Ӧксыяслӧн 2 небӧг 4 - Коми Библия 2023

Ишвошетӧс виӧм

¹ Кор Сауллӧн Ишвошет пиыс тӧдмаліс, мый Авенир кулӧма Хевронын, ёна повзис. Став Израиль войтырӧс тшӧтш полӧм босьтіс.

² Ишвошетлӧн вӧлі тышкайӧзӧн кык веськӧдлысь: ӧтисӧ шуисны Баан, мӧдсӧ – Рекав. Найӧ вӧліны Венямин чужанкотырысь, беротса Риммонлӧн пиян. Берот кар вуджис Венямин чужанкотырлы,

³ кор сэтчӧс олысьяс пышйисны Гиттаймӧ. Найӧ ӧнӧдз сэні олӧны.

⁴ Ионафанлӧн, Саул пилӧн, вӧлі Мепибошет нима чотысь пи. Сылы вӧлі вит арӧс, кор воис Изреельсянь Сауллӧн да Ионафанлӧн кулӧм йылысь юӧр. Сэки кага видзысь кватитіс ичӧт зонкаӧс да котӧрӧн пышйис. Котӧртігас зонкаӧс уськӧдіс, та бӧрын сійӧ кутіс чотны.

⁵ Рекав да Баан, беротса Риммонлӧн пиян, мунісны Ишвошет дінӧ. Локтісны сэтчӧ луншӧрнас, лёк жар дырйиыс, кор Ишвошет шойччис вольпась вылас.

^6-7 [Керка видзысьыс шобді тусь весалігас вӧлі вугыртӧма.] Рекав да Баан вокъяс пырисны керкаас шобділа моз. Ишвошет сэки куйліс аслас узьлан жырйын. Вокъяс пырӧмсяньыс бытшкисны Ишвошетлы кынӧмас, керыштісны юрсӧ да босьтісны аскӧдыс, сэсся пышйисны. Войбыд найӧ мунісны Йӧрдан ковтысӧд.

⁸ Ишвошетлысь юрсӧ вайисны Давид ӧксылы Хевронӧ да шуисны: «Со, тайӧ Ишвошетлӧн юрыс. Сійӧ тэнӧ мустӧмтысь Сауллӧн пиыс. Саул корсис вины тэнӧ, но талун миян ӧксы-ыджыдным вӧсна Господь мынтысис Сауллы да сысянь чужысьяслы».

^9-11 Давид шуис Рекавлы да Баанлы, беротса Риммонлӧн пиянлы: «Коркӧ Сиклагын ӧти морт висьталіс меным Сауллӧн [да Ионафанлӧн] кулӧм йылысь. Сійӧ чайтіс, мый нимкодь юӧр вайӧ, но аттьӧалӧм пыдди ме босьті да вии сійӧс. А ӧні ті, лёк вӧчысьяс, виинныд мыжтӧм мортӧс аслас керкаын вольпась вылас. Ме кыв сета ловъя Господь водзын, менӧ быд лёксьыс Мездысьӧй водзын: ме тіянлысь водзӧс перъя Ишвошетлысь вирсӧ кисьтӧмысь да бырӧда тіянӧс му вывсьыс».

¹² Давид тшӧктіс аслас йӧзлы вины Рекавӧс да Баанӧс. Налысь керыштісны ки-коксӧ, сэсся ӧшӧдісны найӧс Хевронын вайӧртӧд дорӧ. А Ишвошетлысь юрсӧ босьтісны да пуктісны Авенир дзебанінӧ.