Ӧксыяслӧн 1 небӧг 2 - Коми Библия 2023

Анналӧн ошкана кевмысьӧм

¹ Анна ошкӧмӧн кевмысис: – Господь гажӧдіс менсьым сьӧлӧмӧс, Сійӧ вылӧ кыпӧдіс менсьым юрӧс. Ме серала менӧ мустӧмтысьяс вылын, ме нимкодяся, ӧд Господь мездіс менӧ.

² Сӧмын Господь вежа, Сыысь кындзи мӧдыс абу. Миян Ен кодь дорйысьыс абу.

³ Энӧ ышнясьӧй асланыд сёрниясӧн, тіян вомысь мед оз петны тшап кывъяс. Ӧд Господь эм Ен, Сійӧ ставсӧ тӧдӧ, Сійӧ веситӧ уджъяснымӧс.

⁴ Вынаяслӧн ньӧввужйыс чегъясьӧ, а вынтӧмъяслӧн выныс содӧ.

⁵ Кодъяс вӧліны коркӧ пӧт кынӧмаӧсь, ӧні найӧ медасьӧны уджавны. Кодъяс водзынсӧ тшыгъялісны, ӧні найӧ шойччӧны. Сьӧктыны вермытӧм сизимӧс чужтӧ, а уна челядя нярмунӧ.

⁶ Господь босьтӧ олӧм и сетӧ сійӧс, лэдзӧ пыдӧстӧминӧ и лэптӧ сэтысь.

⁷ Господь гӧльмӧдӧ и озырмӧдӧ, улӧ пуктӧ и вылӧ кыпӧдӧ.

⁸ Коньӧрӧс Сійӧ лэптӧ бус пытшкысь, гӧльӧс перйӧ няйтысь, пуксьӧдӧ найӧс ыджыдалысьяскӧд орччӧн, сетӧ налы нималана пуклӧс. Господь кутӧ мулысь подувсӧ, сы вылӧ пуктӧма муюгыдсӧ.

⁹ Господь видзӧ кывзысьысьяслысь воськовъяссӧ, а лёк вӧчысьяс вошӧны пемыдас, ӧд мортлы оз отсав аслас выныс.

¹⁰ Господь бырӧдас Сылы паныд кыпӧдчысьясӧс, енэжсянь гымыштас на вылӧ. [Господь вежа. Мывкыда морт мед оз ошйысь аслас мывкыдлунӧн, вына мед оз ошйысь аслас вынӧн, озыр мед оз ошйысь аслас озырлунӧн. Но ошйысьысь мед ошйысьӧ сыӧн, мый гӧгӧрвоӧ да тӧдӧ Господьӧс.] Господь мыждас муюгыдын олысьясӧс. Сійӧ вынсьӧдас ӧксыӧс, кодӧс бӧрйис, Ассьыс мавтыштӧмаӧс вылӧ кыпӧдас.

¹¹ Сэсся Элкан гӧтырыскӧд бӧр муніс Рамаӧ. Пинысӧ найӧ колисны Илий поп дінӧ кесъявны Господьлы.

Илийлӧн пиян

¹² Илийлӧн пияныс вӧліны шогмытӧм йӧз, найӧ эз тӧдны Господьӧс

¹³ и эз пыдди пуктыны вись йылысь тшӧктӧмсӧ. Кор йӧзыс вайлісны вись, яйсӧ пуигӧн матыстчыліс поплӧн отсасьысь да куим вожа вилаӧн

¹⁴ перйыліс пӧртйысь, рачысь либӧ гырничысь яй. Вилаӧ шедӧм яйсӧ попъяс босьтлісны аслыныс. Тадзи найӧ вӧчлісны Силомын израильсаяслӧн вись вайӧм дырйи.

¹⁵ Весиг яйлысь госсӧ соттӧдз воліс поплӧн отсасьысь да шуліс вись вайысьлы: «Сет поплы уль яйсӧ пражитӧм вылӧ. Пуӧм яйсӧ сійӧ оз кӧсйы босьтны».

¹⁶ Вись вайысь кӧ шуліс: «Ог. Медводз госсӧ колӧ сотны, сэсся верман босьтны яйсӧ мыйта колӧ», сэки поплӧн отсасьысь воча шуліс: «Он кӧ сет, мырдӧн босьта».

¹⁷ Илий пиянлӧн мыжыс Господь водзын вӧлі зэв ыджыд, ӧд найӧ эз пыдди пуктыны Господьлы вись вайӧмсӧ.

¹⁸ А Самуил зонка кесъяліс Господь водзын, новліс шабдіысь вурӧм ефод.

¹⁹ Быд во мамыс вурліс Самуиллы вылыс паськӧм да вайліс сійӧс, кор верӧсыскӧд воліс Силомӧ вись вайны.

