Ӧксыяслӧн 2 небӧг 5 - Коми Библия 2023

Давидӧс пуктӧны став Израиль войтырлы ӧксыӧ

¹ Израильса чужанкотыръяс локтісны Давид дінӧ Хевронӧ. Найӧ шуисны: «Миян пытшкын визувтӧ ӧти вир.

² Водзын, кор Саул вӧлі миян ӧксыӧн, Израиль войтыркӧд тэ ветлывлін тышъясӧ. Господь шуліс тэныд: ”Тэ кутан видзны Менсьым Израиль войтырӧс да лоан налы юралысьӧн”».

³ Хевронын Господь водзын Давид кӧрталіс израильса юрнуӧдысьяскӧд йитӧд. Найӧ мавтыштӧмӧн пуктісны Давидӧс Израиль войтырлы ӧксыӧ.

⁴ Ӧксыӧ пуксигас Давидлы вӧлі комын арӧс. Сійӧ ӧксыаліс нелямын во чӧж.

⁵ Сизим во да джын сійӧ юраліс Хевронын, вӧлі Иуда войтырлы ӧксыӧн. Сэсся комын куим во юраліс Ерусалимын, вӧлі ӧксыӧн став Израиль да Иуда войтырлы.

⁶ Ӧтчыд Давид ӧксы аслас тышкайӧзкӧд петіс тышӧ Ерусалимын олысь евуссаяслы паныд. Найӧ шуисны Давидлы: «Татчӧ тэ он пыр. Пыран кӧ, тэнӧ вӧтласны весиг синтӧмъяс да коктӧмъяс». Тадзи шуалісны, ӧд чайтісны, мый Давид оз вермы пырны налӧн изкарӧ.

⁷ Но Давид босьтіс Сион изкар. Бӧрынджык изкарсӧ нимтісны Давид карӧн.

⁸ Евуссаяскӧд тышкасигӧн Давид шуис аслас йӧзлы: «Бытшйӧдлӧй шынад быд коктӧмӧс да синтӧмӧс, кодъяс мустӧмтӧны Давидӧс». Та вӧсна и шуӧны: «Синтӧмъяс да коктӧмъяс оз пырны [Господьлӧн] керкаӧ».

⁹ Давид овмӧдчис изкарӧ да нимтіс сійӧс Давид карӧн. Миллосянь кар шӧрӧдзыс Давид лэптіс керкаяс.

¹⁰ Господь Ен Саваоф вӧлі Давидкӧд, та вӧсна сійӧ лои вына юралысьӧн.

¹¹ Тирса Хирам ӧксы мӧдӧдіс аслас йӧзкӧд Давидлы сус пуяс, тшӧтш тшупсьысьясӧс да изйысь вӧчасьысьясӧс. Найӧ лэптісны Давидлы ыджыд керка.

¹² Давидлы вӧлі гӧгӧрвоана, мый Аслас Израиль войтыр вӧсна Господь пуктіс сійӧс ӧксыӧ да зумыдмӧдіс сылысь юралӧмсӧ Израильын.

¹³ Хевронысь Ерусалимӧ локтӧм бӧрын Давид босьтіс сэтчӧс аньяс пиысь нӧшта аслыс гӧтыръясӧс.

¹⁴ Сылӧн чужисны нӧшта на ныв-пи. Ерусалимын сылӧн чужисны Шаммуй, Шовав, Нафан, Соломон,

¹⁵ Ивхар, Элишуй, Нефег, Яфий,

¹⁶ Элишам, Элиад да Элипелет пиян. [Нӧшта чужисны Самай, Иосиват, Нафан, Галаман, Евар, Фейсус, Элфалат, Нагев, Нафек, Ионафан, Лесамис, Ваалимаф да Элифаф пиян.]

Давид вермӧ филистимсаясӧс

¹⁷ Кор филистимсаяс тӧдмалісны, мый Давидӧс мавтыштӧмӧн пуктӧма ӧксыӧ Израиль войтырлы, сэки петісны корсьны сійӧс. Та йылысь кылӧм бӧрын Давид муніс изкарӧ.

¹⁸ Филистимсаяс локтісны да сувтісны Рефаим ковтысӧ.

¹⁹ Давид шыасис Господь дінӧ да юаліс: «Петны-ӧ меным филистимсаяслы паныд тышӧ? Сетан-ӧ Тэ найӧс менам киӧ?» Господь вочавидзис: «Пет. Ме сета филистимсаясӧс тэнад киӧ».

²⁰ Сэки Давид муніс Ваал-Перацимӧ да пасьвартіс сэні филистимсаясӧс. Давид шуис: «Ытва моз Господь нуис-бырӧдіс ме водзысь вӧрӧгӧс». Та вӧсна тайӧ местаыслы сетӧма Ваал-Перацим ним.

²¹ Филистимсаяс колисны сэтчӧ ассьыныс бӧлбанъяссӧ, а Давид аслас йӧзкӧд босьтіс найӧс. [Сэсся тшӧктіс сотны биын.]

²² Кад мысти филистимсаяс бара локтісны да сувтісны Рефаим ковтысӧ.

²³ Давид шыасис Господь дінӧ. [Шуис: «Петны-ӧ меным филистимсаяслы паныд тышӧ? Сетан-ӧ найӧс менам киӧ?»] Господь шуис: «Воча налы эн пет. Кытшав найӧс бӧрсяньныс да матыстчы на дінӧ пуяс сайсянь.

²⁴ Кор тэ кылан шы, быттьӧ пуяс йывті кодкӧ восьлалӧ, сэки уськӧдчы. Тӧд, мый Господь мунӧ тэ водзвылын, медым пасьвартны филистимса тышкайӧзӧс».

²⁵ Давид вӧчис, кыдзи тшӧктіс сылы Господь. Сійӧ пасьвартіс филистимсаясӧс Гевасянь Гезерӧдз.