Ӧксыяслӧн 2 небӧг 12 - Коми Библия 2023

Нафан пророк янӧдӧ Давидӧс

¹ Господь мӧдӧдіс Нафан пророкӧс Давид дінӧ. Сійӧ локтіс да висьталіс ӧксылы татшӧмтор: «Ӧти карын олісны озыр да гӧль морт.

² Озырлӧн вӧлі уна ыж-мӧс,

³ а гӧльлӧн вӧлі сӧмын ичӧтик баля, кодӧс сійӧ ньӧбис. Баля сёйис-юис гӧль морткӧд ӧти дозйысь да унмовсьлывліс сылӧн ки вылын, быдмис сылӧн ныв-пиыскӧд ӧтлаын. Гӧль морт видзис балясӧ ассьыс нылӧс моз.

⁴ Ӧтчыд озыр дінӧ пырис туйвыв морт. Горшлуныс вӧсна озыр эз кут начкыны ассьыс пемӧссӧ, мед вердны туйвыв мортӧс, а босьтіс гӧльлысь балясӧ да дасьтіс сёян».

⁵ Давид ёна скӧрмис тайӧ озыр мортыс вылӧ да шуис Нафанлы: «Ловъя Господь водзын шуа, татшӧмтор вӧчысьӧс колӧ вины.

⁶ Тадзи вӧчӧмсьыс да сьӧлӧмсӧ чорзьӧдӧмысь сылы колӧ мынтысьны балясьыс нёль пӧвстӧн».

⁷ Нафан шуис Давидлы: «Тайӧ мортыс [коді вӧчис татшӧмторсӧ] – тэ. Та вӧсна Господь, Израильлӧн Ен, тадзи висьталӧ: ”Ме мавтыштӧмӧн пукті тэнӧ Израиль войтырлы ӧксыӧ. Ме мезді тэнӧ Саул киысь.

⁸ Сеті тэныд аслад ыджыдлысь керкасӧ да сылысь гӧтыръяссӧ, тшӧтш Израиль да Иуда войтырӧс. И этша кӧ тайӧ вӧлі, нӧшта на эськӧ содті.

⁹ Мыйла тэ нинӧмӧ пуктін Менсьым Индӧдӧс да вӧчин Ме водзын шогмытӧмсӧ? Тэ виин хеттей Урийӧс. Аммон войтырлӧн шыпурт улӧ тэ сетін сійӧс, а сылысь гӧтырсӧ босьтін аслыд гӧтырӧ.

¹⁰ Менӧ нинӧмӧ пуктӧм вӧсна да хеттей Урийлысь гӧтырсӧ аслыд гӧтырӧ босьтӧм вӧсна тэнад керка весьтын пыр кутас ӧшавны ёсь шыпурт”.

¹¹ Господь тадзи висьталӧ: ”Аслад жӧ керкаысь Ме вайӧда тэ вылӧ лёксӧ. Тэнад син водзын Ме босьта тэнсьыд гӧтыръястӧ да сета найӧс тэнад матысса мортлы. Сійӧ кутас узьлыны накӧд лунъюгыднас.

¹² Тэ вӧчин тайӧс гусьӧн, а Ме вӧча тайӧс восьсӧн став Израиль водзын”».

¹³ Давид шуис Нафанлы: «Ме мыжа Господь водзын». Нафан шуис: «Господь ӧні вештіс тэ вылысь мыжтӧ. Тэ он кув.

¹⁴ Но тайӧ вӧчӧмторнад тэ сетін помка Господьӧс мустӧмтысьяслы омӧльтны Сійӧс. Та вӧсна кулас тэнад пузчужӧм пиыд». Сэсся Нафан бӧр муніс гортас.

Давидлӧн кагаыс кулӧ

¹⁵ Господь ыстіс чорыд висьӧм Давидлӧн кагалы, кодӧс сылы чужтіс Урийлӧн гӧтырыс.

¹⁶ Давид кевмысис Енлы пи вӧснаыс. Сійӧ видзаліс да войбыд куйліс му вылас.

