Ӧксыяслӧн 1 небӧг 6 - Коми Библия 2023

Йитӧд кудсӧ бӧр нуӧны Израильӧ

¹ Сизим тӧлысь чӧж Господьлӧн кудйыс вӧлі Филистим муын. [Муыс тырис крысаясӧн.]

² Филистимсаяс корисны попъясӧс, тунъясӧс [да тӧдысьясӧс] да юалісны: «Мый миянлы вӧчны Господьлӧн куднас? Висьталӧй, кыдзи сійӧс бӧр мӧдӧдны?»

³ Найӧ вочавидзисны: «Ті кӧ бӧр кӧсъянныд мӧдӧдны [Господьлысь] Израиль Енлысь [Йитӧд] кудсӧ, козинтӧг сійӧс энӧ мӧдӧдӧй. Ыстӧй мыж вештан вись. Сэки ті бурданныд да тӧдмаланныд, мый вӧсна Израильлӧн Ен оз вешты Ассьыс мыждӧмсӧ тіян вылысь».

⁴ Йӧзыс юалісны: «Мый миянлы ыстыны Сылы мыж вештан вись пыдди?» Мӧдъясыс шуисны: «Ыстӧй зарниысь вӧчӧм вит мыль да вит зарни крыса филистимса юралысьяслӧн лыд серти. Ӧд тіянӧс да тіянлысь юралысьяснытӧ мыждӧма ӧткодя.

⁵ Вӧчӧй мыльяссӧ да мунытӧ бырӧдысь крысаяссӧ, мед пыдди пуктыны Израильлысь Енсӧ. Гашкӧ, Сійӧ вештас Ассьыс мыждӧмсӧ тіян вылысь, тіян енъяс да тіян му вылысь.

⁶ Энӧ чорзьӧдӧй сьӧлӧмнытӧ, кыдзи коркӧ чорзьӧдчисны египетсаяс да фараон. Найӧ лэдзисны Израиль войтырӧс Египет муысь сӧмын сэки, кор Господь петкӧдліс Ассьыс вынсӧ.

⁷ Сідзкӧ, вӧчӧй ӧти выль тарантас, босьтӧй медводдзаысь вайсьӧм кык мӧскӧс, кодъясӧс эз на сийӧсавлыны. Доддялӧй найӧс, а кукъяссӧ торйӧдӧй наысь да йӧртӧй.

⁸ Господьлысь кудсӧ пуктӧй тарантасӧ. А зарниысь вӧчӧмторъяснытӧ, кодъясӧс ваянныд Господьлы мыж вештан вись пыдди, пуктӧй тылӧсӧ, а тылӧссӧ пуктӧй кудйыскӧд орччӧн. Тадзи ыстӧй кудсӧ.

⁹ Но видзӧдӧй сы бӧрся. Мунас кӧ кудйыс аслас муӧ, Бет-Шемеш карлань, сідзкӧ, тайӧ ыджыд шогсӧ миянлы Господь ыстіс. Оз кӧ сэтчань мун, ми кутам тӧдны, мый эз Господь мыжды миянӧс, но тадзи ачыс лои».

¹⁰ Сідзи и вӧчисны. Филистимсаяс босьтісны медводдзаысь вайсьӧм кык мӧскӧс, доддялісны тарантасӧ, а кукъяссӧ йӧртісны.

¹¹ Сэсся пуктісны тарантасӧ Господьлысь кудсӧ да тылӧс, кытчӧ пуктісны зарниысь вӧчӧм мыльяссӧ да крысаяссӧ.

¹² Мӧсъяс веськыда мӧдӧдчисны Бет-Шемешлань. Найӧ пыр мунісны ӧти туйӧд. Муніганыс ӧтарӧ баксісны, но эз кежны веськыдвылӧ ни шуйгавылӧ. Филистимса юралысьяс вӧтчисны на бӧрся Бет-Шемеш дорӧдз.

¹³ Сійӧ кадас Бет-Шемешын олысьяс вундісны ковтысын шобді. Кор найӧ аддзисны Господьлысь кудсӧ, тырисны нимкодьлунӧн.

¹⁴ Тарантас воис Бет-Шемешын олысь Исуслӧн му вылӧ да сувтіс ыджыд из дорӧ. Тарантассӧ кералісны пес вылӧ, а мӧсъяссӧ вайисны Господьлы сотан вись пыдди.

¹⁵ Левитъяс пуктісны ыджыд из вылӧ Господьлысь кудсӧ да тылӧс, кӧні вӧліны зарни вӧчӧмторъяс. Сійӧ лунӧ Бет-Шемешын олысьяс вайисны Енлы сотан да мукӧд висьяс.

¹⁶ Филистимса витнан юралысьыс аддзылісны тайӧс, сэсся сійӧ жӧ луннас бӧр мунісны Экронӧ.

¹⁷ Зарниысь вӧчӧм мыльяссӧ филистимсаяс вайисны Господьлы мыж вештан вись пыдди вит филистимса кар вӧсна: Азот, Газа, Аскалон, Геф да Экрон каръяс вӧсна.

¹⁸ Зарни крысаяссӧ вӧлі вайӧма став кар-сиктыс вӧсна, кӧні веськӧдлісны филистимса вит юралысьыс. Налӧн изкаръясыс да сиктъясыс вӧлі паськӧдчӧмаӧсь ыджыд изйӧдзыс, кытчӧ пуктісны Господьлысь кудсӧ. Тайӧ изйыс ӧнӧдз сулалӧ Бет-Шемешысь Исуслӧн му вылын.

¹⁹ [Бет-Шемешын олысьяс пиысь Еконейлӧн рӧдыс эз нимкодясь Господьлысь кудсӧ аддзылӧмысь.] Куд пытшкӧ видзӧдлӧмысь Господь бырӧдіс Бет-Шемеш карысь ветымын сюрс сизимдас мортӧс. Сэтчӧс олысьяс ырзӧмӧн бӧрдісны, ӧд Господь чорыда мыждіс найӧс.

²⁰ Найӧ шуалісны: «Коді вермас сулавны Господь водзын, тайӧ вежа Енмыс водзын? Вешъяс-ӧ Сійӧ коркӧ миян дінысь?»

²¹ Сэки мӧдӧдісны йӧзӧс Киръят-Яримӧ висьтавны, филистимсаяс пӧ вайисны Господьлысь кудсӧ, локтӧй пӧ да босьтӧй сійӧс аслыныд.