Ӧксыяслӧн 2 небӧг 1 - Коми Библия 2023

Давид тӧдмалӧ Сауллӧн да Ионафанлӧн кулӧм йылысь

¹ Сауллӧн кулӧм бӧрын Давид пасьвартіс амаликъясӧс, сэсся бӧр локтіс Сиклагӧ да оліс сэні кык лун.

² Коймӧд луннас Сауллӧн тышкайӧз пӧвстысь локтіс ӧти морт. Паськӧмсӧ сійӧ вӧлі косялӧма, юрсӧ коялӧма муӧн. Сійӧ матыстчис Давид дінӧ да муӧдзыс уськӧдчис сы водзӧ.

³ Давид юаліс: «Кытысь тэ локтін?» Мӧдыс вочавидзис: «Ме пышйи израильса тышкайӧзлӧн чукӧртчанінысь».

⁴ «Мый лоис?» – юаліс Давид. Мӧдыс висьталіс: «Израильса тышкайӧз пышйисны тышкасянінысь. На пӧвстысь унаӧс виисны, виисны тшӧтш Саулӧс да сылысь Ионафан писӧ».

⁵ «Кытысь тэ тӧдан, мый Саул да сылӧн Ионафан пиыс кулӧмаӧсь?» – водзӧ юасис Давид.

⁶ Юӧр вайысь шуис: «Ме локті Гелву керӧсӧ да аддзи доймалӧм Саулӧс. Сійӧ сулаліс шы вылас мыджсьӧмӧн. Тарантасъяс да верзьӧмаяс вӧлі матыстчӧны сылань.

⁷ Сійӧ видзӧдліс бӧрлань да аддзис менӧ. Чукӧстіс менӧ,

⁸ и ме шыаси. Сійӧ юаліс, коді ме. Ме шуи, мый ме амалик войтырысь.

⁹ Сэки сійӧ шуис меным: ”Матыстчы да ви менӧ. Кулӧмыс топӧдӧ, но ме ловъя на”.

¹⁰ Ме матыстчи да вии. Ме тӧді, мый татшӧма доймалӧм бӧрын сійӧ дыр оз нин ов. Сэсся босьті юр вывсьыс ӧксы юркытшсӧ, кисьыс сойкытшсӧ да вайи тэныд, ыджыдӧй».

¹¹ Сэки Давид косяліс ассьыс паськӧмсӧ. Йӧзыс, кодъяс вӧліны сыкӧд, тшӧтш тадзи вӧчисны.

¹² Найӧ рытӧдзыс видзалісны да ырзӧмӧн бӧрдісны шыпурт помысь кулӧм израильсаяс вӧсна: Саул вӧсна, сылӧн Ионафан пиыс вӧсна да Господьлӧн тышкайӧзыс вӧсна.

¹³ Давид юаліс юӧр вайысьлысь: «Кытысь ачыд?» Мӧдыс вочавидзис: «Ме амаликъяслӧн муысь локтысьлӧн пи».

¹⁴ Давид шуис сылы: «Кыдзи тэ лысьтін лэптыны китӧ, медым вины Господьлысь мавтыштӧмасӧ?»

¹⁵ Сэсся Давид корис аслас тышкайӧзысь ӧтиӧс да шуис: «Ви сійӧс».

¹⁶ А юӧр вайысьлы шуис: «Тэ ачыд мыжа аслад кулӧмысь. Ӧд тэ аслад вомӧн шуин, мый виин Господьлысь мавтыштӧмасӧ». Шыпурта бытшкис юӧр вайысьӧс, и мӧдыс куліс.

Давид бӧрдӧ Саул да Ионафан вӧсна

¹⁷ Давид сьыліс Саул да сылӧн Ионафан пи йылысь бӧрдӧдчанкыв.

¹⁸ Иуда войтырлы сійӧ тшӧктіс велӧдны сьыланкыв, мый сиӧма ньӧввужйысь медбур лыйсьысьяслы. Тайӧ сьыланкывсӧ гижӧма Веськыда олысьлӧн небӧгӧ.

¹⁹ Тэнсьыд медбуръястӧ, Израильӧй, пасьвартісны керӧсъясыд вылын. Ыджыд шог – вынаяс усисны!

²⁰ Энӧ висьтавлӧй та йылысь Гефын, энӧ паськӧдӧй юӧрсӧ Аскалон туйяс вылын, медым эз нимкодясьны филистимса нывъяс, эз гажӧдчыны вундыштчытӧмъяслӧн нывъяс.

²¹ Гелву керӧсъяс, тіянӧс мед оз кӧтӧдны лысва да зэр, тіян мед оз лоны вотӧса видз-муяс. Ӧд сэні сімӧ выналӧн сайӧдыс, Сауллысь сайӧдсӧ выйӧн оз нин мавтны.

²² Ионафанлӧн ньӧвйыс эз бергӧдчывлы вӧрӧглысь вирсӧ кисьттӧг, вынаяслысь гырк пытшкӧссӧ видлытӧг, Сауллӧн шыпуртыс весьшӧрӧ эз бытшкывлы.

²³ Саулӧс да Ионафанӧс ёна радейтісны да ошкисны. Оліганыс найӧ эз янсӧдчывны, куліганыс эз торйӧдчыны. Кутшысь тэрыбджыкӧсь, левысь ёнджыкӧсь вӧліны найӧ.

²⁴ Израильса нывъяс, бӧрдӧй Саул вӧсна! Сійӧ пасьтӧдліс тіянӧс дона гӧрд паськӧмӧн, судзӧдліс тіянлы зарни мичмӧдчанторъяс.

²⁵ Ыджыд шог – вынаяс усисны! Ионафанлӧн шойыс куйлӧ керӧс вылын.

²⁶ Ёна шогся тэ вӧсна, Ионафан вокӧй. Тэ вӧлін меным вывті муса, тэнад муслуныд вӧлі меным аньлӧн муслун дорысь на донаджык.

²⁷ Ыджыд шог – вынаяс усисны, вермасьысьяс кулісны!