Ӧксыяслӧн 2 небӧг 2 - Коми Библия 2023

Давидӧс пуктӧны Иуда чужанкотырлы ӧксыӧ

¹ Та бӧрын Давид юаліс Господьлысь: «Мунны-ӧ меным иудаса кутшӧмкӧ карӧ?» Господь вочавидзис: «Мун». «Кутшӧм карӧ?» – юаліс Давид. Господь шуис: «Хевронӧ».

² Давид муніс сэтчӧ кыкнан гӧтырыскӧд: изреельса Ахиноамакӧд да кармилса Авигеякӧд, Наваллӧн вӧвлӧм гӧтыркӧд.

³ Вайӧдіс тшӧтш ассьыс йӧзсӧ став налӧн котырнас да овмӧдіс найӧс Хевронӧ.

⁴ Сэтчӧ локтісны Иуда чужанкотырысь йӧз да мавтыштӧмӧн пуктісны Давидӧс аслыныс ӧксыӧ. Давидлы висьталісны, мый Галаад муын Явис карса олысьяс дзебӧмаӧсь Саулӧс.

⁵ Давид ыстіс юӧртысьясӧс Явис карӧ да тшӧктіс юӧртны сэтчӧс олысьяслы: «Мед бурсиас тіянӧс Господь, ӧд ті вӧлінныд бур сьӧлӧмаӧсь Саул ыджыдныд дінӧ [Господьлӧн мавтыштӧмаыс дінӧ] – ті гуалінныд сійӧс [да сылысь Ионафан писӧ].

⁶ Господь мед лоас бур сьӧлӧма тіян дінӧ да вӧчас тіянлы Аслас веськыдлуныс серти. Бурсӧ вӧчӧмсьыныд ме тшӧтш мынтыся тіянлы бурӧн.

⁷ Лоӧй повтӧмӧсь да зумыдӧсь! Саул ыджыдныд куліс, но Иуда чужанкотыр мавтыштӧмӧн пуктіс менӧ аслыс ӧксыӧ».

Ишвошетӧс пуктӧны Израильлы ӧксыӧ

⁸ Нирлӧн Авенир пиыс, Сауллӧн тышкайӧзӧн веськӧдлысь, босьтіс Сауллысь Ишвошет писӧ да вайӧдіс Маханаимӧ.

⁹ Сэні пуктіс сійӧс ӧксыавны Галаадын, Ашурын, Изреельын, Ефрем да Венямин чужанкотыръясын да став Израильын.

¹⁰ Ӧксыӧ пуксигас Сауллӧн Ишвошет пилы вӧлі нелямын арӧс. Кык во чӧж сійӧ юраліс Израильын. Иуда чужанкотыр кольччис Давидкӧд.

¹¹ Сизим во да джын Давид юраліс Хевронын, вӧлі Иуда войтырлы ӧксыӧн.

Давидлӧн да Сауллӧн йӧз костын тыш

¹² Нирлӧн Авенир пиыс мӧдӧдчис Маханаимсянь Гаваонӧ Ишвошетлӧн, Саул пилӧн, тышкайӧзкӧд.

¹³ А Саруялӧн Йоав пиыс мӧдӧдчис Давидлӧн тышкайӧзкӧд. Ишвошетлӧн тышкайӧзыс да Давидлӧн тышкайӧзыс локтісны гаваонса вайӧртӧд дорӧ. Ӧтиясыс сувтісны вайӧртӧд ӧтарладорас, мӧдъясыс – мӧдарладорас.

¹⁴ Авенир вӧзйис Йоавлы: «Том йӧзным мед петаласны да петкӧдласны миянлы тышкасян сямсӧ». «Мед петаласны», – вочавидзис Йоав.

¹⁵ Венямин чужанкотырысь Ишвошетлӧн тышкайӧзысь петісны дас кыкӧн, и Давидлӧн тышкайӧзысь тшӧтш петісны дас кыкӧн.

