Ӧксыяслӧн 3 небӧг 17 - Коми Библия 2023

Кырнышъяс вердӧны Илля пророкӧс

¹ Галаад муысь Тишби карысь Илля [пророк] шуис Ахавлы: «Ловъя Господь водзын, Израильлӧн Ен водзын, ме, сылӧн кесйӧг, кыв сета: локтан воясӧ лысва войт ни зэр тусь оз усь, кытчӧдз ме ог тшӧкты».

² Та бӧрын Иллялы вӧлі Господьсянь кыв:

³ «Мун татысь асыввылӧ да дзебсьы Йӧрдан мӧдлапӧлӧ Керит шор дорӧ.

⁴ Шорсьыс тэ пондан юны, а кырнышъяс кутасны вердны тэнӧ, кыдзи Ме тшӧкті налы».

⁵ Илля вӧчис Господьлӧн тшӧктӧм серти: муніс Йӧрдан мӧдлапӧлӧ Керит шор дорӧ да кольччис сэтчӧ.

⁶ Кырнышъяс быд асыв да рыт вайлісны Иллялы нянь да яй, а васӧ сійӧ юис шорсьыс.

Илля сарептаса дӧва ордын

⁷ Кад мысти шорыс косьмис, ӧд эз вӧв зэрыс.

⁸ Иллялы вӧлі Господьсянь кыв:

⁹ «Мун Сидон муӧ да кольччы Сарепта карӧ. Ме тшӧкті ӧти дӧвалы сэні вердны-юктавны тэнӧ».

¹⁰ Илля муніс Сарепта карӧ. Карса дзиръя дорӧ матыстчигӧн сійӧ аддзис пес чукӧртысь дӧваӧс. Илля корис аньӧс да шуис: «Вай меным юыштны гырничсьыд ватӧ».

¹¹ Мӧдыс муніс гырничысла. А Илля бӧрсяньыс горӧдіс: «Босьт аскӧдыд тшӧтш няньтор!»

¹² Ань вочавидзис: «Тэнад ловъя Господь Ен водзын шуа: некутшӧм пӧжас менам абу, сӧмын дозмукын ки тыр пызь да дозйын этшаник вый. Ӧні чукӧртышта пес, сэсся муна да пӧжала няньтор аслым да пилы. Няньторсӧ сёйыштам, дай кулам».

¹³ Илля шуис аньлы: «Эн пов. Мун да вӧч, мый шуин, но медводз пӧжав ичӧтик сӧчӧн да вай меным. Аслыд да пиыдлы бӧрыннас пӧжалан.

¹⁴ Ӧд Господь, Израильлӧн Ен, тадзи висьталӧ: ”Пызьыд тэнад дозмукысь оз быр, и выйыд дозсьыд оз чин, кытчӧдз Господь оз сет зэрсӧ му вылӧ”».

¹⁵ Дӧва муніс да вӧчис Иллялӧн шуӧм серти. Тайӧ лунсяньыс аньлӧн тырмана вӧлі сёяныс аслыс, Иллялы да гортсаыслы.

¹⁶ Пызьыс дозмуксьыс эз бырлы, и выйыс дозъяс эз чинлы. Тадзи иніс Господьлӧн шуӧмыс, мый Сійӧ висьталіс Илля пыр.

Илля ловзьӧдӧ дӧвалысь писӧ

¹⁷ Кад мысти дӧва аньлӧн, код ордын оліс Илля, зэв ёна висьмис пиыс. Кор сійӧ дугдіс лолавнысӧ,

¹⁸ дӧва шуис Иллялы: «Мый тэныд месянь колӧ, Енлӧн мортӧй? Тэ локтін, медым казьтыштны меным мыжъясӧс да вины пиӧс».

¹⁹ Илля шуис дӧвалы: «Вай меным питӧ». Сійӧ босьтіс зонкаӧс мам ки вывсьыс, катӧдіс сійӧс вылыс судтаас аслас олан жырйӧ да пуктіс вольпасяс.

²⁰ Сэсся шыасис Господь дінӧ: «Господьӧй, менам Енмӧй! Тэ ӧмӧй вӧчан лёксӧ тайӧ дӧваыслы, код ордын ме ола, да босьтан сылӧн пиыслысь олӧмсӧ?»

²¹ Зонка весьтӧ куимысь нюжӧдчылӧм бӧрти Илля шыасис Господь дінӧ: «Господьӧй, менам Енмӧй! Зонкалӧн лолыс мед бӧр пырас сы пытшкӧ!»

²² Господь кыліс Илляӧс. Зонкалӧн лолыс бӧр пырис сы пытшкӧ, и сійӧ ловзис.

²³ Илля лэччӧдіс зонкаӧс аслас жырйысь улыс судтаас, сетіс сійӧс мамыслы да шуис: «Видзӧд, тэнад пиыд ловъя».

²⁴ Дӧва вочавидзис Иллялы: «Ӧні ме тӧда, мый тэ Енлӧн морт, и Господь збыльысь сёрнитӧ тэ пыр».