Ӧксыяслӧн 3 небӧг 1 - Коми Библия 2023

Давидлӧн пӧрысь кад

¹ Давид ӧксы пӧрысьмис, вӧлі ыджыд арлыда нин. Ӧксыӧс вевттялісны-поньталісны шебрасъясӧн, но сійӧ некыдз эз вермы шонавны.

² Сэки кесйӧгъясыс шуисны сылы: «Ӧксыӧй-ыджыдӧй, лэдз миянлы корсьны тэныд том нылӧс. Сійӧ кутас кесъявны тэныд, тӧждысьны-видзӧдны тэ бӧрся да орччӧн куйлыны тэкӧд, медым тэныд, ӧксыӧй-ыджыдӧй, вӧлі шоныд».

³ Став Израиль му пасьтала корсисны мича нылӧс. Шунем карысь аддзисны Ависага нима нылӧс да вайӧдісны сійӧс ӧксы дінӧ.

⁴ Ависага вӧлі зэв мича. Сійӧ кутіс кесъявны ӧксылы да тӧждысьны сы вӧсна, но ӧксы эз вӧрӧдлы нылӧс вольпасяс.

Адоний зільӧ пуксьыны ӧксыӧ

⁵ Адоний, кодлӧн мамыс вӧлі Агита, асьсӧ вылӧ пуктіс да шуаліс, ме пӧ лоа ӧксыӧн. Сійӧ лӧсьӧдіс аслыс тарантасъяс, верзьӧмаясӧс да ветымын тышкамортӧс, кодъяс ветлісны сы водзвылын да видзисны сійӧс.

⁶ Давид некор эз шуасьлы Адоний пиыс вылӧ да эз ӧлӧдлыв сійӧс. Адоний вӧлі зэв мича, Давидлӧн сійӧ чужис Авессалом бӧрся.

⁷ Адоний сёрнитчис Саруялӧн Йоав пикӧд да Авиатар попкӧд, и найӧ вӧліны Адоний дор.

⁸ Но Садок поп, Иодайлӧн Бенай пиыс, Нафан пророк, Шимей, Рей да Давидлӧн вына тышкасьысьяс эз вӧвны Адоний дор.

⁹ Рогель ва петанінсянь матын Зохелет из дорын Адоний начкис ыжъясӧс, ӧшъясӧс да тшӧгӧдӧм куканьясӧс вись вайӧм могысь. Корис сэтчӧ ассьыс вокъяссӧ – ӧксылысь пиянсӧ – да Иуда му пасьталаысь ӧксылысь чина йӧзсӧ.

¹⁰ А пророк Нафанӧс, Бенайӧс, ӧксылысь вына тышкасьысьяссӧ да ассьыс Соломон воксӧ сійӧ эз кор.

¹¹ Нафан шуис Вирсавиялы, Соломонлӧн мамлы: «Тэ кывлін, мый Агиталӧн Адоний пиыс пуксьӧма ӧксыӧ, а Давид ыджыдным оз и тӧд та йылысь?

¹² Видз ассьыд олӧмтӧ да Соломон пиыдлысь олӧмсӧ. Со мый ме вӧзъя тэныд.

¹³ Мун Давид ӧксы дінӧ да шу сылы: ”Ӧксыӧй-ыджыдӧй, тэ кыв сетлін меным, аслад кесйӧглы, мый менам Соломон пиӧй лоӧ ӧксыӧн тэ бӧрти да пуксяс тэнад юралан пуклӧсӧ. Мыйла нӧ Адоний лои ӧксынас?”

¹⁴ А тэнад сёрнитігкості ме пыра ӧксы дінӧ да сувта тэ дор».

¹⁵ Вирсавия муніс да пырис ӧксылӧн узьлан жырйӧ. Шунем карысь Ависага тӧждысис сэні пӧрысь Давид бӧрся.

¹⁶ Вирсавия копыртчис ӧксы водзӧ. Ӧксы юаліс: «Кутшӧм могӧн локтін?»

¹⁷ «Ыджыдӧй, – шыасис Вирсавия, – аслад Господь Ен водзын тэ кыв сетлін меным, аслад кесйӧглы, мый менам Соломон пиӧй лоӧ ӧксыӧн тэ бӧрти да пуксяс тэнад юралан пуклӧсӧ.

¹⁸ Но талун Адоний пуксьӧма ӧксыӧ, а тэ, ӧксыӧй-ыджыдӧй, весиг он тӧд та йылысь.

