Ӧксыяслӧн 2 небӧг 8 - Коми Библия 2023

Давидлӧн вермӧмъяс

¹ Кад мысти Давид пасьвартіс филистимсаясӧс, босьтіс налысь Метег-Ха-Амма. Филистимсаяс шедісны Давидлӧн кипод улӧ.

² Давид пасьвартіс тшӧтш моавсаясӧс. Тыш помасьӧм бӧрын сійӧ водтӧдіс найӧс му вылас, босьтіс гез да мурталіс: быд кык гез кузьта мурталӧмаясӧс виис, а ӧти гез кузьта мурталӧмаясӧс ловйӧн колис. Моавсаяс лоисны Давидлы кесйӧгъясӧн, мынтісны сылы вот.

³ Давид пасьвартіс и цоваса ӧксыӧс, Реховлысь Ададезер писӧ. Сійӧ буретш вӧлі мунӧ, медым бӧр босьтны Ефрат ю дорысь муяссӧ.

⁴ Давид босьтіс сылысь сюрс сизимсё верзьӧмаӧс да кызь сюрс подаӧс. Давид кольӧдіс аслыс тарантаса сё вӧлӧс, а мукӧд вӧлыслысь сӧнсӧ сійӧ вундаліс.

⁵ Цоваса Ададезер ӧксылы отсӧг вылӧ локтісны Дамаскысь арамейяс. Но Давид пасьвартіс найӧс, виис кызь кык сюрс мортӧс.

⁶ Дамаскӧ Давид сувтӧдаліс ассьыс тышкакотыръяссӧ. Тадзи арамейяс шедісны Давидлӧн кипод улӧ да кутісны мынтыны сылы вот. Господь быд тышын отсаліс Давидлы вермыны.

⁷ Давид босьтіс Ададезер тышкайӧзлысь зарни сайӧдъяссӧ да вайис Ерусалимӧ. [Бӧрынджык найӧс босьтіс египетса Шишак ӧксы, кор сійӧ уськӧдчис Ерусалим вылӧ. Тайӧ вӧлі Соломонлӧн Ровоам пилӧн веськӧдлӧм дырйи.]

⁸ Бетаысь да Беротайысь, Ададезерлӧн каръясысь, Давид ӧксы вайис зэв уна ыргӧн. [Сыысь Соломон вӧчӧдіс вайӧртӧд, сюръяяс, мыссян дозъяс да мукӧд дозъяс.]

⁹ Хаматса Тойи ӧксылы кывсис, мый Давид кушӧдз пасьвартӧма Ададезерлысь тышкайӧзсӧ.

¹⁰ Сэки сійӧ мӧдӧдіс ассьыс Иорам писӧ Давид ӧксы дінӧ, мед чолӧмавны да аттьӧавны сійӧс Ададезерӧс вермӧмысь. Ӧд Ададезер дугдывтӧг тышкасис Тойикӧд. Аскӧдыс Иорам вайис эзысь, зарни да ыргӧн дозъяс.

¹¹ Давид ӧксы вежӧдіс-торйӧдіс найӧс Господьлы. Нӧшта вежӧдіс мукӧд пасьвартӧм войтыръяслысь босьтӧм эзысь да зарни.

¹² Эзысь-зарнисӧ сійӧ босьтіс арамей, моав, аммон, филистим да амалик войтыръяслысь, нӧшта цоваса Ададезер ӧксылысь, Реховлӧн пилысь.

¹³ Давид кутіс нимавны, кор сійӧ вермис Сола ковтысын дас кӧкъямыс сюрс эдомса тышкамортӧс.

¹⁴ Став Эдом пасьтала сійӧ сувтӧдаліс тышкакотыръяс. Эдомсаяс шедісны Давидлӧн кипод улӧ. Господь быд тышын отсаліс Давидлы вермыны.

¹⁵ Давид ӧксыаліс став Израиль муын. Ассьыс войтырсӧ мыждігӧн сійӧ быдӧнкӧд вӧлі веськыд.

¹⁶ Саруялӧн Йоав пиыс веськӧдліс Давидлӧн тышкайӧзӧн, Ахилудлӧн Иосафат пиыс пасъяліс небӧгӧ вӧвлӧмторъяс.

¹⁷ Ахитувлӧн Садок пиыс да Авиатарлӧн Ахимелек пиыс вӧліны попъясӧн, Серай вӧлі гижалысьӧн.

¹⁸ Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн. Давид ӧксылӧн пияныс отсасисны сылы юралӧмын.