Неемий 5 - Коми Библия 2023

Неемий дорйӧ дзескӧдӧмаясӧс

¹ Уна айулов гӧтыръясныскӧд пондісны ёна элясьны иудей вокъясныс вылӧ.

² Ӧтияс шуалісны: «Ми уна челядяӧсь. Миянлы колӧ шедӧдны нянь кынӧмпӧт вылӧ, мед ловйӧн кольны».

³ Мӧдъяс шуалісны: «Уджйӧзным вӧсна миянлы колӧ сетны ассьыным муяс, виноград йӧръяс да керкаяс, медым тшыг кулӧмысь нянь ньӧбны».

⁴ Кодсюрӧ шуалісны: «Ми сетам ассьыным муяс да виноград йӧръяс, медым уджйӧзӧн босьтны сьӧм да мынтыны ӧксылы вот.

⁵ Мыйӧн нӧ ми торъялам вокъясысь? Миян челядьным тшӧтш ӧткодьӧсь. Но миянлы быть лоӧ кесйӧг туйӧ вузавны ныв-пинымӧс. Кодсюрӧ нывъясным кесйӧг туйынӧсь нин. Ми нинӧм огӧ вермӧй вежны, ӧд муясным да виноград йӧръясным йӧз киын».

⁶ Кор ме кылі войтырлысь элясьӧмсӧ, ме ёна скӧрми.

⁷ Мӧвпалӧм бӧрын ме чорыда сёрниті нималана йӧзкӧд да веськӧдлысьяскӧд. Ме шуи налы: «Сетӧм уджйӧзнытӧ ті содтӧдӧн босьтанныд асланыд вокъяслысь». Ме чукӧрті войтырӧс, медым на водзын мыжавны нималана йӧзӧс да веськӧдлысьясӧс.

⁸ Ме шуи: «Ми сьӧкыда ньӧбим вокъяснымӧс, кодъясӧс вӧлі вузалӧма мукӧд войтыръяслы. А ӧні ті вузаланныд ассьыныд вокъяснытӧ! Миянлы бара ӧмӧй ньӧбны найӧс?» Найӧ чӧв олісны, налы эз сюр воча кыв.

⁹ Сэки ме шуи налы: «Ті лёктор вӧчанныд. Тіянлы колӧ овны асланым Енмысь полӧмӧн, медым мустӧмтысь войтыръяс эз омӧльтны миянӧс.

¹⁰ Аслам вокъяскӧд да кесйӧгъяскӧд ме тшӧтш водзӧсӧн сета сьӧм да нянь, но содтӧдӧн бӧрсӧ ми огӧ босьтӧй.

¹¹ Талун жӧ бӧр сетӧй йӧзыслы налысь муяссӧ, виноград да олив йӧръяссӧ, керкаяссӧ, уджйӧзсьыныс содтӧдӧн босьтӧм сьӧмсӧ, няньсӧ, винасӧ да олив выйсӧ».

¹² Найӧ вочавидзисны: «Ставсӧ бӧр сетам, и босьтны насянь нинӧм огӧ кутӧй. Вӧчам, кыдзи тэ шуан». Ме кори попъясӧс да на дырйи тшӧкті нималана йӧзлы да веськӧдлысьяслы кыв сетны, мый найӧ тадзикӧн и вӧчасны.

¹³ Сэсся ме пыркниті ассьым паськӧмӧс да шуи: «Тадзи Енмыс мед пыркнитас Аслас керкаысь да Аслас муысь быдӧнӧс, коді ассьыс кывсӧ оз кут. Тадзи сійӧс кушӧдз лоӧ пыркнитӧма». Став войтырыс шуис ”аминь” да ошкис Енмӧс. Ассьыныс кывсӧ найӧ кутісны.

Неемийлӧн юралӧм

¹⁴ Артаксеркс ӧксылӧн кызьӧд веськӧдлан восянь комын кыкӧд воӧдз ме юралі Иуда муын. Дас кык во чӧж ме аслам йӧзкӧд эг босьтлы уджысь нянь.

¹⁵ Меӧдз вӧвлӧм юралысьяс сьӧктӧдлӧмаӧсь войтырсӧ. Нелямын сикель эзысьысь ӧтдор найӧ босьтлӧмаӧсь нянь да вина. Весигтӧ налӧн кесйӧгъясыс дзескӧдлӧмаӧсь войтырсӧ. Но ме Енмысь полӧм вӧсна эг вӧч на моз.

¹⁶ Ме аслам кесйӧгъяскӧд тшӧтш лэпті карса стен. Муяс аслыным ми эгӧ ньӧбавлӧй.

¹⁷ Менам пызан сайӧ сёйны чукӧрмывліс иудейясысь да веськӧдлысьясысь сё ветымын мортӧдз. Наысь ӧтдор орччӧн олысь войтыръяс пӧвстысь локтысьяс тшӧтш пукавлісны менам пызан сайын.

¹⁸ Быд лун меным дасьтісны ӧти ӧшкӧс, квайт медбур ыжӧс да нӧшта пӧтка яй. Быд дас лун мысти вайисны быдпӧлӧс вина. Но та дырйи аслам юралан уджысь ме нинӧм эг корлы, ӧд войтырыс сьӧкыдаліс.

¹⁹ Енмӧй, бурӧн мынтысь меным ставсьыс, мый ме вӧчи тайӧ войтырыслы!