Неемий 9 - Коми Библия 2023

Израиль войтыр висьтасьӧ мыжъясысь

¹ Кызь нёльӧд лунӧ сійӧ жӧ тӧлысьнас Израиль войтыр чукӧртчис, мед видзавны. Найӧ пасьталісны шогалан паськӧм да коялісны юрнысӧ муӧн.

² Израиль войтыр торйӧдчис мукӧд войтыръясысь. Найӧ сувтісны да висьтасисны асланыс мыжъясысь да батьясныслӧн мыжъясысь.

³ Найӧ сулалісны куим час чӧж, кор налы лыддисны Господь Енлысь Индӧдсӧ. Сэсся найӧ куим час чӧж копыртчӧмӧн висьтасисны мыжъяссьыныс Господьлы, асланыс Енлы.

⁴ Исус, Бани, Кадмиэл, Шеваний, Бунни, Шеревий, Бани да Кенани сувтісны левитъяслы лӧсьӧдӧм сод вылӧ да гораа кевмысисны Господьлы, асланыс Енлы.

⁵ Сэсся Исус, Кадмиэл, Бани, Хашавни, Шеревий, Ходий, Шеваний да Петахий левитъяс шуисны: «Сувтӧй да ошкӧй Господьӧс, ассьыныд Ентӧ, ӧні да нэмъяс чӧж! Господьӧй, мед лоӧ кыпӧдӧма Тэнсьыд ыджыд нимтӧ! Сійӧ став ошкӧмсьыс медвылын!»

⁶ [Ездра шыасис]: – Тэ – ӧти Господь! Тэ вӧчин енэжсӧ, енэжвыв енэжъяссӧ да вынъяссӧ, мусӧ да ставсӧ, мый сы вылын, саридзсӧ да ставсӧ, мый сэні эм. Тэ ставыслы сетан олӧм, енэжвыв вынъяс копрасьӧны Тэныд!

⁷ Тэ – Господь Ен. Тэ бӧрйин Ӧврамӧс, петкӧдін сійӧс Калдея Урысь, сетін сылы Ӧвраам ним.

⁸ Тэ аддзин, мый сылӧн сьӧлӧмыс эскана Тэ водзын. Тэ кӧрталін сыкӧд йитӧд, мед сетны [сылы да] сысянь чужысьяслы ханаан, хеттей, аморей, перезей, евус да гергесей войтырлысь муяссӧ. Ассьыд кывтӧ Тэ кутін, ӧд Тэ – веськыд.

⁹ Тэ аддзин миян батьяслысь Египетын сьӧкыдалӧмсӧ, кылін налысь горзӧмсӧ Гӧрд саридз дорын.

¹⁰ Тэ петкӧдлін индысьпасъяс да шензьӧданаторъяс фараонлы, сылӧн кесйӧгъяслы да сылӧн муын став олысьыслы, ӧд Тэ тӧдін, кутшӧм ёна египетса увтыртісны миянлысь батьяснымӧс. Тэ кыпӧдін Ассьыд нимтӧ, ӧнӧдз сійӧ ошкана.

¹¹ Миян батьяс водзын Тэ шӧри поткӧдін саридз, и найӧ вуджисны сійӧс косінті. На бӧрся вӧтчысьясӧс Тэ вӧйтін джуджыд саридзӧ, изйӧс моз шыбитін бузгысь ваӧ.

¹² Луннас Тэ нуӧдін найӧс кымӧр сюръяӧн, войнас Тэ югзьӧдін налысь туйсӧ биа сюръяӧн.

¹³ Тэ лэччин Синай керӧс вылӧ, сёрнитін накӧд енэжсяньыс, сетін налы веськыд Индӧд, бур шуӧмъяс да тшӧктӧмъяс.

¹⁴ Тэ сетін налы тшӧктӧм Аслад вежа шойччан лун йылысь, юӧртін Аслад Мӧисей кесйӧг пыр индӧд-тшӧктӧмъястӧ.

¹⁵ Тшыгъяліганыс Тэ сетін налы енэжсянь нянь, горш косьмиганыс Тэ изкыртаысь перйин налы ва. Тэ тшӧктін налы мунны да босьтны аслыныс му, мый китӧ лэптӧмӧн кӧсйысин сетны налы.

¹⁶ Но найӧ, миян батьяс, пыксисны, асныралісны да эз кывзыны Тэнсьыд тшӧктӧмъястӧ.

¹⁷ Найӧ эз кӧсйыны кывзысьны, вунӧдісны на пӧвстын вӧчӧм шензьӧданаторъястӧ. Найӧ асныралісны да индісны веськӧдлысьӧс, пыксисны да кӧсйисны бӧр бергӧдчыны нартитӧм улӧ. Но Тэ – прӧститысь Ен, Тэ бур да мелі сьӧлӧма, Тэнад терпитӧмыд ыджыд, Тэнад буралӧмлы абу помыс, Тэ эн эновт найӧс.

¹⁸ Найӧ вӧчисны зарни ӧшкӧс, шуисны, тайӧ пӧ миян ен, коді петкӧдіс миянӧс Египетысь. Найӧ вӧчисны уна пеж,

¹⁹ но Тэ вӧлін на дінӧ бур сьӧлӧма, Тэ эн эновт найӧс овтӧминын. Луннас кымӧр сюръя эз вешйыв на дінысь, а нуӧдіс найӧс, войнас биа сюръя югзьӧдіс налысь туйсӧ, кыті налы колӧ вӧлі мунны.

²⁰ Тэ сетін налы Ассьыд бурлуна Ловтӧ, медым велӧдны найӧс. Тэ эн дугды вердны найӧс маннаӧн, сетін налы ва, мед эз косьмы налӧн горшыс.