¹⁶ Быдӧн ӧта-мӧдсӧ кватитіс юрӧдыс да бытшкис бокас шыпуртнас. Тадзи петалысьяс ставныс ӧттшӧтш кулісны. Тайӧ местасӧ Гаваонын кутісны нимтыны Шыпурта видз.

¹⁷ Сійӧ лунӧ пансис чорыд тыш. Давидлӧн тышкайӧзыс пасьвартісны Авенирӧс да израильса тышкайӧзӧс.

¹⁸ Тайӧ тышас вӧліны Саруялӧн куимнан пиыс: Йоав, Авишай да Асаил. Асаил вӧлі газель кодь тэрыб кока.

¹⁹ Кор Авенир пышйис Давидлӧн тышкайӧзысь, Асаил котӧртіс сы бӧрся. Вӧтӧдігас сійӧ эз видзӧд веськыдвылӧ ни шуйгавылӧ.

²⁰ Авенир бергӧдчылӧмӧн юаліс: «Асаил, тэ-ӧ тайӧ?» Мӧдыс вочавидзис: «Ме».

²¹ «Дугды ме бӧрся вӧтчынытӧ, – шуис Авенир. – Вӧтӧд кодӧскӧ мӧдӧс да босьт сылысь, мый тэныд колӧ». Но Асаил водзӧ вӧтӧдіс.

²² Авенир мӧдысь ӧлӧдіс Асаилӧс: «Дугды ме бӧрся вӧтчынытӧ. Ме верма вины тэнӧ. Кыдзи сэсся ме кута видзӧдны Йоав вокыдлы синмас?

²³ [Мыйӧдз тайӧ вайӧдас? Бергӧдчы Йоав вокыд дінӧ.]» Но Асаил эз ӧвсьы. Сэки Авенир бӧрланьӧ шеныштчӧмӧн бытшкис Асаилӧс. Шыыс муніс кынӧм пырыс. Асаил усис да сэні и куліс. Быд мунысь сувтыштліс видзӧдлыны Асаил вылӧ.

²⁴ Йоав да Авишай вӧтчисны Авенир бӧрся. Шонді пуксигас Йоав да Авишай воисны Амма ыб вылӧ, мый вӧлі Гиахлы воча, Гаваон овтӧминӧ мунан туй бокын.

²⁵ Венямин чужанкотырысь йӧзыс чукӧртчисны Авенир дінӧ да ӧти чукӧрӧн кайисны мӧд ыб вылӧ.

²⁶ Авенир горӧдіс Йоавлы: «Дыр-ӧ на ми кутам вирӧсьтны шыпуртнымӧс? Тэ ӧд тӧдан, мый тайӧ бурӧн оз помась. Тшӧкты аслад йӧзлы, мед дугдасны вӧтӧдны миянӧс, ассьыныс вокъяснысӧ!»

²⁷ Йоав вочавидзис: «Бур, мый тэ тайӧс шуин. Ловъя Ен водзын висьтала: эн кӧ шу, менам тышкайӧзӧй эськӧ асылӧдзыс на вӧтӧдісны тіянӧс, ассьыныс вокъяснысӧ».

²⁸ Йоав букӧстіс буксанӧн, и тышкайӧз дугдісны тышкасьны да вӧтӧдны израильсаясӧс.

²⁹ Авенир да сылӧн йӧзыс войбыд мунісны ковтысӧд, сэсся вуджисны Йӧрдан ю. Найӧ мунісны Битрон пыр да воисны Маханаимӧ.

³⁰ Авенирӧс вӧтӧдны дугдӧм бӧрын Йоав чукӧртіс ассьыс йӧзсӧ. Давидлӧн тышкайӧзысь Асаилысь ӧтдор тышас воштісны дас ӧкмыс мортӧс.

³¹ А Давидлӧн тышкайӧзыс виисны Венямин чужанкотырысь да Авенирлӧн йӧзысь куимсё квайтымын мортӧс.

³² Асаиллысь шойсӧ нуисны Виплиемӧ да пуктісны батьыслӧн дзебанінӧ. Йоав аслас йӧзкӧд войбыд муніс да асъядорыс воис Хевронӧ.