Ӧксыяслӧн 1 небӧг 14 - Коми Библия 2023

Ионафан уськӧдчӧ филистимсаяс вылӧ

¹ Ӧтчыд Сауллӧн Ионафан пиыс шуис шыпурт новлӧдлысь кесйӧгыслы: «Мунам сёртас мӧдарладорас филистимса тышкакотыр дінӧ». Но аслас батьыслы та йылысь эз висьтав.

² Саул вӧлі Гива кар дорын Мигронын, гранат пу улын. Сыкӧд сэки вӧлі квайтсё гӧгӧр морт.

³ На пӧвстын вӧлі Ахий, Силомын Господьлы кесъялысь поп, кодлӧн вӧлі ефод. Ахий вӧлі Ахитувлӧн пи. Ахитув вӧлі Икаводлӧн вок, найӧ вӧліны Пинеслӧн пиян, а Пинес вӧлі Илий поплӧн пи. Сауллӧн йӧзыс эз тӧдлыны Ионафанлысь мунӧмсӧ.

⁴ Ионафан кӧсйис матыстчыны филистимса тышкакотыр дінӧ кык ёсь изкырта костын сулалысь сёртасӧд. Ӧтиыслӧн нимыс вӧлі Босес, мӧдыслӧн – Сене.

⁵ Ӧтиыс чурвидзис войвывладорсянь да видзӧдіс Микмаслань, мӧдыс чурвидзис лунвывладорсянь да видзӧдіс Гевалань.

⁶ Ионафан шуис аслас кесйӧглы: «Лок мунам тайӧ вундыштчытӧм тышкакотырыс дінӧ. Гашкӧ, Господь отсалас миянлы. Сійӧ вермӧ мездыны Ассьыс войтырсӧ уна йӧз пыр либӧ некымын морт пыр».

⁷ Кесйӧгыс вочавидзис: «Вӧч, кыдзи сьӧлӧмыд висьталӧ. Ме тэкӧд. Муна, кытчӧ шуан».

⁸ Ионафан шуис: «Ми мунам филистимсаяс дінӧ да петкӧдчам налы.

⁹ Найӧ кӧ шуасны миянлы, сувтӧй, ми пӧ асьным матыстчам тіян дінӧ, сэки ми сувтам да огӧ кайӧй на дінӧ.

¹⁰ А тшӧктасны кӧ кайны на дінӧ, ми каям. Тайӧ лоӧ миянлы пасӧн, мый Господь сетіс найӧс миян киӧ».

¹¹ Кор Ионафан аслас кесйӧгкӧд петкӧдчис филистимса тышкакотырлы, филистимсаяс пондісны шуасьны, видзӧдлӧй пӧ, еврейяс петалӧны сайӧдчанінсьыныс.

¹² Найӧ горӧдісны Ионафанлы да сылӧн кесйӧглы: «Кайӧй миян дінӧ, мыйкӧ висьталам тіянлы». Ионафан шуис кесйӧгыслы: «Лок ме бӧрся. Господь сетіс найӧс Израиль киӧ».

¹³ Кинас и кокнас кутчысьӧмӧн Ионафан кавшасис вывлань. Кесйӧгыс сы бӧрся. Ионафан водзын филистимсаяс усьласисны муас. Кесйӧгыс муніс Ионафан бӧрся да виаліс найӧс.

¹⁴ Тайӧ медводдза уськӧдчылӧм дырйи Ионафан да сылӧн кесйӧгыс виисны матӧ кызь мортӧс. Тышыс муніс ичӧтик эрд вылын, кодӧс позис лун джынйӧн гӧрны кык ӧшкӧн.

¹⁵ Филистимсаяслӧн чукӧртчанінын да тышкасянінын став йӧзыс зэв ёна повзисны. Водзын мунысь да мусӧ куштысь тышкакотыръясӧс дзӧрӧм босьтіс. [Найӧ весиг эз кӧсйыны тышӧ петны.] Муыс сыркмунліс. Господь ыстіс йӧзыслы полӧм.

¹⁶ Венямин муын Гива карын Сауллӧн тышкайӧзыс аддзисны, мый филистимсаяс пышйӧны коді кытчӧ.

¹⁷ Сэки Саул шыасис аслас йӧз дінӧ, тӧдмалӧй пӧ, эз-ӧ кодкӧ миян пӧвстысь тышӧ пет. Видзӧдлісны да, Ионафан да сылӧн кесйӧгыс абуӧсь.

¹⁸ Саул тшӧктіс Ахий поплы вайны Енлысь кудсӧ. Енлӧн кудйыс сэки вӧлі Израиль ордын.

