Ӧксыяслӧн 3 небӧг 3 - Коми Библия 2023

Соломон корӧ Енлысь мывкыдлун

¹ Соломонлӧн юралӧмыс вӧлі зумыд. Соломон босьтіс гӧтырӧ египетса фараонлысь нывсӧ, тадзи найӧ рӧдвужасисны фараонкӧд. Гӧтырсӧ Соломон вайӧдіс Давид карӧ. Сэні гӧтырыс оліс, кытчӧдз Соломон эз лэпты Ерусалимын аслыс олан керка, Господьлы крам да Ерусалим гӧгӧр стен.

² Войтырыс важ мозыс мылькъяс вылын вайис висьяс, ӧд Господьлы крамсӧ абу на вӧлі лэптӧма.

³ Соломон радейтіс Господьӧс, оліс Давид батьыслӧн тшӧктӧмъяс серти, но мылькъяс вылын вайліс висьяс да тшынӧдчис.

⁴ Ӧтчыд Соломон муніс Гаваонӧ, мед вись вайны. Буретш сэні сулаліс медшӧр вись ваян мылькйыс. Сэні висьпуктанін вылын Соломон вайис сюрс мында сотан вись.

⁵ Войнас Гаваонын Соломонлы вӧтас петкӧдчис Господь Ен да шуис: «Кор Менсьым, мый кӧсъян, и Ме сета тэныд».

⁶ Соломон воча шуис: «Тэ вӧлін зэв бур сьӧлӧма менам Давид бать дінӧ, Аслад кесйӧг дінӧ, ӧд сійӧ оліс Тэнсьыд кывзысьӧмӧн да веськыда, ставсӧ вӧчис сӧстӧм сьӧлӧмӧн. Ассьыд ыджыд буралӧмтӧ Тэ эн вешты сы дінысь, Тэ сетін сылы пиӧс, коді ӧні пукалӧ сылӧн юралан пуклӧсын.

⁷ Господьӧй, менам Енмӧй, Тэ ӧксыӧ пуктін менӧ, Ассьыд кесйӧгтӧ, Давид батьӧй бӧрти. Но ме том на, веськӧдлынысӧ ог куж.

⁸ Тэнад бӧрйӧм войтырлӧн лыдыс сы мында, мый некод оз вермы лыддьыны-артавнысӧ, а Ме, тэнад кесйӧг – налӧн веськӧдлысь.

⁹ Сідзкӧ, сет меным сюсь вежӧр, медым ме веськыда мыжді Тэнсьыд войтыртӧ да кужи торйӧдны бурсӧ лёксьыс. Ӧд вермас-ӧ кодкӧ веськӧдлыны Тэнад уна лыда войтырӧн?»

¹⁰ Соломонлӧн корӧмыс воис Господьлы сьӧлӧм вылас.

¹¹ Ен шуис сылы: «Тэ эн кор аслыд кузь нэм, озырлун да вӧрӧгыдлы кулӧм, а корин сюсь вежӧр, медым веськыда мыждыны. Сыысь, мый тэнад вӧлі татшӧм кӧсйӧм,

¹² Ме вӧча тэнад корӧм серти. Ме сета тэныд ыджыд мывкыдлун да сюсь вежӧр. Тэ кодь мортыс эз вӧв, и тэ бӧрын оз ло.

¹³ Нӧшта Ме сета тэныд озырлун да нималӧм, мый тэ эн корлы. Тэнад олан лунъяс дырйи Тэ кодь ӧксыыс му вылас оз ло.

¹⁴ Тэ кӧ пондан ветлыны Менам туйӧд, овны Менам индӧд-тшӧктӧмъяс серти аслад Давид батьыд моз, сэки Ме нюжӧда тэнсьыд олан нэмтӧ».

¹⁵ Кор Соломон садьмис, сійӧ гӧгӧрвоис, мый тайӧ вӧлі вӧт. Сійӧ бӧр локтіс Ерусалимӧ, сэні муніс [висьпуктанін дорӧ] Господьлӧн Йитӧд куд водзӧ и вайис сотан да бурасян висьяс. Та бӧрын аслас кесйӧгъяслы вӧчис ыджыд гаж.

Соломонлӧн веськыда мыждӧм

¹⁶ Ӧтчыд Соломон ӧксы дінӧ локтісны кык кырсалысь ань да сувтісны ӧксы водзӧ.

¹⁷ Ӧтиыс шуис: «Ыджыдӧй! Тайӧ аньыскӧд ми олам ӧти керкаын. Сы дырйи ме чужті сэні ассьым кагаӧс.

¹⁸ Куим лун мысти сійӧ тшӧтш чужтіс. Миян кындзи керкаас некод эз вӧв, ми сӧмын кыкӧн вӧлім.

¹⁹ Войнас сылӧн кагаыс куліс, узигас мамыс лямӧдіс кагасӧ.

²⁰ Сэсся войнас менам узигкості сійӧ босьтіс менсьым кагаӧс аслас морӧс бердас, а ассьыс кулӧм кагасӧ пуктіс менам морӧс бердӧ.

²¹ Ме чеччи асывнас, мед вердны кагаӧс, и аддзи, мый сійӧ кулӧма. Сюся видзӧдалӧм бӧрын гӧгӧрвои, мый сійӧ абу менам пиӧй, кодӧс ме чужті».

²² Сэки мӧд аньыс воча шуис: «Ловъя кагаыс менам, а кулӧмаыс – тэнад». Тадзи найӧ вензисны ӧта-мӧдныскӧд ӧксы водзын.

²³ Ӧксы шуис: «Ӧтиыс шуӧ, ловъяыс пӧ менам, а кулӧмаыс пӧ тэнад. Мӧдыс шуӧ, абу пӧ тадз, кулӧмаыс – тэнад, а ловъяыс – менам».

²⁴ Сэсся ӧксы тшӧктіс вайны шыпурт, и сылы вайисны.

²⁵ «Керыштӧй ловъя кагасӧ шӧрипӧв да сетӧй ӧти джынсӧ ӧти аньыслы, а мӧд джынсӧ – мӧдыслы!» – тшӧктіс ӧксы.

²⁶ Ловъя кага мамлӧн сьӧлӧмас ыпнитіс муслун пиыс дінӧ. Сійӧ шуис ӧксылы: «Ыджыдӧй, сет ловъя кагасӧ тайӧ аньыслы. Эн ви сійӧс!» А мӧд аньыс шуис: «Керыштӧй сійӧс. Мед оз ло меным ни тэныд».

²⁷ Ӧксы шуис: «Энӧ виӧй кагасӧ. Сетӧй сійӧс мамыслы».

²⁸ Став Израиль войтыр кыліс ӧксылӧн веськыда мыждӧм йылысь. Ставнысӧ полӧм босьтіс ӧксыысь. Найӧ гӧгӧрвоисны, мый Енмыс сетӧма Соломонлы мывкыдлун, медым веськыда мыждыны.