Ӧксыяслӧн 1 небӧг 31 - Коми Библия 2023

Сауллӧн кулӧм

¹ Филистимсаяс тышкасисны израильсаяскӧд. Гелву керӧс вылын найӧ пасьвартісны израильсаясӧс. Унаӧн израильса пӧвстысь кулісны, а мукӧдыс пышйисны.

² Филистимсаяс суӧдісны Саулӧс да сылысь пиянсӧ. Найӧ виисны Сауллысь Ионафан, Авинадав да Малкисуй пиянсӧ.

³ Чорыд тыш вӧлі Саулкӧд. Сійӧс лыйлісны ньӧвъясӧн, зэв ёна дойдалісны.

⁴ Саул шуис шыпурт новлӧдлысьыслы: «Перйы шыпурттӧ да бытшкы менӧ! Тайӧ вундыштчытӧмъясыс мед оз вины менӧ да оз тешитчыны ме вылын». Но шыпурт новлӧдлысь ёна повзис да эз ви Саулӧс. Сэки Саул босьтіс ассьыс шыпуртсӧ да шыбитчис ёсьладор помас.

⁵ Шыпурт новлӧдлысь кор аддзис, мый Саул куліс, тшӧтш шыбитчис шыпурт ёсьладор помас да куліс.

⁶ Ӧти лунӧ кулісны Саул, сылӧн куимнан пиыс, шыпурт новлӧдлысьыс да став тышкайӧзыс.

⁷ Ковтыс мӧдарладорын да Йӧрдан ю сайын олысь израильсаяс кор кылісны, мый израильса тышкайӧз пышйӧмаӧсь, а Саул пияныскӧд абу нин ловъяӧсь, сэки эновтісны ассьыныс каръяснысӧ да пышйисны. А филистимсаяс локтісны да овмӧдчисны сэтчӧ.

⁸ Мӧд луннас, кор филистимсаяс локтісны шобны виӧмаясӧс, аддзисны Гелву керӧс вылысь Сауллысь да куимнан пиыслысь шойяссӧ.

⁹ Найӧ [бергӧдісны Сауллысь шойсӧ,] керыштісны сылысь юрсӧ, босьтісны шыпуртсӧ да мукӧд тышкасянторсӧ. Сэсся ставсӧ тайӧс новлӧдлісны Филистим му пасьтала да идолъяслы юрбитанінъясын став войтырыслы юӧртісны асланыс вермӧм йылысь.

¹⁰ Сауллысь тышкасянторъяссӧ пуктісны Астарталы юрбитанінӧ, а шойсӧ ӧшӧдісны Бет-Шеан карса стен бердӧ.

¹¹ Галаад муын Явис карын кор кылісны, мый филистимсаяс вӧчӧмаӧсь Саулкӧд,

¹² сэки став збой йӧзыс петісны туйӧ да войбыд мунісны. Найӧ босьтісны Сауллысь да пияныслысь шойяссӧ, кодъяс ӧшалісны Бет-Шеан стен бердын, вайисны Явис карӧ да сотісны.

¹³ Налысь лыяссӧ гуалісны тамариск пу улӧ. Та бӧрын сизим лун чӧж видзалісны.