¹⁹ Кор Саул да Ахий поп сёрнитісны на, филистимса тышкайӧзлӧн шызьӧмыс [паськаліс да] ӧтарӧ содіс. Сэки Саул шуис Ахийлы: «Кудйыд оз нин ков».

²⁰ Саул чукӧртіс ассьыс тышкайӧзсӧ, и найӧ котӧртісны тышкасянінӧ. Филистимсаяс сэтшӧма вӧлі шӧйӧвошӧмаӧсь, мый виалісны ӧта-мӧднысӧ.

²¹ Еврейяс, кодъяс водзынсӧ вӧліны филистимса дор да ветлывлісны накӧд тышӧ, вуджисны Сауллӧн да Ионафанлӧн йӧз дінӧ, асланыс Израиль войтыр дінӧ.

²² Ефрем керӧсвыв муын дзебсясьысь израильсаяс кор кылісны, мый филистимсаяс пышйӧны, тшӧтш ӧтувтчисны израильса тышкайӧзкӧд да петісны тышӧ.

²³ Сійӧ лунӧ Господь мездіс Израиль войтырӧс. Тышыс воис Бет-Авенӧдз. [Саулкӧд ставнас йӧзыс вӧлі дас сюрс морт. Тышыс муніс Ефрем керӧсвыв му пасьтала, став карас.]

²⁴ Израильса тышкайӧз вӧлі ёна мудзӧмаӧсь. Ӧд таӧдз Саул шуис налы: «Ёрӧма быдӧнӧс, коді рытӧдзыс, вӧрӧглысь водзӧс перйытӧдз, мыйкӧ сёяс». Сійӧ [мӧвпышттӧг] тшӧктіс тышкайӧзыслы кыв сетны. Та вӧсна найӧ нинӧм эз сёйны.

^25-26 Став тышкайӧзыс мунісны вӧрӧ. Сэні вӧліны мазі позъяс, маыс весиг войталіс му вылас. Вӧрӧ пыриганыс найӧ аддзисны масӧ, но некод эз инмӧдчы, ӧд полісны ёрӧмысь.

²⁷ Ионафан эз кывлы, мый батьыс тшӧктӧма йӧзыслы кыв сетны. Сійӧ нюжӧдіс ассьыс бедьсӧ да чуньыштіс мазі позйысь масӧ. Масӧ видлӧм бӧрын сылӧн синмыс югзис.

²⁸ Ӧти морт шуис Ионафанлы: «Тэнад батьыд тшӧктіс йӧзыслы кыв сетны. Шуис, коді пӧ талун сёяс, сійӧс лоӧ ёрӧма. Сёйтӧмнысла йӧзыслӧн эбӧсыс бырис».

²⁹ «Шог суис тайӧ войтырсӧ батьӧй вӧсна», – майшасис Ионафан. Сэсся шуис: «Видзӧдлӧй, менам синмӧй югзис масӧ видлӧм бӧрын.

³⁰ Талун кӧ йӧзыс сёйыштісны вӧрӧгӧн кольӧм сёян, позис эськӧ унджык филистимсаӧс пасьвартны».

³¹ Сійӧ лунӧ израильсаяс вӧтлісны филистимсаясӧс Микмассянь Аялонӧдз. Йӧзыс дзикӧдз эбӧстӧммисны.

³² Сэки найӧ уськӧдчисны босьтавны филистимсаяслысь ыжъяссӧ, ӧшъяссӧ да куканьяссӧ. Сэсся му вылас начкисны найӧс да сёйисны яйсӧ вир сорнас.

³³ Сауллы висьталісны, тэнад йӧзыд пӧ мыж вӧчӧны Господьлы паныд – сёйӧны вир сора яй. Саул шуис йӧзыслы: «Ті мыжминныд. Путкыльтӧй меным татчӧ ыджыд из».

³⁴ Сэсся шуис: «Мунӧй да висьталӧй йӧзыслы, мед быдӧн вайӧдас ме дінӧ ассьыс ӧшсӧ да ыжсӧ. Тані начкысьӧй да сёйӧй. Дугдӧй мыж вӧчны Господьлы паныд – энӧ сёйӧй вир сора яйсӧ». Войнас быдӧн вайӧдіс ассьыс ӧшсӧ [либӧ ыжсӧ] да начкис

³⁵ Господьлы вӧчӧм висьпуктанін вылын. Тайӧ вӧлі Саулӧн сувтӧдӧм висьпуктанінъясысь медводдзаыс.

³⁶ Сэсся Саул шуис аслас тышкайӧзлы: «Петамӧй войнас да вӧтӧдам филистимсаясӧс. Югдытӧдзыс топӧдам найӧс да весиг ӧти мортӧс ловйӧн огӧ кольӧй». Найӧ вочавидзисны: «Вӧч, кыдзи бурджык чайтан». Но поп шуис: «Шыасямӧй Ен дінӧ».