²¹ Нелямын во чӧж Тэ тӧждысин на вӧсна овтӧминын, налы ставыс вӧлі тырмана, налӧн паськӧмыс эз важмыв, кокныс эз пыктавлы.

²² Тэ сетін налы муяс да войтыръясӧс, юклін налы мусӧ. Найӧ босьтісны хешбонса Сигон ӧксылысь мусӧ да васанса Ог ӧксылысь мусӧ.

²³ Налысь пиянсӧ Тэ рӧдмӧдін енэжвыв кодзувъяс мында. Тэ вайӧдін найӧс сійӧ муас, мый йылысь Тэ кӧсйысьлін налӧн батьяслы.

²⁴ Пияныс локтісны да босьтісны тайӧ мусӧ. Тэ сетін налӧн кипод улӧ сэтчӧс ханаан войтырӧс, сетін налӧн киӧ ӧксыясӧс да сэні олысь войтыръясӧс, медым вӧчисны тайӧ йӧзыскӧд асланыс кӧсйӧм серти.

²⁵ Найӧ босьтісны изкаръяс да бур муяс, овмӧдчисны эмбур тыра керкаясӧ, налы вичмисны изкыртаын кералӧм вайӧртӧдъяс, виноград йӧръяс, олив расъяс да уна мукӧд вотӧса пуяс. Найӧ пӧттӧдзныс сёйисны-тшӧгӧдчисны, нимкодясисны Тэнад бур козинъясысь.

²⁶ Но найӧ кутісны пыксьыны Тэныд, кыпӧдчисны Тэныд паныд, ӧтдортісны Тэнсьыд Индӧдтӧ, виалісны Тэнсьыд пророкъястӧ, кодъяс ӧлӧдісны найӧс, медым веськӧдны Тэлань. Найӧ вӧчисны уна пеж,

²⁷ та вӧсна Тэ сетін найӧс мустӧмтысьяс киӧ, кодъяс дзескӧдісны найӧс. Но сьӧкыд кад дырйи найӧ горзӧмӧн шыасьлісны Тэ дінӧ, и Тэ кылін найӧс енэжсяньыс, Аслад ыджыд буралӧмыд вӧсна ыстылін дорйысьясӧс, кодъяс мездылісны найӧс дзескӧдысьясысь.

²⁸ Кор найӧ олісны лӧня, найӧ бара вӧчисны лёксӧ Тэныд паныд. Сэки Тэ сетлін найӧс дзескӧдысьяс киӧ, кодъяс ыджыдалісны на вылын. Но найӧ бара горзӧмӧн шыасьлісны Тэ дінӧ, и Тэ кылін найӧс енэжсяньыс, Аслад ыджыд буралӧмыд вӧсна Тэ унаысь мездылін найӧс.

²⁹ Тэ ӧлӧдлін найӧс, медым найӧ бергӧдчисны Тэнад Индӧд дінӧ, но найӧ пыксисны, эз кывзыны Тэнсьыд тшӧктӧмъястӧ, мыж вӧчӧмӧн торкисны Тэнсьыд Индӧдтӧ, мый вайӧ олӧм мортыслы, коді сы серти олӧ. Найӧ пыксисны-асныралісны, эз кывзыны Тэнӧ.

³⁰ Уна во чӧж Тэ виччысин, Аслад Ловсянь Тэ ӧлӧдлін найӧс пророкъяс пыр, но найӧ эз кывзыны. Сэки Тэ сетін найӧс мукӧд войтыръяслӧн киӧ.

³¹ Но Аслад ыджыд буралӧмыд вӧсна Тэ найӧс дзикӧдз эн бырӧд, Тэ эн эновт найӧс, ӧд Тэ – бур да мелі сьӧлӧма Ен.

³² Миян Енмӧй, Тэ ыджыд, вына да повзьӧдана Ен, Тэ видзан Ассьыд йитӧдтӧ да буралӧмтӧ! Видзӧдлы став сьӧкыдлуныс вылӧ, мый суис миянӧс, миянлысь ӧксыясӧс да юралысьясӧс, попъясӧс да пророкъясӧс, батьяснымӧс да Тэнсьыд став войтыртӧ ассурса ӧксыяслӧн веськӧдлан кадсянь да талунъя лунӧдз.

³³ Быдторйын, мый суис миянӧс, Тэ веськыда вӧчин, ӧд Тэ веськыд, а ми – мыжаӧсь.

³⁴ Миян ӧксыяс, юралысьяс, попъяс да батьяс эз овны Тэнад Индӧд серти, эз кывзыны Тэнсьыд тшӧктӧмъястӧ, вунӧдісны Тэнсьыд ӧлӧдӧмъястӧ.

³⁵ Асланыс муын, кӧні Тэ кытшалін найӧс быд бурнас, паськыд да озыр муын, мый Тэ сетін налы, найӧ эз кесъявны Тэныд, эз бергӧдчыны асланыс лёк уджъясысь.

³⁶ Ми ӧні кесйӧгъяс. Сійӧ муас, мый тэ сетін миян батьяслы, медым пӧткӧдчыны став вотӧснас да бурнас, ми лоим кесйӧг туйынӧсь.

³⁷ Тайӧ му вывсьыс быдтасыс вичмӧ ӧксыяслы, кодъясӧс Тэ пуктін ыджыдавны миян вылын асланым мыжъяс вӧсна. Миян вылын да ыж-мӧсным вылын найӧ ыджыдалӧны, кыдзи кӧсйӧны. Ми ёна сьӧкыдалам.

Кӧсйысяна гижӧд

³⁸ Та вӧсна ми лӧсьӧдім кӧсйысяна гижӧд. Гижӧд улас миян юралысьяс, левитъяс да попъяс пуктісны ассьыныс пас.