¹⁷ Сы дінӧ локтісны сылӧн керкаӧн веськӧдлысьяс, мед лэптыны сійӧс му вывсьыс. Но Давид пыксис, эз кӧсйы чеччыны да сёйны-юны накӧд.

¹⁸ Сизимӧд луннас кагаыс куліс. Давидлӧн кесйӧгъяс полісны висьтавны сылы та йылысь. Найӧ сёрнитісны ас костаныс: «Кор кагаыс вӧлі ловъя на, сійӧ эз кӧсйы весиг кывзыны миянӧс. Кыдзи нӧ ми ӧні сылы висьталам, мый пиыс куліс? Мыйкӧ лёктор вӧчас аскӧдыс».

¹⁹ Давид кор аддзис кесйӧгъяслысь шӧпкӧдчӧмсӧ, гӧгӧрвоис, мый кагаыс куліс. Сэсся юаліс налысь та йылысь. Мӧдъясыс вочавидзисны, кагаыд пӧ куліс.

²⁰ Сэки Давид чеччис му вывсьыс, мыссис, мавтіс асьсӧ чӧскыд дука выйӧн да вежис паськӧмсӧ. Сэсся муніс Господьлӧн керкаӧ кевмысьны. Кор бӧр локтіс гортас, тшӧктіс вайны сёян. Сэсся сёйис.

²¹ Кесйӧгъясыс юалісны: «Висьтав, мыйла тэ тадзи вӧчин? Кор кагаыд ловъя вӧлі, тэ видзалін да бӧрдін [весиг эн узьлы]. А кор сійӧ куліс, тэ чеччин да пондін сёйны-юны?»

²² Давид шуис та вылӧ: «Ловъя дырйиыс ме видзалі да бӧрді, чайті, мый Господь бурсьӧлӧмтчас ме дінӧ, и кагаӧй оз кув.

²³ А ӧні мыйла меным видзавнысӧ, сійӧ кӧ абу нин ловъя? Ме сійӧс бӧр ловзьӧдны ог вермы. Кор кула, муна сы дінӧ. А сійӧ ме дінӧ бӧр оз нин лок».

Давидлӧн чужӧ Соломон пи

²⁴ Давид бурӧдіс ассьыс Вирсавия гӧтырсӧ да узис сыкӧд. Та бӧрын Вирсавия [кутіс нӧбасьны,] чужтіс пиӧс да пуктіс сылы Соломон ним. Господьлы тайӧ кагаыс вӧлі муса.

²⁵ Господь мӧдӧдіс Нафан пророкӧс, и Господьлӧн кыв серти сійӧ сетіс кагалы Едидий ним.

Давид босьтӧ Равва кар

²⁶ Йоав уськӧдчис аммон войтырлӧн Равва кар вылӧ и босьтіс ӧксылысь изкарсӧ.

²⁷ Сэсся мӧдӧдіс юӧртысьӧс Давид дінӧ, тшӧктіс висьтавны: «Ме уськӧдчи Равва кар вылӧ. Босьті карыслысь ва видзанінсӧ.

²⁸ Тэ чукӧрт став тышкайӧзтӧ, лок да босьт карсӧ. Ме кӧ босьта сійӧс, менсьым нимӧс кутасны ыдждӧдлыны».

²⁹ Давид чукӧртіс став ассьыс тышкайӧзсӧ да муніс Равва карӧ. Тышкасис да босьтіс сійӧс.

³⁰ Давид босьтіс аммон войтырлӧн ӧксы юр вылысь зарни юркытшсӧ да пуктіс аслас юр вылӧ. Юркытшлӧн сьӧктаыс вӧлі ӧти талант, сійӧс вӧлі мичмӧдӧма дона изъясӧн. Уна озырлун Давид петкӧдіс Равва карысь.

³¹ Карса олысьясӧс тшӧтш петкӧдіс. Сійӧ сьӧкыда уджӧдіс найӧс: ӧтияс уджалісны чер-пилаӧн, мӧдъяс – кӧрт коканӧн, коймӧдъяс сотісны кирпич. Тадзи Давид вӧчис аммон войтырлӧн быд карын, а сэсся аслас тышкайӧзкӧд бӧр локтіс Ерусалимӧ.