Ӧксыяслӧн 1 небӧг 5 - Коми Библия 2023

Йитӧд куд Филистим муын

¹ Енлысь кудсӧ босьтӧм бӧрын филистимсаяс вайисны сійӧс Эвен-Эзерысь Азотӧ.

² Сэсся пыртісны Енлысь кудсӧ Дагон бӧлбанлы юрбитанінӧ да пуктісны Дагонкӧд орччӧн.

³ Водз асывнас азотса олысьяс локтісны юрбитанінӧ да аддзисны, мый Дагон бӧлбан кымынь куйлӧ Господьлӧн куд водзын. Дагонӧс босьтісны да сувтӧдісны бӧр аслас местаӧ.

⁴ Мӧд асывнас локтісны зэв водз да аддзисны, мый Дагон бара кымынь куйлӧ Господьлӧн куд водзын. Сылысь [коксӧ,] кисӧ да юрсӧ вӧлі керыштӧма, найӧ туплясисны тагӧс вылас. Кольӧма вӧлі сӧмын тушаыс.

⁵ Та вӧсна Дагонлӧн попъяс да Дагонлы юрбитанінӧ волысьяс ӧнӧдз оз тувччыны тагӧс вылас [а воськовтӧны сы вомӧн].

⁶ Азотын да сы гӧгӧрын олысьясӧс Господь чорыда кутіс мыждыны. Ставнысӧ полӧм босьтіс. Господь дойдаліс йӧзсӧ, яй пасьталаыс налӧн петалісны мыльяс. [Му пасьталаыс рӧдмисны крысаяс. Ыджыд шог суис карын олысьясӧс.]

⁷ Ставсӧ тайӧс аддзигӧн азотсаяс шуисны: «Израиль Енлысь кудсӧ колӧ нуны миян дінысь, ӧд Сійӧ сьӧктӧдӧ миянӧс да миянлысь Дагон еннымӧс».

⁸ Найӧ чукӧртісны ас дінаныс филистимса став юралысьсӧ да юалісны: «Мый миянлы вӧчны Израиль Енлӧн кудйыскӧд?» Юралысьяс тшӧктісны нуны кудсӧ Гефӧ. И нуисны Израиль Енлысь кудсӧ Гефӧ.

⁹ Сэтчӧ вайӧм бӧрын Господь кутіс мыждыны и тайӧ карсӧ. Ставныс шызисны. Йӧзсӧ полӧм босьтіс. Господь чорыда дойдаліс гырысьӧс и посниӧс, ставныс найӧ мылльӧссисны.

¹⁰ Сэтысь мӧдӧдісны Енлысь кудсӧ Экрон карӧ. Сэтчӧс олысьяс пондісны шуасьны-горзыны: «Мыйла ті вайинныд татчӧ Израиль Енлысь кудсӧ? Мед вины-бырӧдны миянӧс?»

¹¹ Сэсся чукӧртісны филистимса став юралысьсӧ да шуисны: «Бӧр нуӧй Израиль Енлысь кудсӧ, кытысь босьтінныд. Тані сійӧ ставнымӧс бырӧдас». Экронын олысьяс зэв ёна полісны, ӧд [Израиль Енлысь кудсӧ вайӧм бӧрын] Ен чорыда мыждіс найӧс.

¹² Унаӧн кулісны. А ловйӧн кольысьяс ставныс ёна мылльӧссисны. Карса олысьяслӧн ойзӧмыс кыптіс енэжӧдз.