Ӧксыяслӧн 1 небӧг 10 - Коми Библия 2023

Самуил мавтыштӧ Саулӧс

¹ Самуил босьтіс вый тыра доз да кисьтіс Сауллы юр вылас. Сэсся окыштіс сійӧс да шуис: «Господь мавтыштӧма тэнӧ, мед пуктыны тэнӧ юралысьӧ Аслас войтырлы [Израильын. Тэ лоан ӧксыӧн Господьлӧн войтырлы, мездан найӧс на гӧгӧр олысь вӧрӧгъясысь. Со, тэныд пас, мый Ачыс Господь мавтыштӧма тэнӧ ӧксыӧ, мед веськӧдлыны Сылӧн войтырӧн].

² Ме дорысь мунӧм бӧрын Венямин муын Селсаын Ракель дзебанін дорын тэ паныдасян кык морткӧд. Найӧ шуасны тэныд: ”Осёлъясыд, кодъясӧс тэ корсян, сюрисны. Батьыд вунӧдіс нин найӧс, ӧд сійӧ майшасьӧ тэ вӧсна. Юасьӧ, мый пӧ меным вӧчны”.

³ Сэтысянь водзӧ мунан да воан Тавор тупуа раскӧ. Сэні тэ паныдасян Вефильӧ Ен дінӧ мунысь куим морткӧд: ӧтиыс нуӧ куим кӧзапи, мӧдыс – куим нянь, коймӧдыс – кучик дозйын вина.

⁴ Найӧ чолӧмасясны тэкӧд да сетасны тэныд кык нянь, и тэ босьтан няньсӧ.

⁵ Та бӧрти тэ воан Енлӧн керӧс вылӧ, кӧні сулалӧны филистимса тышкайӧз [асланыс юралысьяскӧд]. Карас пыригад тэ паныдасян вись ваян мыльк вылысь лэччысь пророкъяскӧд. Ставныс найӧ пророкалӧны, а на водзвылын мунӧны арфаӧн, тимпанӧн, пӧлянӧн да гуслиӧн ворсысьяс.

⁶ Господьлӧн Лолыс лэччас тэ вылӧ, и накӧд тшӧтш тэ кутан пророкавны да лоан мӧдпӧлӧс мортӧн.

⁷ Кор тайӧ ставыс инас, сэки вӧч, мый вермана тэныд вӧчнысӧ, ӧд тэкӧд лоӧ Ен.

⁸ Сэсся мун Галгалӧ. Ме локта сэтчӧ тэ дінӧ, мед вайны сотан да бурасян висьяс. Виччысь менӧ сэні сизим лун. Ме локта да висьтала, мый тэныд вӧчнысӧ».

⁹ Сӧмын Саул бергӧдчис, мед мунны Самуил дорысь, Енмыс сетіс сылы выль сьӧлӧм. Сійӧ лунӧ иніс ставыс, мый Самуил шуис Саул йылысь.

¹⁰ Вись ваян мыльк дорӧ воигӧн Саул да кесйӧгыс паныдасисны пророкъяскӧд. Сэки Енлӧн Лов лэччис Саул вылӧ, и сійӧ накӧд тшӧтш кутіс пророкавны.

¹¹ Саулӧс тӧдысьяс кор аддзисны, мый сійӧ пророкъяскӧд тшӧтш пророкалӧ, ӧта-мӧдныслысь юасисны: «Мый лоӧма Кислӧн пикӧд? Саулыс ӧмӧй тшӧтш пророк?»

¹² Йӧз пӧвстысь кодкӧ шуис: «А мукӧдыс нӧ кодлӧн пияныс?» Тайӧ лоӧмтор бӧрас паськаліс Саул йылысь шуӧм: «Саул ӧмӧй тшӧтш пророк?»

¹³ Пророкавны дугдӧм бӧрын Саул кайис вись ваян мыльк вылӧ.

¹⁴ Сауллӧн дядьыс юаліс сылысь да кесйӧгыслысь: «Кӧні ті вӧлінныд?» Саул вочавидзис: «Осёлъясӧс ветлім корсьны. Найӧс ми эгӧ аддзӧй, та вӧсна мунім Самуил дінӧ».

¹⁵ Дядьыс шуис: «Висьтав, мый тіянлы шуис Самуил».

¹⁶ Саул вочавидзис: «Сійӧ шуис, осёлъясыд пӧ сюрисны нин». А мый Самуил шуис сійӧс ӧксыӧ пуктӧм йылысь, дядьыслы Саул эз висьтав.

Саул лоӧ ӧксыӧн

¹⁷ Самуил чукӧртіс Израиль войтырӧс Миспаӧ Господь водзӧ.

¹⁸ Налы шуис: «Господь, Израильлӧн Ен, тадзи висьталӧ: ”Ме петкӧді тіянӧс Египетысь, мезді египетсаяслӧн кипод улысь да тіянӧс нартитысь мукӧд войтыръяслӧн кипод улысь”.

¹⁹ Но ті ӧтдортінныд ассьыныд Еннытӧ, коді мездӧ тіянӧс быд лёксьыс да сьӧкыдлунсьыс. Ті шуинныд Сылы: ”Пукты миянлы ӧксыӧс”. Сідзкӧ, ӧні сувтӧй Господь водзӧ – быдӧн асланыд чужанкотыр да рӧд сертиныд».

²⁰ Самуил тшӧктіс матыстчыны израильса быд чужанкотырлы. На пиысь пудъясьӧмӧн вӧлі бӧрйӧма Веняминлысь чужанкотырсӧ.

²¹ Сэсся тшӧктіс Венямин чужанкотырысь матыстчыны быд рӧдлы. Пудйыс уси Матри рӧдлы. Матри рӧдысь Самуил корис став айуловсӧ, и пудйыс уси Сауллы, Кислӧн пилы. Кутісны корсьны сійӧс, но эз аддзыны.

²² Сэки юалісны Господьлысь, локтас оз Саул. Господь вочавидзис, сійӧ пӧ кӧлуй чукӧр пытшкын дзебсясьӧ.

²³ Котӧрӧн мунісны да вайӧдісны сэтысь Саулӧс. Йӧз пӧвстас сувтіс да, ставсьыс юрӧн ыджыд вӧлі.

²⁴ Самуил шуис став Израиль войтырлы: «Аддзанныд, кодӧс бӧрйис Господь? Войтыр пӧвстаным мӧдыс сы кодьыс абу». Сэки став йӧзыс гораа горӧдісны: «Мед олас ӧксы!»

²⁵ Самуил висьталіс войтырыслы, мый вермас вӧчны накӧд ӧксы. Ставсӧ тайӧс гижис небӧгӧ да пуктіс вежаинӧ Господь водзӧ. Сэсся лэдзис войтырсӧ мунны гортаныс.

²⁶ Саул тшӧтш муніс гортас Гиваӧ. Сыкӧд ӧтлаын мунісны збой йӧз, кодъяслы сьӧлӧмас инмӧдчис Енмыс.

²⁷ А шогмытӧм йӧз шуасисны, кутшӧм пӧ сійӧ мездысь миянлы. Найӧ нинӧмӧ пуктісны Саулӧс, эз вайны сылы козинъяс. Но Саул быттьӧ эз казяв тайӧс.