Ӧксыяслӧн 2 небӧг 24 - Коми Библия 2023

Господь мыждӧ Давидӧс войтырсӧ лыддьӧмысь

¹ Господь бара чорыда скӧрмис израильсаяс вылӧ. Медым ыззьӧдны Давидӧс налы паныд Сійӧ шуис: «Мун да артав Израиль да Иуда войтырлысь лыдсӧ».

² Ӧксы шуис Йоавлы, тышкайӧзлӧн юралысьлы: «Кытшовтӧй став Израиль [да Иуда] чужанкотырсӧ войвыв Дансянь лунвыв Бер-Шеваӧдз да арталӧй-гижалӧй войтырсӧ. Ме кӧсъя тӧдны налысь лыдсӧ».

³ Йоав шуис ӧксылы: «Господь, тэнад Енмыд, мед содтас тэнад войтырлысь лыдсӧ сы мында, мыйта ӧні эм, и нӧшта на сё пӧвстӧн мед содтас та дорӧ. Менам ӧксыӧй-ыджыдӧй мед аслас синмӧн аддзас тайӧс. Ӧксыӧй-ыджыдӧй, мыйла тэ кӧсъян артавны-гижавны найӧс?»

⁴ Но Йоавлы да тышкайӧзлӧн мукӧд юралысьяслы колӧ вӧлі вӧчны ӧксылӧн тшӧктӧм серти. Найӧ мунісны, медым артавны-гижавны Израиль войтырӧс.

⁵ Найӧ вуджисны Йӧрдан ю да сувтісны Ароэр карсянь лунвывладорӧ. Карыс сулаліс Гад ковтыс шӧрын. Сэтысянь мунісны Язер карӧ,

⁶ сэсся Галаад муӧ да Тахтим-Ходши муӧ. Водзӧ мунісны Дан-Яанӧ да кытшовтісны Сидон му.

⁷ Сэсся мунісны Тир изкарӧ. Кытшовтісны хивейяслысь да ханаансаяслысь став карсӧ да локтісны Бер-Шеваӧ, Иуда мулӧн лунвыв карӧ.

⁸ Став мусӧ найӧ кытшовтісны ӧкмыс тӧлысьӧн да кызь лунӧн. Сэсся бӧр локтісны Ерусалимӧ.

⁹ Йоав юӧртіс ӧксылы войтырлысь лыдсӧ. Вӧлӧмакӧ, Израильын кӧкъямыссё сюрс шыпурта морт, кодъяс вермӧны тышӧ петны, а Иудаын – витсё сюрс морт.

¹⁰ Войтырсӧ арталӧм бӧрын Давидлы сьӧкыд лои сьӧлӧм вылас. Сійӧ шуис Господьлы: «Ме, Тэнад кесйӧг, мыжа сыысь, мый лыдди войтырӧс. Кора Тэнӧ, Господьӧй, вешты ме вылысь мыжӧс. Ме мывкыдтӧг вӧчи».

^11-12 Гад пророклы, Давидлӧн тӧдысь-аддзысьлы, вӧлі Господьсянь кыв: «Мун да юӧрт Давидлы, мый Господь тадзи висьталӧ: куим мыждӧм Ме вӧзъя тэныд. Мый бӧръян, сійӧс Ме и вӧча». Мӧд асывнас, кор Давид чеччис,

¹³ Гад локтіс сы дінӧ да висьталіс ставсӧ. Шуис: «Бӧрйы. Лоас-ӧ сизим во чӧж тшыгъялӧм тэнад муын? Кутан-ӧ тэ куим тӧлысь чӧж пышъявны вӧрӧгъясысь, кодъяс пондасны вӧтлысьны тэ бӧрся? Либӧ кутас-ӧ куим лун чӧж тэнад муын ыджыдавны пӧрӧс висьӧм? Мӧвпышт да шу меным, мый висьтавны менӧ Мӧдӧдысьлы».

¹⁴ Давид шуис Гад пророклы: «Ыджыд шог суис менӧ. Но морт киӧ веськалӧм дорысь бурджык шедны Господьлӧн мыждӧм улӧ, ӧд Сылӧн буралӧмыс ыджыд». [Давид бӧрйис кулана висьӧм шобді вундан кадӧ.]

¹⁵ Асывнас Господь ыстіс Израиль войтырлы пӧрӧс висьӧм. Висьӧмыс ыджыдаліс Енлӧн индӧм кадӧдз. Войвыв Дансянь лунвыв Бер-Шеваӧдз куліс сизимдас сюрс морт.

¹⁶ Кор [Енлӧн] андел нюжӧдіс кисӧ Ерусалим вылӧ, медым бырӧдны сійӧс, Господь вежис кывсӧ. Сійӧ шуис войтырӧс бырӧдысь анделлы: «Тырмас. Вешты китӧ». Господьлӧн анделыс сэки сулаліс евусса Орнанлӧн гумла дорын.

¹⁷ Кор Давид аддзис войтырӧс бырӧдысь анделӧс, шыасис Господь дінӧ: «Ме мыжаыс. Ме [ыж видзысь] вӧчи та ыджда лёкторсӧ, а тайӧ ыжъясыс абу мыжаӧсь. Мыжды менӧ да менсьым рӧдӧс!»

¹⁸ Сійӧ лунӧ локтіс Давид дінӧ Гад пророк да шуис: «Мун евусса Орнанлӧн гумла вылӧ да сувтӧд сэтчӧ Господьлы висьпуктанін».

¹⁹ Давид муніс, медым вӧчны Гадлӧн шуӧм серти, кыдзи тшӧктіс Господь.

²⁰ Орнан кор аддзис сы дінӧ локтысь ӧксыӧс да сылысь йӧзсӧ, петіс налы воча да муӧдзыс копыртчис ӧксылы.

²¹ Орнан юаліс: «Ӧксыӧй-ыджыдӧй, мый могӧн тэ локтін аслад кесйӧг дінӧ?» Давид вочавидзис: «Гумлатӧ ньӧбны. Ме сувтӧда сэтчӧ Господьлы висьпуктанін, медым Господь вештас войтырыс вылысь кулана висьӧмсӧ».

²² Орнан шуис: «Ӧксыӧй-ыджыдӧй, босьт вись вайӧм вылад ставсӧ, мый кӧсъян. Ассьым ӧшъясӧс ме сета сотан вись пыдди, доддьӧс да сийӧсӧс – пес пыдди.

²³ Ставсӧ ме сета тэныд, ӧксыӧй!» И нӧшта Орнан шуис ӧксылы: «Господь, тэнад Енмыд, мед лоӧ бур сьӧлӧма тэ дінӧ!»

²⁴ Но ӧксы шуис Орнанлы: «Ог босьт, ме ньӧба. Ме ог вермы вайны Господьлы, аслам Енлы, вись пыдди сійӧ, мыйысь эг вештысь». Орнанлысь гумласӧ да ӧшъяссӧ Давид ньӧбис ветымын сикель эзысьысь.

²⁵ Сэсся гумла вылас вӧчис Господьлы висьпуктанін да сы вылын вайис сотан да бурасян висьяс. [Бӧрынджык Соломон ыдждӧдіс тайӧ висьпуктанінсӧ, ӧд сійӧ вӧлі ичӧт.] Господь кыліс войтырыслысь кевмӧмсӧ и вештіс кулӧм-бырӧдӧмсӧ Израиль вылысь.