Ӧксыяслӧн 1 небӧг 30 - Коми Библия 2023

Давид вермӧ амаликъясӧс

¹ Куим лун чӧж Давид аслас йӧзкӧд воӧдчис Сиклагӧ. Сэккості амаликъяс уськӧдчисны Негев му да Сиклаг кар вылӧ. Сиклаг карсӧ найӧ пасьвартісны да сотісны.

² Аньясӧс да карса став олысьсӧ, ичӧтсянь ыджыдӧдз, эз кутны виавны, но нуӧдісны аскӧдныс.

³ Давид аслас йӧзкӧд локтіс карас да аддзис: карсӧ сотӧмаӧсь, а гӧтыръяснысӧ да ныв-пинысӧ нуӧдӧмаӧсь пленӧ.

⁴ Давид да сылӧн йӧзыс ырзӧмӧн кутісны бӧрдны. Бӧрдісны эбӧс быртӧдзныс.

⁵ Давидлысь вӧлі босьтӧмаӧсь кыкнан гӧтырсӧ: изреельса Ахиноамаӧс да кармилса Авигеяӧс, Наваллысь вӧвлӧм гӧтырсӧ.

⁶ Став йӧзыс ёна шогсисны, быдӧн шогсис аслас ныв-пиыс вӧсна. Найӧ весиг кӧсйисны изъявны Давидӧс, та вӧсна сылы вӧлі вывті сьӧкыд.

⁷ Но Давид лача кутіс аслас Господь Ен вылӧ, и тайӧ ёнмӧдіс сійӧс. Сійӧ тшӧктіс Авиатар поплы, Ахимелек пилы, вайны ефод. Кор Авиатар вайис ефодсӧ,

⁸ Давид шыасис Господь дінӧ да юаліс: «Вӧтчыны-ӧ меным тайӧ мырддялысь-пазӧдысьяс бӧрся? Суӧда-ӧ ме найӧс?» Господь вочавидзис: «Вӧтчы. Тэ суӧдан и мездан ассьыд йӧзтӧ».

⁹ Давид босьтіс аскӧдыс квайтсё мортӧс да мӧдӧдчис. Кор воисны Восор ю дорӧ, мудзӧмаяс сувтісны.

¹⁰ Налӧн весиг выныс эз вӧв Восор юсӧ вуджны. Кыксёыс колльчисны, а нёльсёыскӧд Давид муніс водзӧ.

¹¹ Овтӧминысь найӧ аддзисны египетса мортӧс. Сійӧс вайӧдісны Давид дінӧ. Сэсся юкталісны сійӧс ваӧн, сетісны сылы нянь,

¹² косьтӧм инжир да кык ёкмыль изюм. Сійӧ сёйис да ёнмыштіс. Таӧдз сійӧ куим лун оліс сёйтӧг-ютӧг.

¹³ Давид юаліс сылысь: «Кодлӧн тэ да кытысь ачыд?» Мӧдыс вочавидзис: «Ме Египетысь, амалик мортлӧн кесйӧг. Куим лун сайын ме висьми, и ыджыдӧй эновтіс менӧ.

¹⁴ Ми уськӧдчылім керетсаяслӧн, Иуда войтырлӧн да Калев рӧдлӧн Негев му вылӧ, а Сиклаг кар ми сотім биӧн».

¹⁵ Давид юаліс: «Нуӧдан-ӧ миянӧс тайӧ мырддялысь-пазӧдысьяс дінӧ?» Мӧдыс вочавидзис: «Нуӧда. Сӧмын кыв сет меным Ен водзын, мый он ви менӧ да он сет менӧ аслам ыджыдӧйлы».

¹⁶ [Давид кыв сетіс.] Мӧдыс нуӧдіс. Воӧм бӧраныс аддзисны, мый быдлаӧ паськӧдчӧмаӧсь амаликъяс, найӧ сёйӧны-юӧны да гажӧдчӧны. Тадзи амаликъяс нимкодясисны, мый унатор вермисны курыштны Филистим да Иуда муясысь.

¹⁷ Асъядорыс Давид уськӧдчис на вылӧ да рытӧдзыс ставнысӧ виаліс. Сӧмын нёльсё том зон пышйисны верблюдъяс вылын.

¹⁸ Давид бӧр босьтіс ставсӧ, мый амаликъяс курыштісны, тшӧтш мездіс ассьыс кыкнан гӧтырсӧ.

¹⁹ Вӧлі мездӧма став йӧзсӧ ичӧтсянь ыджыдӧдз. Давид бӧр вайӧдіс быдӧнлысь ныв-писӧ, вайис став озырлунсӧ, мый амаликъяс босьтлісны.

²⁰ Асланыс ыж-мӧс водзвылын йӧзыс вӧтлісны амаликъяслысь ыж-мӧссӧ, мый Давид босьтіс. Йӧзыс шуалісны, тайӧ пӧ Давидлӧн шедӧдӧмтор.

²¹ Сэсся воисны кыксёыс дінӧ, кодъяс эбӧстӧмнысла кольччылісны Восор ю дорӧ. Найӧ воча петісны Давидлы да сылӧн йӧзлы. Давид матыстчис да чолӧмасис накӧд.

²² Давидкӧд ветлысьяс пӧвстын вӧліны тшӧтш лёк да шогмытӧм йӧз. Найӧ пондісны шуасьны: «Огӧ сетӧй налы амаликъяслысь мырддьӧмторйысь нинӧм, ӧд найӧ эз ветлыны миянкӧд. Мед босьтасны ассьыныс гӧтыръяснысӧ, ныв-пинысӧ да мунасны».

²³ Но Давид ӧлӧдіс: «Энӧ вӧчӧй тадзи, вокъяс. Ӧд ставсӧ тайӧс сетіс миянлы Господь. Сійӧ видзис миянӧс да сетіс миян киӧ амаликъясӧс, кодъяс уськӧдчисны мырддявны-пазӧдны миянӧс.

²⁴ Некод оз кут вӧчны тіян ног. [Найӧ абу лёкджыкӧсь миянысь.] Быдӧнлы ӧткодя юкам: тышӧ ветлысьяслы и налы, кодъяс кольччылісны эмбур видзны».

²⁵ Тайӧ кадсяньыс и ӧнӧдз Израильын тайӧ тшӧктӧмыс вына.

²⁶ Сиклагӧ воӧм бӧрын Давид мӧдӧдаліс шедӧдӧмторсьыс козинъяс Иуда войтырлӧн юрнуӧдысьяслы, аслас ёртъяслы. Давид тшӧктіс висьтавны, мый налы мӧдӧдӧмторсӧ мырддьӧма Господьӧс мустӧмтысьяслысь.

²⁷ Давид ыстіс козинъяссӧ Вефильӧ, лунвыв Рамотӧ, Яттирӧ, [Гефорӧ,]

²⁸ Ароэрӧ, [Аммадӧ,] Шифмотӧ, Эштемоаӧ, [Гефӧ,]

²⁹ [Кинанӧ, Сафенӧ, Фимафӧ,] Ракалӧ, Ерахмель рӧдлӧн да кеней войтырлӧн каръясӧ,

³⁰ Хормаӧ, Бор-Ашанӧ, Атакӧ,

³¹ Хевронӧ да быдлаӧ, кыті ветліс Давид аслас йӧзкӧд.