлі сывдӧма ыргӧнысь.

³⁴ Джеклӧн нёльнан пельӧсас чурвидзисны тшупӧдъяс, найӧс вӧлі ӧтторъя сывдӧма джекыскӧд.

³⁵ Мыссян дозсӧ пуктӧм могысь вӧчӧм кытшлӧн судтаыс джек веркӧссяньыс вӧлі гырддза джын. Джеклысь воропъяссӧ вӧлі ӧтторъя сывдӧма джекыскӧд.

³⁶ Джек воропъясӧ, джек дор пӧвъясӧ да быдлаӧ, кытчӧ позяна вӧлі, Хирам вундаліс херувим, лев да пальма серпасъяс, а джек гӧгӧрсӧ мичмӧдіс гартчан быдмӧг серпасӧн.

³⁷ Татшӧм джексӧ Хирам вӧчис дасӧс. Найӧ вӧліны ӧткодьӧсь да ӧтыдждаӧсь, быдӧнӧс вӧлі сывдӧма ӧтмоза.

³⁸ Хирам вӧчис ыргӧнысь дас мыссян доз. Быд дозйӧ тӧрис нелямын бат мында ва. Мыссян дозйыс вӧлі нёль гырддза ыджда. Быд джек вылын сулаліс ӧти мыссян доз.

³⁹ Вит джексӧ сувтӧдіс крам веськыдладорӧ, а мӧд витсӧ – крам шуйгаладорӧ. Вайӧртӧдсӧ сувтӧдіс крам веськыдладорӧ – асыв-лунвывла бокӧ.

⁴⁰ Хирам вӧчис мыссян дозъяс, пӧим куралан зыръяс, вир резан тасьтіяс – Господьлӧн крамса став дозмук-кӧлуйсӧ, мый сылы тшӧктіс вӧчны Соломон ӧксы.

⁴¹ Вӧчис кык ыджыд сюръя да сюръя йылас чаша сяма юръяс, найӧс кытшалӧм-вевттьӧм могысь чепъясысь вӧчис кык мичмӧдантор.

⁴² Мичмӧданторъяс вылас вӧчис гранат кодь нёльсё сяр – кык визьӧн быд мичмӧдантор вылӧ, медым вевттьыны сюръяяслысь юрсӧ.

⁴³ Вӧчис дас мыссян доз да на улӧ дас джек,

⁴⁴ вайӧртӧд да сы улын сулалысь дас кык ӧшкӧс,

⁴⁵ пӧим воръяс, пӧим куралан зыръяс да вир резан тасьтіяс. Став тайӧ дозмук-кӧлуйыс, мый Хирам вӧчис Соломон ӧксылы Господьлӧн крамӧ, вӧлі весалӧм-мольӧдӧм ыргӧнысь.

⁴⁶ Тайӧ дозмук-кӧлуйсӧ сывдісны-вӧчисны ӧксылӧн тшӧктӧм серти сёйӧд муын Йӧрдан ковтысын, Суккот да Цартан каръяс костын.

⁴⁷ Быд вӧчӧмтор Соломон пуктіс-сувтӧдіс ас местаӧ. Вӧчӧм дозмук-кӧлуйыс вӧлі сэтшӧм уна, мый весиг эз вермыны артавны, уна-ӧ ыргӧн муніс найӧс сывдӧм вылӧ.

⁴⁸ Таысь кындзи Господьлӧн крамӧ Соломон вӧчӧдіс уна мукӧдтор: зарни висьпуктанін, вежа няньлы зарни пызан

⁴⁹ да весалӧм зарниысь бикокъяс. Вит бикоксӧ сувтӧдіс Вежасьыс-вежаин водзӧ веськыдладорас, а мӧд витсӧ – шуйгаладорас. Нӧшта зарниысь Соломон вӧчӧдіс дзоридзьяс, би дозъяс да чепӧляяс,

⁵⁰ весалӧм зарниысь вӧчӧдіс тасьтіяс, пуртъяс, вир резан тасьтіяс, кӧшъяс да пӧим воръяс. Зарниысь вӧчисны тшӧтш крампытшкӧсса ӧдзӧсъяслысь дзирсӧ – Вежаинӧ да Вежасьыс-вежаинӧ пыран ӧдзӧсъяслысь дзирсӧ.

⁵¹ Господьлысь крам лэптӧмсӧ помалӧм бӧрын Соломон ӧксы вайис сэтчӧ Давид батьыслысь вежа козинъяс. Эзысь-зарни да дозмук-кӧлуйсӧ сійӧ пуктіс Господьлӧн крамса озырлун видзанінӧ.