Ӧксыяслӧн 1 небӧг 3 - Коми Библия 2023

Господь шыасьӧ Самуил дінӧ

¹ Самуил зонка кесъяліс Господьлы Илий дорын. Сійӧ кадас Господьсянь кывъяс да петкӧдчылӧмъяс вӧліны зэв гежӧда.

² Ӧтчыд войнас Илий куйліс аслас вольпасьын. Сійӧ омӧля нин аддзис, синмыс вӧлі пемдӧма.

³ Самуил куйліс вежа керкаын, кӧні видзисны Енлысь кудсӧ. Кор Енлӧн би дозйын ӧзъяліс на биыс,

⁴ Господь шыасис Самуил дінӧ. [Шуис: «Самуил, Самуил».] Мӧдыс вочавидзис: «Ме тані».

⁵ Сэсся котӧртіс Илий дінӧ да шуис: «Ме тані. Тэ менӧ корин?» Илий вочавидзис: «Эг. Мун да бӧр вод». Самуил муніс да водіс.

⁶ Господь мӧдысь шыасис сы дінӧ. [Шуис: «Самуил, Самуил».] Самуил чеччис, бара локтіс Илий дінӧ да шуис: «Ме тані. Тэ корин менӧ?» Но Илий вочавидзис: «Эг, пиӧй. Мун да бӧр вод».

⁷ Самуил сэки эз на тӧд Господьӧс, и Господь эз на восьт кывсӧ сылы.

⁸ Господь нӧшта коймӧдысь шыасис Самуил дінӧ. Мӧдыс чеччис, муніс Илий дінӧ да шуис: «Ме тані. Тэ менӧ корин?» Сэки Илий гӧгӧрвоис, мый Господь чуксалӧ зонкаӧс.

⁹ Илий шуис Самуиллы: «Мун да бӧр вод. Кылан кӧ бара чукӧстӧмсӧ, сэки шу: висьтав, Господьӧй, Тэнад кесйӧгыд кывзӧ Тэнӧ». Самуил муніс да водіс.

¹⁰ Господь локтіс, сувтіс да воддза мозыс бара шыасис: «Самуил, Самуил!» Самуил вочавидзис: «Висьтав [Господьӧй], Тэнад кесйӧгыд кывзӧ Тэнӧ».

¹¹ Господь шуис Самуиллы: «Регыд Израильын Ме вӧча сэтшӧмтор, мый тайӧс кылӧмысь мортыслӧн кыкнан пеляс жуньгыны кутас.

¹² Сійӧ лунӧ Ме водзысяньыс помӧдзыс збыльмӧда ставсӧ, мый шулі Илий да сылӧн рӧд йылысь.

¹³ Ме шулі Илийлы, мый Ме мыжда сылысь рӧдсӧ пыр кежлӧ. Мыжда сыысь, мый сійӧ тӧдіс пияныслысь пеж вӧчӧмсӧ, но эз ӧлӧд найӧс.

¹⁴ Та вӧсна Ме кыв сетӧмӧн шуа Илий рӧдлы, мый висьяс да вайӧмторъяс некор оз вештыны Илий рӧдлысь мыжсӧ».

¹⁵ Самуил асылӧдзыс узис [но зэв водз чеччис]. Сэсся восьтіс вежа керкалысь ӧдзӧсъяссӧ. Сійӧ поліс висьтавны Илийлы, мый сылы войнас восьтіс Господь.

¹⁶ Но Илий корис Самуилӧс ас дорас да шуис: «Самуил пиӧй». Мӧдыс шуис: «Ме тані».

¹⁷ Илий юаліс: «Мый Енмыс висьталіс тэныд? Эн дзеб меысь. Мед Енмыс ёна мыждас тэнӧ, он кӧ висьтав меным ставсӧ».

¹⁸ Самуил висьталіс ставсӧ, нинӧм эз дзеб Илийысь. Сэки Илий шуис: «Сійӧ – Господь. Мед вӧчас, мый кӧсйӧ».

¹⁹ Самуил быдмис, Господь вӧлі сыкӧд. Ставсӧ, мый сійӧ висьтавліс Господь нимсянь, Господь збыльмӧдіс.

²⁰ Тадзи войвыв Дансянь лунвыв Бер-Шеваӧдз став Израиль тӧдмаліс, мый Самуилӧс Господь пуктӧма пророкӧ.

²¹ Сы бӧрын, кор Господь восьтіс Асьсӧ Самуиллы, Господь унаысь петкӧдчывліс Силомын. [Став Израиль му пасьтала йӧзыс эскисны, мый Самуил – Господьлӧн пророк. Илий ёна нин пӧрысьмис, а сылӧн пияныс водзӧ олісны шогмытӧма Господь водзын.]