¹⁹ Вись вайӧм могысь сійӧ начкӧма уна ӧшкӧс, куканьӧс да ыжӧс. Корӧма Авиатар попӧс, тышкайӧзӧн веськӧдлысь Йоавӧс да тэнсьыд пиянтӧ. Но тэнсьыд Соломон питӧ, коді кесъялӧ тэныд, сійӧ абу корӧма.

²⁰ Ӧксыӧй-ыджыдӧй, став Израиль войтыр видзӧдӧ тэ вылӧ да виччысьӧ, кодлы тэ шуан пуксьыны ас бӧртиыд юралан пуклӧсад.

²¹ Он кӧ ӧні вӧч тайӧс, ӧксыӧй-ыджыдӧй, тэнад кулӧм бӧрын, кор тэ вуджан батьясыд дінӧ, мыжаласны менӧ да менсьым Соломон пиӧс».

²² Вирсавиялӧн ӧксыкӧд сёрнитігкості локтіс Нафан пророк.

²³ Ӧксылы юӧртісны, Нафан пророк пӧ локтіс. Нафан пырис ӧксы дінӧ, муӧдзыс копыртчылӧмӧн

²⁴ шуис сылы: «Ӧксыӧй-ыджыдӧй, збыльысь-ӧ тэ шулін, мый Адоний лоӧ ӧксыӧн тэ бӧрти да пуксяс тэнад юралан пуклӧсӧ?

²⁵ Талун сійӧ мунӧма да вись вайӧм могысь начкӧма уна ӧшкӧс, куканьӧс да ыжӧс. Корӧма сэтчӧ, ӧксыӧй, став тэнсьыд пиянтӧ, тышкайӧзӧн веськӧдлысьясӧс да Авиатар попӧс. Ӧні найӧ ставныс сёйӧны-юӧны да шуалӧны: ”Мед олас Адоний ӧксы!”

²⁶ А менӧ, тэнсьыд кесйӧгтӧ, Садок попӧс, Иодайлысь Бенай писӧ да тэнсьыд Соломон питӧ, коді кесъялӧ тэныд, сійӧ эз кор.

²⁷ Ӧксыӧй-ыджыдӧй, тэнад кӧсйӧм серти-ӧ тадзи вӧчӧны? Мыйла тэ меным, аслад кесйӧглы, эн висьтав, коді тэ бӧрти кутас пукавны тэнад юралан пуклӧсад?»

²⁸ Давид ӧксы пырысьтӧм-пыр тшӧктіс корны ас дінас Вирсавияӧс. Вирсавия пырис да сувтіс ӧксы водзӧ.

²⁹ Ӧксы кыв сетіс сылы: «Ловъя Господь водзын, коді мездыліс менӧ быд лёксьыс,

³⁰ ме збыльмӧда талун сійӧ, мый йылысь коркӧ кыв сеті тэныд Израильлӧн Господь Ен водзын – Соломон пиыд лоӧ ӧксыӧн ме бӧрти да пуксяс менам юралан пуклӧсӧ».

³¹ Вирсавия муӧдзыс копыртчылӧмӧн шуис ӧксылы: «Мед олас нэмъяс чӧж Давид ӧксы, менам ыджыдӧй!»

Соломонӧс ӧксыӧ пуктӧм

³² Давид ӧксы тшӧктіс корны ас дінас Садок попӧс, Нафан пророкӧс да Иодайлысь Бенай писӧ. Кор найӧ локтісны,

³³ ӧксы шуис налы: «Босьтӧй аскӧдныд менсьым кесйӧгъясӧс, а Соломон пиӧс пуксьӧдӧй менам мул вылӧ да нуӧдӧй сійӧс Гихон ва петанін дорӧ.

³⁴ Сэні Садок поп да Нафан пророк мед мавтыштӧмӧн пуктасны сійӧс ӧксыӧ Израильлы. Сэсся буксан шы улӧ гораа горзӧй: ”Мед олас Соломон ӧксы!”

³⁵ Та бӧрын бӧр вайӧдӧй Соломонӧс. Сійӧ мед пуксяс менам юралан пуклӧсӧ да ӧксыалас ме пыдди. Тайӧ менам кӧсйӧм, мед сійӧ лоӧ ӧксынас Израиль да Иуда войтырлы».

³⁶ Иодайлӧн Бенай пиыс воча шуис Давид ӧксылы: «Мед лоас тадзи! Тэнсьыд шуӧмтӧ, ӧксыӧй-ыджыдӧй, мед вынсьӧдас Господь, тэнад Ен!

