Ӧксыяслӧн 3 небӧг 15 - Коми Библия 2023

Иуда муын Авийлӧн ӧксыалӧм

¹ Израильса Еровам ӧксылӧн, Неват пилӧн, дас кӧкъямысӧд веськӧдлан воӧ Иуда муын ӧксыӧ пуксис Авий.

² Куим во чӧж сійӧ юраліс Ерусалимын. Авийлӧн мамыс вӧлі Маака, Авессаломлӧн нылыс.

³ Авий вӧчис сійӧ жӧ мыжъяссӧ, мый вӧчліс сылӧн батьыс. Авийлӧн сьӧлӧмыс эз вӧв йитчӧма аслас Господь Енкӧд сідзи, кыдзи вӧлі Давид пӧльыслӧн.

⁴ Но Давид вӧсна Господь, сылӧн Енмыс, колис ӧзъявны Ерусалимын бисӧ – Авий бӧрти пуктіс ӧксыӧ сылысь писӧ да зумыдмӧдіс Ерусалим кар.

⁵ Ӧд Давид вӧчис Господь водзын шогманасӧ, став олӧм чӧжыс сійӧ эз кежлыв Господьлӧн тшӧктӧмъясысь, сы кындзи, мый вӧчис хеттей Урийлы.

⁶ Авийлӧн став олӧм чӧжыс Ровоамлӧн рӧдыс да Еровам ӧксы костын муніс тыш.

⁷ Авий ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ. Авий да Еровам костын муніс тыш.

⁸ Сэсся Авий куліс да вуджис батьясыс дінӧ. Сійӧс дзебисны Давид карӧ. Авий бӧрти ӧксыӧ пуксис сылӧн Аса пиыс.

Иуда муын Асалӧн ӧксыалӧм

⁹ Израильса Еровам ӧксылӧн кызьӧд веськӧдлан воӧ Иуда муын ӧксыӧ пуксис Аса.

¹⁰ Нелямын ӧти во чӧж сійӧ юраліс Ерусалимын. Сылӧн пӧчыс вӧлі Маака, Авессаломлӧн нылыс.

¹¹ Давид пӧльыс моз Аса вӧчис Господь водзын шогманасӧ.

¹² Аса вӧтлаліс аслас муысь юрбитанінъясын кырсалысьясӧс, жугліс бӧлбанъясӧс, кодъясӧс вӧчлісны сылӧн батьясыс.

¹³ Аслас Маака пӧчыслы Аса эз лэдз водзӧ лоны ӧксы-мамӧн, ӧд сійӧ сувтӧдіс Астарталы сиӧм зывӧк бӧлбанӧс. Аса кераліс тайӧ зывӧк бӧлбансӧ да сотіс сійӧс Кедрон ковтысын.

¹⁴ Вись ваян мылькъяссӧ эз бырӧдны, но та вылӧ видзӧдтӧг Асалӧн сьӧлӧмыс вӧлі йитчӧма Господькӧд став олӧм чӧжыс.

¹⁵ Сійӧ вайис Господьлӧн крамӧ ассьыс да батьыслысь вежӧдӧм эзысь-зарнисӧ да дозмук-кӧлуйсӧ.

¹⁶ Аса да израильса Ваас ӧксы костын олӧм чӧжныс муніс тыш.

¹⁷ Израильса Ваас ӧксы уськӧдчис Иуда му вылӧ да лэптіс Рамаын изкар, медым некод эз вермы пырны Иуда муӧ Аса ӧксы дінӧ либӧ петны сы дінысь.

¹⁸ Аса босьтіс Господьлӧн крамса да ӧксы керкаса озырлун видзанінъясысь коляс эзысь-зарнисӧ да мӧдӧдіс ассьыс кесйӧгъяссӧ нуны ставсӧ Дамаскӧ арамейяслӧн Бен-Хадад ӧксылы, Хезион Тавриммонлӧн пиыслы. Тшӧктіс висьтавны сылы:

¹⁹ «Тэа-меа костын йитӧдным мед лоӧ миян батьяслӧн кодь. Тайӧ эзысь-зарнисӧ ме ыста тэныд козин пыдди. Орӧд израильса Ваас ӧксыкӧд йитӧдтӧ, медым сійӧ ылыстчас менам муысь».

