Неемий 8 - Коми Библия 2023

Ездра лыддьӧ войтырыслы Енлысь Индӧд

¹ Сизимӧд тӧлысьнас, кор Израиль войтыр оліс нин аслас каръясын, ставныс ӧтитӧг чукӧртчисны Ва дзиръялы паныда изэрд вылӧ. Индӧдӧ велӧдысь Ездраӧс корисны вайны Мӧисейлысь Индӧд, мый Господь сетіс Израиль войтырлы.

² Ездра поп вайис Индӧдсӧ, медым лыддьыны сійӧс чукӧртчӧм айулов да аньяс водзын. Сизимӧд тӧлысьлӧн медводдза лунӧ кывзыны чукӧртчисны ставныс, кодъяс сяммисны гӧгӧрвоны.

³ Ва дзиръя дорын изэрд вылын шонді петӧмсянь луншӧр кадӧдз Ездра лыддис Индӧдсӧ айуловлы да аньяслы – ставныслы, кодъяс сяммисны гӧгӧрвоны. Став войтырыс сюся кывзіс.

⁴ Индӧдӧ велӧдысь Ездра сулаліс пуысь вӧчӧм сод вылын, мый вӧлі вӧчӧма дзик та могысь. Сылӧн веськыдладорын сулалісны Маттитай, Шемай, Анай, Урий, Хилки да Маасей. Шуйгаладорас сулалісны Педай, Мисаэл, Малкий, Хашум, Хашбадан, Закар да Мешуллам.

⁵ Став войтырыс аддзис, кыдзи Ездра восьтіс небӧгсӧ, ӧд сійӧ сулаліс наысь вылынджык. Ставныс сувтісны.

⁶ Ездра ошкис Господьӧс, ыджыд Енмӧс. А став войтырыс кинысӧ вывлань лэптӧмӧн шуаліс: «Аминь! Аминь!» Сэсся найӧ муӧдзыс копыртчӧмӧн юрбитісны Господьлы.

⁷ Кор войтырыс сулаліс, Исус, Бани, Шеревий, Ямин, Аккув, Шаббетай, Ходий, Маасей, Келит, Азарий, Иозавад, Ханан да Фелай левитъяс гӧгӧрвоӧдісны Индӧдсӧ.

⁸ Найӧ ясыда лыддисны Енлысь Индӧдсӧ да восьтісны гижӧдыслысь вежӧртассӧ. Йӧзыс гӧгӧрвоисны лыддьӧмасӧ.

⁹ Индӧдсӧ кывзігӧн став войтырыс бӧрдіс. Сэки Неемий юралысь, Индӧдӧ велӧдысь Ездра поп да войтырсӧ велӧдысь левитъяс шуисны кывзысьяслы: «Тайӧ лунсӧ вежӧдӧма Господьлы, тіян Енлы. Энӧ шогсьӧй да энӧ бӧрдӧй.

¹⁰ Мунӧй гортаныд да чӧскыда сёйӧй-юӧй. Юксьӧй сёян-юаннад накӧд, кодлӧн нинӧм абу дасьтӧма, ӧд тайӧ лунсӧ вежӧдӧма миян Господьлы. Энӧ шогсьӧй, ӧд Господь водзын нимкодясьӧм ёнмӧдӧ тіянӧс».

¹¹ Левитъяс лӧньӧдісны войтырсӧ: «Энӧ шогсьӧй, ӧд тайӧ луныс вежа».

¹² Войтырыс муніс сёйны-юны, тшӧтш мукӧдӧс на чӧсмӧдлісны. Найӧ гажӧдчисны ёна нимкодясьӧмӧн, ӧд гӧгӧрвоисны налы шуӧм кывъяссӧ.

¹³ Мӧд луннас Израиль войтырысь рӧдкутысьяс, попъяс да левитъяс чукӧртчисны Индӧдӧ велӧдысь Ездра дінӧ, мед сійӧ гӧгӧрвоӧдас налы Индӧдсӧ.

¹⁴ Мӧисейлы сетӧм Индӧдысь найӧ аддзисны Господьлысь тшӧктӧм, мый сизимӧд тӧлысьнас гажӧдчан лунъяс дырйи Израиль войтырлы колӧ овны чомъясын.

¹⁵ Та вӧсна найӧ тшӧктісны юӧртны став асланыс каръясын да Ерусалимын: «Мунӧй керӧсъясӧ да вайӧй сэтысь вӧрса да быдтӧм олив пулысь вожъяссӧ, мирт да пальма вожъяс, нӧшта мукӧд паськыд коръя пу вожъяс, мед вӧчны чомъяс, кыдзи гижӧма Индӧдын».

¹⁶ Став йӧзыс ветлісны пу вожъясла да вӧчисны аслыныс чомъяс. Сувтӧдалісны чомъяснысӧ асланыс керка вевт вылӧ, олан йӧръясаныс да Енлӧн крам йӧрӧ, тшӧтш Ва дзиръя да Ефрем дзиръя дорӧ изэрд вылӧ.

¹⁷ Пленысь локтӧм израильсаяс ставныс вӧчисны аслыныс чомъяс да олісны сэні. Нав Исус кадсянь тайӧ лунӧдзыс Израиль войтыр эз вӧчлы тадзи. Нимкодясьӧмыс вӧлі вывті ыджыд.

¹⁸ Медводдза гажӧдчан лунсянь бӧръя лунӧдзыс быд лун лыддисны Енлысь Индӧдсӧ. Гажӧдчисны сизим лун чӧж, а кӧкъямысӧд луннас Гижӧд серти вӧлі вежа чукӧртчӧм.