³⁷ Кыдзи Господь Ен вӧлі менам ӧксы-ыджыдкӧд, тадзи Сійӧ мед тшӧтш лоӧ Соломонкӧд! Господь мед зумыдмӧдас сылысь юралӧмсӧ Давид ӧксылӧн, менам ыджыдӧйлӧн, юралӧм дорысь ёнджыка на!»

³⁸ Садок поп, Нафан пророк, Иодайлӧн Бенай пиыс и ӧксыӧс видзысь керетсаяс да пелетсаяс мунісны, пуксьӧдісны Соломонӧс Давид ӧксылӧн мул вылӧ да нуӧдісны Гихон ва петанін дорӧ.

³⁹ Садок поплӧн вӧлі вежа чомйысь босьтӧм вый тыра доз. Сійӧ мавтыштіс Соломонӧс. Буксан шы улӧ став войтырыс гораа горзіс: «Мед олас Соломон ӧксы!»

⁴⁰ Войтырыс восьлаліс Соломон бӧрся. Найӧ ворсісны пӧлянӧн да ёна нимкодясисны, налӧн горзӧмысь весиг муыс вӧрис.

⁴¹ Кор Адоний аслас корӧмаяскӧд помалісны сёйны-юны, найӧ кылісны тайӧ горзӧмсӧ. Буксан шы кылӧм бӧрын Йоав юаліс: «Мыйысь карыс татшӧма шызьӧма?»

⁴² Сылӧн сёрнитігкості локтіс Авиатар поплӧн Ионафан пиыс. Адоний шуис сылы: «Лок, пыр. Тэ веськыд морт, тэ ваян бур юӧръяс».

⁴³ Ионафан вочавидзис: «Ӧні ог. Давид ӧксы, миян ыджыдным, пуктіс Соломонӧс ӧксыӧ.

⁴⁴ Сійӧ мӧдӧдіс Соломон дінӧ Садок попӧс, Нафан пророкӧс, Иодайлысь Бенай писӧ, керетсаясӧс да пелетсаясӧс. Найӧ пуксьӧдісны Соломонӧс ӧксылӧн мул вылӧ.

⁴⁵ Сэсся Гихон ва петанін дорын Садок поп Нафан пророккӧд мавтыштӧмӧн пуктісны сійӧс ӧксыӧ. Бӧрсӧ найӧ локтісны ёна нимкодясьӧмӧн, и карыс ставнас шызис. Тайӧ шысӧ ӧні ті и кыланныд.

⁴⁶ Соломон пукалӧ нин юралан пуклӧсас.

⁴⁷ Сылӧн кесйӧгъясыс ветлісны чолӧмавны Давид ӧксыӧс, миянлысь ыджыднымӧс. Найӧ шуӧмаӧсь Давидлы, тэнад Енмыд пӧ мед нимӧдас Соломонӧс тэ дорысь ёнджыка на да зумыдмӧдас сылысь юралӧмсӧ тэнад юралӧм дорысь ёнджыка на. Вольпасяс ӧксы Енлы копыртчӧмӧн

⁴⁸ шуӧма, ошкӧма пӧ Господьӧс, Израильлысь Енсӧ, коді талун сетіс меным аддзыны [месянь чужысьӧс,] менам юралан пуклӧсын пукалысьӧс».

⁴⁹ Адонийлӧн корӧмаяс ёна повзисны. Найӧ чеччисны да ӧдйӧ разӧдчисны.

⁵⁰ Адонийӧс полӧм босьтіс Соломонысь. Сійӧ котӧрӧн муніс висьпуктанін дорӧ да шашаритчис висьпуктанін сюръясӧ.

⁵¹ Соломонлы юӧртісны: «Адоний полӧ тэысь, ӧксыӧй. Сійӧ шашаритчӧма висьпуктанін сюръясӧ да шуалӧ: ”Соломон ӧксы мед кыв сетас меным, мый оз ви шыпуртӧн менӧ, ассьыс кесйӧгсӧ”».

⁵² Соломон вочавидзис: «Сійӧ кӧ лоӧ веськыд мекӧд, сылӧн ӧти юрси сі оз усь юр вывсьыс. А кутас кӧ пӧръясьны, кулас».

⁵³ Соломон ӧксы мӧдӧдіс йӧзӧс Адонийла, и найӧ вайӧдісны сійӧс висьпуктанін дорысь. Адоний пырис Соломон ӧксы дінӧ да копыртчис сылы. Соломон шуис: «Мун гортад».