³⁷ Саул кевмысигас юаліс Енлысь: «Вӧтӧдны-ӧ меным филистимсаясӧс? Сетан-ӧ найӧс Израиль киӧ?» Но Енмыс сійӧ лунӧ эз вочавидз сылы.

³⁸ Сэки Саул корис ас дінас став израильса юралысьсӧ да шуис: «Тӧдмалӧй, коді мыжсӧ вӧчис.

³⁹ Израильӧс мездысь ловъя Господь водзын шуа: весиг кӧ менам Ионафан пиӧй мыжа, сійӧ ловйӧн оз коль». Став йӧзыс чӧв олісны.

⁴⁰ Саул шуис израильса тышкайӧзлы: «Ті сувтӧй ӧтарладорас, а ме аслам Ионафан пикӧд сувта мӧдарладорас». Йӧзыс воча шуисны: «Вӧч, кыдзи бурджык чайтан».

⁴¹ Саул шыасис Господь дінӧ: «Господьӧй, Израильлӧн Енмӧй! [Мыйла Тэ талун эн вочавидз меным, Аслад кесйӧглы?] Уримӧн да туммимӧн пудъясьӧм пыр петкӧдлы миянлы мыжаясӧс. Мыжа кӧ ме либӧ менам Ионафан пиӧй, мед усьӧ урим. [Мыжа кӧ Тэнад Израиль войтырыд, мед усьӧ туммим.]» Сэки Енмыс индіс, мый мыжаӧсь Ионафан да Саул, а йӧзыс абу мыжаӧсь.

⁴² Саул шуис: «Пудъясьӧй ме да менам Ионафан пиӧй вӧсна». [Сійӧ содтіс: «Код вылӧ Господь индас, сылы и ковмас кувны». Но йӧзыс шуисны Сауллы: «Мед оз ло тадз!» Но Саул сулаліс аслас шуӧм кыв вылын. Сэсся пудъясисны.] Пудйыс уси Ионафан вылӧ.

⁴³ Саул юаліс Ионафанлысь: «Висьтав, мый тэ вӧчин?» Ионафан висьталіс: «Тайӧ бедь помнас ме видлі ма. Сідзкӧ, меным кувны».

⁴⁴ Саул воча шуис: «Енмыс мед ёна мыждас менӧ, тэ кӧ, Ионафан, талун он кув».

⁴⁵ Йӧзыс шуисны Сауллы: «Мед оз ло тадз! Сійӧ ӧд вайис Израильлы ыджыд вермӧм да мездӧм. Ми кыв сетам ловъя Господь водзын: сылӧн юр вывсьыс весиг юрси сі оз усь. Ен отсӧгӧн талун сійӧ вермис филистимсаясӧс». Тадзи йӧзыс мездісны Ионафанӧс, и сійӧ ловйӧн коли.

⁴⁶ Саул бӧр бергӧдчис, эз кут водзӧ вӧтӧдны филистимсаясӧс. Филистимсаяс жӧ мунісны асланыс муӧ.

Сауллӧн тышъяс

⁴⁷ Сауллӧн ӧксыалӧмыс Израильын зумыдмис. Сійӧ тышкасис Израиль гӧгӧр олысь вӧрӧгкӧд: моав да аммон войтыръяскӧд, эдомсаяскӧд [да вефорсаяскӧд], цоваса ӧксыяскӧд да филистимсаяскӧд. Код вылӧ сійӧ уськӧдчыліс, ставнысӧ вермыліс.

⁴⁸ Амаликъясӧс пасьвартӧмнас Саул петкӧдліс ассьыс вынсӧ. Сійӧ мездіс Израильӧс куштысьяс киысь.

⁴⁹ Сауллысь пиянсӧ шуисны Ионафан, Ишви да Малкисуй. Нӧшта сылӧн вӧлі кык ныв: ыджыдыслӧн нимыс вӧлі Мерова, ичӧтыслӧн – Мелкола.

⁵⁰ Сауллӧн гӧтырыс вӧлі Ахимааслӧн Ахиноама нылыс. Сауллӧн Нир дядьыслӧн Авенир пиыс веськӧдліс Сауллӧн тышкайӧзӧн.

⁵¹ Сауллӧн Кис батьыс да Авенирлӧн Нир батьыс вӧліны Авиэллӧн пиян.

⁵² Сауллӧн ӧксыалан кадӧ израильсаяс дугдывтӧг чорыда тышкасисны филистимсаяскӧд. Кор Саул аддзывліс Израиль войтыр пӧвстысь ён да збой мортӧс, босьтліс сійӧс аслас тышкайӧз лыдӧ.