²⁰ Элканӧс да сылысь гӧтырсӧ бурсиӧмӧн Илий шуис: «Господьлы питӧ сетӧмысь Господь мед тайӧ гӧтырыд пыр нӧшта на сетас тэныд ныв-пиӧс». Сэсся Элкан да Анна бӧр мунісны гортаныс.

²¹ Господь эз вунӧд Аннаӧс. Сійӧ чужтіс нӧшта куим пиӧс да кык нылӧс. А Самуил пиыс быдмис Господь водзын.

²² Илий вӧлі ёна нин пӧрысь. Сылы кывсис, мый Израиль войтырлӧн вись вайигӧн сылӧн пияныс шогмытӧмтор вӧчӧны, и нӧшта на, мый узьлӧны аньяскӧд, кодъяс кесъялӧны вежа чом пыранінын.

²³ Илий шуис пияныслы: «Мыйла ті тадзи вӧчанныд? Ме кыла тіян йылысь лёк сёрнияс [Господьлӧн] войтырсянь.

²⁴ Дугдӧй, пиянӧй, вӧчны пежсӧ. Ог бурторъяс ме кыв тіян йылысь. Господьлӧн войтырыс лёктор висьталӧ тіян йылысь.

²⁵ Морт кӧ мыжмас морт водзын, сэки сы вӧсна верман кевмысьны Енлы. А мыжмас кӧ Господь водзын, сэки коді лоӧ сылы дорйысьнас?» Но пияныс эз кывзыны батьсӧ, ӧд Господьлӧн вӧлі шуӧма нин бырӧдны найӧс.

²⁶ Самуил зонка лунысь-лун быдмис-верстяммис, сійӧ вайис нимкодьлун Господьлы и йӧзыслы.

Илий рӧд йылысь пророкалӧм

²⁷ Илий дінӧ локтіс Енлӧн морт да шуис: «Господь тадзи висьталӧ: ”Ме восьті Ачымӧс тэнад батьяслы, кор найӧ Египетын вӧліны фараонлӧн кесйӧгъясӧн.

²⁸ Ме бӧрйи тэнсьыд рӧдтӧ став Израиль чужанкотырысь да пукті найӧс попъясӧн, медым найӧ кесъялісны Меным висьпуктанін дорын, тшынӧдісны чӧскыд ӧвтанторъяс да новлісны ефод Ме водзын. Ме тшӧкті, мед тэнад рӧдыд босьтас Израиль войтырлӧн сотӧм висьясысь юкӧн.

²⁹ Мыйла ті нинӧмӧ пуктанныд Меным вайӧм висьяссӧ да вайӧмторъяссӧ, мый Ме тшӧкті вайны Аслам керкаӧ? Мыйла тэ ассьыд пиянтӧ пуктан Меысь вылӧджык? Ті тшӧгӧдчанныд медбур яйнас, мый вайӧ Меным Израиль войтырӧй.

³⁰ Ме кӧсйыси, – висьталӧ Господь, Израильлӧн Ен, – мый тэнад рӧдыд да батьыдлӧн рӧдыс пондасны пыр кесъявны Меным. Но ӧні оз ло тадзи, – висьталӧ Господь. – Ме пыдди пукта Менӧ пыдди пуктысьясӧс да янӧда Менӧ лёкӧдысьясӧс.

³¹ Воасны лунъяс, кор Ме орӧда тэнсьыд да тэнад рӧдлысь олан вынсӧ. Тэнад рӧдын дыр олысьыс оз ло.

³² Тэ аддзан, кутшӧм ыджыд шог суас Менсьым керкаӧс. Ме кута бурсӧ вӧчны Израиль войтырлы, но тэнад рӧдын дыр олысьыс оз ло.

³³ Тэнад рӧдысь Ме ог ставнысӧ вешты Аслам висьпуктанін дорысь. Вешта кӧ, сэки бӧрдӧмсьыд синмыд пемдас да сьӧлӧм дойсьыд морӧсыд топалас. Но тэнад рӧдын став чужысьыс пондас кувны томӧн.

³⁴ Офни да Пинес пияныд куласны ӧти лунӧ, и тайӧ лоӧ тэныд пас, мый Менам кывъясӧй инасны.

³⁵ Аслым Ме сувтӧда попӧс, коді кутас кывзысьны Менсьым да збыльмӧдны Менсьым кӧсйӧмӧс. Сылысь рӧдсӧ вӧча зумыдӧн. Став олӧм чӧжыс сійӧ кутас кесъявны Менам мавтыштӧма водзын.

³⁶ А найӧ, кодъяс ловйӧн колясны тэнад рӧдысь, локтасны да копыртчыласны сьӧм да няньтор вӧсна тайӧ попыслы. Шуасны, сет пӧ миянлы кутшӧмкӧ левит удж, мед кынӧмпӧт шедӧдны”».