Неемий 4 - Коми Библия 2023

Стен лэптӧмлы паныд сувтӧм

¹ Санваллат кор тӧдмаліс, мый ми лэптам Ерусалимлысь стенсӧ, ёна скӧрмис. Сійӧ пондіс лӧгавны да лёкӧдны иудейясӧс.

² Аслас йӧз водзын да самарияса тышкайӧз водзын сійӧ шуаліс: «Мый бара-й ноксьӧны тайӧ коньӧр иудейясыс-а? Чайтӧны, мый выльысь стенсӧ лэптасны? Пондасны бара висьяс вайны? Ӧти лунӧн, буракӧ, кӧсйӧны лэптыны? Кӧсйӧны бӧр ловзьӧдны сотчӧм изъяссӧ тайӧ пӧим чукӧрсьыс?»

³ Аммон войтырысь Тови, коді сулаліс Санваллаткӧд орччӧн, шуис: «Мед-мед лэптӧны. Весиг руч кӧ кавшасяс, налӧн изъя стенмыс киссяс».

⁴ Енмӧй, кывзы, кутшӧма миянӧс лёкӧдӧны. Налысь увтыртӧмсӧ бергӧд ас выланыс. Сет найӧс мырддялысьяс киӧ, нуӧд пленӧ.

⁵ Налысь лёк вӧчӧмсӧ эн вунӧд, налысь мыжсӧ эн прӧстит, ӧд найӧ ёна дӧзмӧдісны уджалысьястӧ.

⁶ Карлысь стенсӧ ми лэптім водзӧ. Джынйӧдзыс сійӧс вӧлі кыпӧдӧма нин. Войтырыс став сьӧлӧмсяньыс уджаліс.

⁷ Санваллат да Тови, арабъяс, аммонсаяс да азотсаяс ёна скӧрмисны, кор кылісны, мый Ерусалимлӧн стенмыс ӧдйӧ кыптӧ, и мый сылысь жугалӧминъяссӧ дзоньталӧны.

⁸ Найӧ сёрнитчисны уськӧдчыны Ерусалим вылӧ, мед шызьӧдны карсӧ.

⁹ Но ми кевмысим асланым Енлы. Ми сувтӧдім йӧзӧс, медым найӧ лун и вой видзасны карнымӧс.

¹⁰ Иуда войтыр кутіс элясьны, из-лӧп кыскалысьяс пӧ кок йывсьыныс усьӧны, сы мында пӧ уджыс. Ми пӧ огӧ вермӧй стентӧ водзӧ лэптыны.

¹¹ Миянӧс дзескӧдысьяс шуалісны, ерусалимса олысьяс пӧ оз и казявны да оз и тӧдлыны, кыдз ми тӧдлытӧг сувтам на шӧрӧ да виалам найӧс, тадзи сувтӧдам уджсӧ.

¹² Вӧрӧг пӧвстын олысь иудейяс уналаысь волывлісны миян дінӧ да висьтавлісны, вӧрӧгыд пӧ кӧсйӧ уськӧдчыны миян вылӧ.

¹³ Сэки ме сувтӧдалі войтырӧс кар горулас стен сайӧ, восьсаинъясӧ. Сувтӧдалі найӧс рӧдкотыръясӧн, быдӧн босьтіс киас шыпурт, шы либӧ ньӧввуж.

¹⁴ Ставсӧ видзӧдалӧм бӧрын ме шуи нималана йӧзлы, веськӧдлысьяслы да войтырлы: «Энӧ полӧй вӧрӧгысь! Тӧдӧй, мый Господьыс ыджыд да повзьӧдана! Тышкасьӧй вокъясныд, ныв-пиныд, гӧтыръясныд да керкаясныд вӧсна!»

¹⁵ Дзескӧдысьяслы кывсис, мый ми тӧдам налӧн уськӧдчыны кӧсйӧм йылысь. Но Енмыс торкис налысь кӧсйӧмсӧ, и ми ставным бӧр сувталім стен дорӧ, быдӧн босьтчис аслас уджӧ.

¹⁶ Тайӧ лунсяньыс джын том йӧзыс уджалісны, а мӧд джынйыс сулалісны сайӧдъясӧн, шыясӧн, ньӧввужйӧн да кӧрт кышӧдӧ пасьтасьӧмӧн. Веськӧдлысьяс сайӧдісны Иуда войтырӧс,

¹⁷ кор найӧ лэптісны стенсӧ. Сьӧкыдтор новлӧдлысьяс ӧти кинас удж вӧчисны, мӧд киас шы кутісны.

¹⁸ Стен дзоньталысьяслӧн коскас ӧшаліс шыпурт. Тадзи найӧ кыпӧдісны стенсӧ. Буксан шы сетысь вӧлі мекӧд.

¹⁹ Ме шуи нималана йӧзлы, веськӧдлысьяслы да войтырлы: «Уджыс зэв ыджыд да вывті уна. Ми уджалам стен кузялаыс, ӧта-мӧдсьыным ылынӧсь.

²⁰ Та вӧсна, кысянь кыланныд буксан шы, сэтчӧ миян дінӧ чукӧртчӧй. Миян Енным кутас тышкасьны миян пыдди!»

²¹ Тадзи ми вӧчим уджсӧ, а джын йӧзыс шонді петӧмсянь да кодзувъяс мыччысьтӧдз кутісны кианыс шы.

²² Сійӧ кадас ме нӧшта тшӧкті войтырлы вой кежлас кольччыны аслас кесйӧгъяскӧд Ерусалимӧ, медым войнас видзны карсӧ, а луннас – уджавны.

²³ Ачым ме, менам вокъяс, кесйӧгъяс да кар видзысьяс, кодъяс вӧліны мекӧд, – ставным ми узьлім паськӧмӧн. Быдӧнлӧн ки уланым вӧлі шыпурт да ва доз.