²⁰ Бен-Хадад вӧчис Аса ӧксылӧн корӧм серти. Сійӧ мӧдӧдіс аслас тышкайӧзӧн веськӧдлысьясӧс израильса каръяслы паныд тышӧ. Найӧ пасьвартісны Ийон, Дан да Авел-Бет-Маака каръяс, Киннерет ты гӧгӧрысь муяс да став Неффалим му.

²¹ Ваас кор кыліс та йылысь, сійӧ дугдіс лэптыны Рама изкар да бӧр муніс Тирза карӧ.

²² Аса ӧксы чукӧртіс став Иуда войтырсӧ. Найӧ петкӧдісны Рама карысь став изсӧ да керсӧ, мыйысь Ваас вӧлі лэптӧма изкар. Тайӧ изсьыс да керсьыс Аса ӧксы лэптіс Венямин муын Гева да Миспа изкаръяс.

²³ Аса ӧксыалӧм дырйи мукӧд лоӧмторъяс йылысь, сылӧн тӧдчана уджъяс йылысь да сыӧн лэптӧм каръяс йылысь гижӧма иудаса ӧксыяслӧн каднебӧгӧ. Пӧрысь кадас сылӧн ёна висис кокыс.

²⁴ Аса куліс да вуджис батьясыс дінӧ. Сійӧс дзебисны Давид пӧльыслӧн карӧ батьясыскӧд орччӧн. Аса бӧрти ӧксыӧ пуксис сылӧн Иосафат пиыс.

Израиль муын Надавлӧн ӧксыалӧм

²⁵ Иудаса Аса ӧксылӧн мӧд веськӧдлан воӧ Израиль муын ӧксыӧ пуксис Еровамлӧн Надав пиыс. Кык во чӧж сійӧ юраліс Израильын.

²⁶ Надав вӧчис Господь водзын шогмытӧмсӧ, ветліс батьыслӧн туйӧд да сы моз вӧчис мыж. Аслас мыж вӧчӧмнас сылӧн батьыс коркӧ кежӧдіс Израиль войтырӧс мыжас.

²⁷ Иссакар чужанкотырысь Ахийлӧн Ваас пиыс гусьӧн кыпӧдчис Надавлы паныд да виис сійӧс филистимса Гиббетон карын. Буретш сэки Надав израильса тышкайӧзкӧд вӧлі кытшалӧны Гиббетон кар.

²⁸ Надавӧс виӧм бӧрын Ваас пуксис сы пыдди ӧксыӧ. Тайӧ вӧлі иудаса Аса ӧксылӧн коймӧд веськӧдлан воӧ.

²⁹ Ӧксыӧ пуксьӧм бӧрын Ваас бырӧдіс Еровамлысь став рӧдсӧ, некодӧс ловйӧн эз коль. Тадзи иніс Господьлӧн шуӧмыс, мый Сійӧ висьталіс Аслас силомса Ахий кесйӧг пыр.

³⁰ Еровамлысь рӧдсӧ вӧлі бырӧдӧма сы вӧсна, мый Еровам мыж вӧчис да кежӧдіс Израиль войтырӧс мыжас, и тадзи скӧрмӧдіс Господьӧс, Израильлысь Енсӧ.

³¹ Надав ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.

³² Аса да израильса Ваас ӧксы костын олӧм чӧжныс муніс тыш.

Израиль муын Вааслӧн ӧксыалӧм

³³ Иудаса Аса ӧксылӧн коймӧд веськӧдлан воӧ Израиль муын ӧксыӧ пуксис Ахийлӧн Ваас пиыс. Кызь нёль во чӧж сійӧ юраліс Тирза карын.

³⁴ Сійӧ вӧчис Господь водзын шогмытӧмсӧ, ветліс Еровамлӧн туйӧд да сы моз вӧчис мыж. Аслас мыж вӧчӧмнас Еровам коркӧ кежӧдіс Израиль войтырӧс мыжас.