Ӧксыяслӧн 1 небӧг 1 - Коми Библия 2023

Анналӧн кевмысьӧм

¹ Ефрем керӧсвыв муын, Раматаим-Зофим карын, оліс Элкан нима морт. Рӧднас сійӧ вӧлі Епрафаысь. Сійӧ вӧлі Ерохамлӧн пи, Ерохам – Элихулӧн, Элиху – Тохулӧн, Тоху – Цуфлӧн.

² Элканлӧн вӧлі кык гӧтыр: ӧтисӧ шуисны Аннаӧн, мӧдсӧ – Пениннаӧн. Пенинналӧн вӧлі челядьыс, а Анналӧн эз вӧв.

³ Быд во, урчитӧм лунъясӧ, Элкан ветлывліс Силом карӧ, мед юрбитны да вись вайны Господь Саваофлы. Попъясӧн сэні вӧліны Илийлӧн кык пиыс: Офни да Пинес.

⁴ Вись ваян лунӧ Элкан сетліс Пенинна гӧтырыслы да ныв-пиыслы вись пыдди вайӧм яйысь юкӧн.

⁵ Анналы жӧ сійӧ чуктӧдліс торъя юкӧн, ӧд сійӧс [ёнджыка] радейтіс, кӧть сылы Господь эз сет чужтыны ныв-пиӧс.

⁶ Пенинна ёна дӧзмӧдліс Аннаӧс. Кӧсйис, мед эськӧ Анна кутіс шуасьны Господь вылӧ ныв-пи абутӧмсьыс.

⁷ Тадзи вӧлі воысь-во: Анна ветліс Господьлӧн керкаӧ, а Пенинна ёна дӧзмӧдліс сійӧс. Анна бӧрдліс да весиг эз сёйлы,

⁸ но Элкан верӧсыс бурӧдліс сійӧс: «Анна, мыйла тэ бӧрдан? Мыйла он сёй? Мыйысь шогсьӧ тэнад сьӧлӧмыд? Ме ӧмӧй тэныд абу бурджык дас пи дорысь?»

⁹ Ӧтчыд Силомын сёйӧм-юӧм бӧрын Анна сувтіс [Господь водзӧ юрбитны]. Господьлӧн керка ӧдзӧс дорын пукаліс Илий поп аслас пуклӧсын.

¹⁰ Анналӧн сэтшӧма шогсис сьӧлӧмыс, мый сійӧ кыз синваӧн бӧрдіс-кевмысис Господьлы.

¹¹ Анна кыв сетіс Сылы: «Господь Саваоф, [Ставсӧвермысь Енмӧй,] эн вунӧд менӧ, Ассьыд кесйӧгтӧ! Видзӧдлы менам шогсьӧм вылӧ, казьтышт менӧ! Господьӧй, сетан кӧ меным пиӧс, ме сета сійӧс Тэныд пыр кежлӧ. Сійӧ [вина-сур оз кут юны,] юрсисӧ некор оз шыр».

¹² Анна дыр кевмысис Господьлы, а Илий та дырйи видзӧдіс сылӧн вом вылӧ.

¹³ Анналӧн гӧлӧс шыыс эз кыв. Сійӧ ас пытшкас кевмысис, сӧмын вомдоръясыс вӧрыштісны. Та вӧсна Илий чайтіс, мый сійӧ код юра.

¹⁴ Илий шуис Анналы: «Дыр-ӧ на тэ кутан кодавны? Пальӧдчы! [Мун Господь водзысь!]»

¹⁵ Мӧдыс вочавидзис: «Ыджыдӧй, вина-сур ме эг ю. Ме зэв шудтӧм ань, та вӧсна сьӧлӧмӧс ме личӧді Господь водзын.

¹⁶ Эн лыддьы менӧ, ассьыд кесйӧгтӧ, шогмытӧм нывбабаӧн. Ыджыд шогӧй вӧсна ме дыр кевмыси».

¹⁷ Илий вочавидзис: «Мун лӧнь сьӧлӧмӧн. Израильлӧн Ен мед сетас тэныд, мый тэ корин Сылысь».

¹⁸ Анна шуис: «Ло бур сьӧлӧма аслад кесйӧг дінӧ». Сэсся Анна муніс, кутіс сёйны, и эз нин шогсьы воддза мозыс.

¹⁹ Мӧд асывнас Элкан водз чеччис аслас гортсаяскӧд. Господьлы юрбитӧм бӧрын найӧ мӧдӧдчисны гортаныс Рамаӧ. Локтӧм бӧрас Элкан узис Аннакӧд, и Господь вочавидзис Анналӧн кевмысьӧм вылӧ.

²⁰ Анна кутіс нӧбасьны. Кад мысти сійӧ чужтіс пиӧс да пуктіс сылы Самуил ним, ӧд шуис, Господьлысь [Ен Саваофлысь] пӧ ме кори сійӧс.

²¹ Кор Элкан став аслас гортсакӧд бара мӧдӧдчис Силомӧ, мед вайны Господьлы быдвося вись да кыв сетан вись [да аслас мувыв быдтасысь дасӧд юкӧнсӧ],

²² Анна накӧд эз мун. Сійӧ шуис верӧсыслы: «Кор каганым быдмыштас да дугдас нёнясьны, сэки ме вайӧда сійӧс Силомӧ Господь водзӧ, и сійӧ кольччас сэтчӧ пыр кежлӧ».

²³ Верӧсыс шуис сылы: «Вӧч, кыдзи шуан. Ов гортын, кытчӧдз он торйӧд кагатӧ морӧссьыд. Господь мед збыльмӧдас Ассьыс кывсӧ». Анна кольччис гортас. Сійӧ нёньӧдіс писӧ, кытчӧдз кагаыс эз эновтчы мам морӧсысь.

²⁴ Та бӧрын Анна вайӧдіс писӧ Силомӧ Господьлӧн керкаӧ. Сьӧрсьыс вайисны куим ӧшкӧс, [нянь,] ефа мында пызь да кучик дозйын вина. Пиыс сэки вӧлі ичӧт на.

²⁵ [Пинысӧ вайӧдісны Господь водзӧ. Батьыс вайис быдвося вись.] Сэсся начкисны ӧшкӧс да нуӧдісны писӧ Илий поп дінӧ.

²⁶ Анна шуис: «Ыджыдӧй, ме кыв сета тэ водзын, мый ме дзик сійӧ аньыс, коді коркӧ сулаліс тані тэ водзын да кевмысис Господьлы.

²⁷ Тайӧ кагасӧ ме сэки кори Господьлысь, и Господь сетіс сійӧс меным.

²⁸ Ӧні ме сета сійӧс Господьлы. Мед сійӧ кесъялас Господьлы олӧм чӧжыс». Найӧ юрбитісны сэні Господьлы.