Неемий 6 - Коми Библия 2023

Дзескӧдысьяс повзьӧдлӧны Неемийӧс

¹ Санваллатлы, Товилы, араб войтырысь Гешемлы да мукӧд дзескӧдысьяслы кывсис, мый ме помалі лэптыны карса стен, и стенмын эз коль ни ӧти жугалӧмин. Сӧмын дзиръяясӧ абу на вӧлі пуктӧма ӧдзӧсъяс.

² Санваллат да Гешем корисны менӧ аддзысьны накӧд Оно ковтысын Кефирим сиктын. Збыльвылас, найӧ мӧвпалісны вӧчны меным лёктор.

³ Ме мӧдӧді на дінӧ юӧртысьясӧс висьтавны, мый менам ыджыд удж мунӧ, и локнысӧ ог вермы, а локта кӧ, уджыс сувтас.

⁴ Найӧ нёльысь ыстылісны меным татшӧм корӧмсӧ, и ме пыр ӧткодя вочавидзлі налы.

⁵ Витӧдысьсӧ Санваллат мӧдӧдіс ме дінӧ ассьыс кесйӧгсӧ восьса письмӧӧн.

⁶ Сэтчӧ вӧлі гижӧма: «Войтыръяс пӧвстын сёрнитӧны, тшӧтш Гешем висьталӧ, мый тэ иудейяскӧд кӧсъян паныд кыпӧдчыны, та вӧсна ті и лэптінныд Ерусалимлысь стенъяссӧ. Нӧшта сёрнитӧны, мый тэ кӧсъян лоны налӧн ӧксыӧн.

⁷ Тэ индӧмыд пророкъясӧс, медым найӧ Ерусалимын юӧртасны, мый тэ Иуда войтырлӧн ӧксы. Тайӧ юӧрыс воас Артаксеркс ӧксыӧдз. Сідзкӧ, лок, да ми сёрнитам та йылысь».

⁸ Ме мӧдӧді сылы воча кыв: «Татшӧмторйыс, мый йылысь тэ гижӧмыд, эз вӧв. Тэ ачыд лӧсьӧдлін тайӧс».

⁹ Татшӧм ногӧн найӧ повзьӧдлісны миянӧс. Чайтісны, мый ми кияснымӧс лэдзам да дугдам уджавны. Но ме зільджыка на босьтчи уджас.

¹⁰ Ме муні Мегетавель Делайлӧн Шемай пи ордӧ, коді вӧлі йигнасьӧма гортас. Сійӧ шуис меным: «Мунам Енлӧн керкаӧ, йигнасям крам пытшкас, ӧд тэнӧ вины локтасны, тавой локтасны».

¹¹ Но ме шуи: «Ме абу сэтшӧм морт, мед пышйыны. Ме коддьӧмыс кӧ пырас крам пытшкӧ, ловйӧн оз коль. Ме ог мун».

¹² Ме гӧгӧрвои, мый эз Ен сійӧс мӧдӧд, но Тови да Санваллат мынтысисны сылы пророкалӧмсьыс.

¹³ Найӧ медалісны сійӧс, мед менӧ повзьӧдны да мыжӧ уськӧдны. И ме кӧ вӧчи Шемайлӧн вӧзйӧм серти, найӧ эськӧ лёкӧдісны-янӧдісны менӧ.

¹⁴ Енмӧй, эн вунӧд, мый вӧчисны Тови да Санваллат. Эн вунӧд тшӧтш Ноадия пророк аньӧс да мукӧд пророксӧ, кодъяс повзьӧдлісны менӧ.

Ерусалим карлысь стен эштӧдӧм

¹⁵ Элул тӧлысьлӧн кызь витӧд лунӧ Ерусалимлысь стенсӧ вӧлі эштӧдӧма. Ветымын кык лунӧн вӧлі лэптӧма сійӧс.

¹⁶ Кор миянӧс дзескӧдысьяс да миян гӧгӧр олысь войтыръяс кылісны та йылысь, повзисны. Налы яндзим лои, ӧд гӧгӧрвоисны, мый тайӧ уджсӧ вӧчны миянлы отсаліс миян Енным.

¹⁷ Сійӧ кадас Иуда войтырысь нималана йӧз вӧлі ёна гижасьӧны Товикӧд.

¹⁸ Тови вӧлі Арах Шеканийлӧн зять, а Товилӧн Иоханан пиыс вӧлі босьтӧма гӧтырӧ Берек Мешулламлысь нывсӧ. Та вӧсна унаӧн Иуда войтырысь кыв сетӧмӧн вӧлі кӧрталӧмаӧсь йитӧд Товикӧд.

¹⁹ Найӧ висьтавлісны меным Товилӧн бур вӧчӧм йылысь, а сылы висьтавлісны менсьым шуӧмӧс. Тови аслас гижӧдъясӧн зілис повзьӧдлыны менӧ.