Неемий 3 - Коми Библия 2023

Карса стен лэптысьяс

¹ Аркирей Эльяшив да попъяс вӧчисны карлысь Ыж дзиръя, вежӧдісны сійӧс да сувтӧдісны ӧдзӧсъяс. Сэсся Сё тышкамортлы башня дорсянь Хананел башня дорӧдз вежӧдісны стенсӧ.

² Накӧд орччӧн уджалісны Ериконын олысьяс, а ериконсаяскӧд орччӧн – Имрилӧн Заккур пиыс.

³ Сенлӧн рӧдыс вӧчис Чери дзиръя. Найӧ вӧчисны куричьяс, сувтӧдісны ӧдзӧсъяс да пуктісны сэтчӧ иган-тасъяс.

⁴ Накӧд орччӧн стенсӧ дзоньталіс Хаккоц Урийлӧн Меремот пиыс, сыкӧд орччӧн – Мешезавел Береклӧн Мешуллам пиыс, Мешулламкӧд орччӧн – Баанлӧн Садок пиыс.

⁵ Насянь водзӧ стенсӧ дзоньталісны Текояын олысьяс, но налӧн тӧдчана йӧзыс эз кывзысьны асланыс ыджыдъяслысь да эз кӧсйыны уджавны.

⁶ Пасеахлӧн Йоад пиыс да Бесодийлӧн Мешуллам пиыс дзоньталісны Важ дзиръя. Найӧ вӧчисны куричьяс, сувтӧдісны ӧдзӧсъяс да пуктісны сэтчӧ иган-тасъяс.

⁷ Накӧд орччӧн стенсӧ дзоньталісны Гаваонысь Мелатий да Меронотысь Ядон ӧтвылысь гаваонса да миспаса олысьяскӧд. Тайӧ олысьясыс вӧліны Ефрат ю рытыввыв муын юралысьлӧн кипод улынӧсь.

⁸ Водзӧ стенсӧ дзоньталіс Харгайлӧн Узиэл пиыс, эзысьысь вӧчасьысь. Сыкӧд орччӧн уджаліс Хананей, чӧскыд дука мавтас вӧчысь. Тайӧ йӧзыс лэптісны Ерусалимлысь стенсӧ Паськыд стенмӧдз.

⁹ Накӧд орччӧн стенсӧ дзоньталіс Хурлӧн Рефай пиыс, Ерусалим гӧгӧр му джынйӧн веськӧдлысь.

¹⁰ Сыкӧд орччӧн аслас керка весьтӧд стенсӧ дзоньталіс Харумафлӧн Едай пиыс, а Едайсянь водзӧсӧ – Хашавнилӧн Хаттуш пиыс.

¹¹ Мӧдлаын стенсӧ дзоньталісны Харимлӧн Малкий пиыс да Пахат-Моавлӧн Хашшув пиыс. Найӧ кыпӧдісны нӧшта Пач башня.

¹² Накӧд орччӧн стенсӧ дзоньталіс аслас нывъяскӧд Халлохешлӧн Шаллум пиыс, Ерусалим гӧгӧр мӧд му джынйӧн веськӧдлысь.

¹³ Ковтыс дзиръя дзоньталісны Ханун да Заноахын олысьяс. Ӧдзӧсъяс сувтӧдӧм бӧрын пуктісны сэтчӧ иган-тасъяс. Нӧшта найӧ лэптісны сюрс гырддза кузьта стен, сійӧ нюжаліс Ёг дзиръя дорӧдз.

¹⁴ Ёг дзиръя дзоньталіс Рекавлӧн Малкий пиыс, Бет-Карем гӧгӧр муӧн веськӧдлысь. Вӧчӧм дзиръяӧ сійӧ сувтӧдіс ӧдзӧсъяс да пуктіс сэтчӧ иган-тасъяс.

¹⁵ Дзульк дзиръя дзоньталіс Кол-Хозелӧн Шаллун пиыс, Миспа гӧгӧр муӧн веськӧдлысь. Сійӧ вӧчис дзиръясӧ, дзиръялы лэптіс лэбув, сувтӧдіс ӧдзӧсъяс да пуктіс сэтчӧ иган-тасъяс. Нӧшта сійӧ лэптіс стенсӧ Шелах вайӧртӧд дорын, ӧксылӧн сад йӧр дорті Давид карысь лэччан поскӧдз.

¹⁶ Сэтысянь водзӧ Давид рӧдлӧн дзебанін дорӧдз, кодйӧм вайӧртӧдӧдз да тышкайӧз керкаӧдз, стенсӧ дзоньталіс Азбуклӧн Неемий пиыс, Бет-Цур гӧгӧр му джынйӧн веськӧдлысь.

¹⁷ Сысянь водзӧ дзоньталісны стенсӧ левитъяс: Банилӧн Рехум пиыс да сыкӧд орччӧн Хашавий, Кейла гӧгӧр му джынйӧн веськӧдлысь. Сійӧ уджаліс аслас веськӧдлан му нимсянь.

¹⁸ Сысянь водзӧ дзоньталіс стенсӧ сылӧн рӧдвужысь Хенададлӧн Бавай пиыс, Кейла гӧгӧр мӧд му джынйӧн веськӧдлысь.

¹⁹ Сыкӧд орччӧн дзоньталіс стенсӧ Исуслӧн Эзер пиыс, Миспаӧн веськӧдлысь. Сійӧ уджаліс стен пельӧсын, шыпурт видзанінӧ пыранін весьтын.

²⁰ Стен пельӧссянь Эльяшив аркирейлӧн керка ӧдзӧс дорӧдз стенсӧ дзоньталіс Заббайлӧн Барук пиыс. Сійӧ уджаліс зэв зіля.

²¹ Эльяшивлӧн керка ӧдзӧссянь да керка пельӧсӧдз стенсӧ дзоньталіс Хаккоц Урийлӧн Меремот пиыс.

²² Сысянь водзӧ стенсӧ дзоньталісны Ерусалим кар гӧгӧрын олысь попъяс.

²³ Попъяскӧд орччӧн асланыс керка весьтӧд стенсӧ дзоньталісны Венямин да Хашшув. Насянь водзӧ аслас керка дорті стенсӧ дзоньталіс Ананий Маасейлӧн Азарий пиыс.

²⁴ Азарий керкасянь стен пельӧс сайӧдз стенсӧ дзоньталіс Хенададлӧн Биннуй пиыс.

²⁵ Узайлӧн Фалал пиыс лэптіс пельӧс стенсӧ башня дорті, мый чурвидзис ӧксылӧн вылыс керка бердын видзысьяслӧн йӧрын. Фалалкӧд орччӧн уджаліс Парошлӧн Педай пиыс.

²⁶ Офелын олысь крамбердса кесйӧгъяс лэптісны стенсӧ Ва дзиръя дорсянь асыввывлань да чурвидзысь башняӧдз.

²⁷ Ыджыд чурвидзысь башнясянь Офел стенмӧдз стенсӧ дзоньталісны Текояын олысьяс.

²⁸ Вӧв дзиръя дорсянь водзӧ стенсӧ дзоньталісны попъяс, быдӧн дзоньталіс аслас керка весьтті.

²⁹ Накӧд орччӧн аслас керка весьтті стенсӧ дзоньталіс Иммерлӧн Садок пиыс, а сысянь водзӧ – Шеканийлӧн Шемай пиыс, Асыввыв дзиръя видзысь.

³⁰ Сыкӧд орччӧн стенсӧ дзоньталісны Шелемейлӧн Хананей пиыс да Цалафлӧн Ханун нима квайтӧд пиыс. Насянь водзӧ аслас жырлы воча уджаліс Береклӧн Мешуллам пиыс.

³¹ Сыкӧд орччӧн уджаліс Малкий, зарниысь вӧчасьысь. Сійӧ дзоньталіс стенсӧ крамбердса кесйӧгъяслӧн да вузасьысьяслӧн керка дорӧдз – Мифкад дзиръяӧдз да стен пельӧсса жыр дорӧдз.

³² Стен пельӧсса жыр дорсянь Ыж дзиръяӧдз стенсӧ дзоньталісны эзысьысь вӧчасьысьяс да вузасьысьяс.