Неемий 2 - Коми Библия 2023

Неемийлӧн корӧм

¹ Тайӧ вӧлі Артаксеркс ӧксылӧн кызьӧд веськӧдлан воӧ нисан тӧлысьӧ. Ӧксылы вайисны вина. Ме босьті винасӧ да мыччи сылы. Таӧдз ӧксы некор эз аддзыв менӧ шог чужӧмӧн.

² Ӧксы юаліс: «Мыйла тэ шог чужӧма? Аддза, тэ он вись, но сьӧлӧмыд мыйыськӧ шогсьӧ». Ме зэв ёна повзи.

³ Полӧмпырысь вочавидзи сылы: «Кузь нэм ӧксылы! Кыдзи нӧ ме верма дзебны шогсьӧмӧс, кор кисьтӧма карсӧ, кытчӧ дзебӧма менсьым батьясӧс, да сотӧма карыслысь дзиръяяссӧ».

⁴ Ӧксы юаліс менсьым: «Мый тэ кӧсъян?» Ме кевмыси енэжвывса Енлы

⁵ да вочавидзи ӧксылы: «Ме, тэнад кесйӧг, шогмана кӧ тэныд, ӧксыӧй, и тэ кӧ чайтан, мый менам корӧмӧй бур, лэдз менӧ мунны Иуда муӧ, медым лэптыны сійӧ карсӧ, кытчӧ дзебӧма менсьым батьясӧс».

⁶ Ӧксыкӧд орччӧн пукаліс гӧтырыс. Ӧксы юаліс менсьым: «Дыр-ӧ кежлӧ тэ сэтчӧ кӧсъян мунны? Кор бӧрсӧ локтан?» Ме висьталі ӧксылы кадыс йылысь. Менам вочавидзӧмӧй вӧлі шогмана ӧксылы, и сійӧ лэдзис менӧ мунны.

⁷ Ме нӧшта шуи сылы: «Ӧксыӧй, тэныд кӧ шогмана, Ефрат ю рытыввыв муясын юралысьяслы ысты мекӧд гижӧд, медым найӧ лэдзасны менӧ мунны Иуда муӧ налӧн муясӧд.

⁸ Кора ыстыны гижӧд тшӧтш Асафлы, ӧксылысь вӧрсӧ видзысьлы, медым крам дзиръяяс да карса стен вӧчӧм вылӧ сійӧ сетас кер, сетас тшӧтш керсӧ меным олан керка лэптӧм вылӧ». Ӧксы сетіс меным гижӧдъяс, ӧд Енлӧн буралан киыс вӧлі мекӧд.

⁹ Ме муні Ефрат ю рытыввыв муын юралысьяс дінӧ да сеті налы ӧксылысь гижӧдсӧ. Мекӧд тшӧтш ӧксы мӧдӧдіс верзьӧма тышкайӧзӧс да веськӧдлысьясӧс.

¹⁰ Хоронса Санваллат да аммон войтырысь Тови чина морт кор кылісны, мый кодкӧ локтӧма тӧждысьны Израиль войтыр вӧсна, ёна дӧзмисны таысь.

Неемий видзӧдалӧ Ерусалимлысь жуглӧм стенсӧ

¹¹ Ерусалимӧ локтӧм бӧрын куим лун мысти

¹² ме чеччи войнас да петі керкаысь. Ме некодлы на эг висьтав, мый Енмыс пуктіс менам сьӧлӧмӧ вӧчны Ерусалимын. Мекӧд вӧлі некымын морт, ме муні осёл вылын, мукӧдыс подӧн мунісны.

¹³ Ковтыс дзиръяӧд петӧм бӧрын ме мӧдӧдчи Гундыр ва петанінлань да Ёг дзиръялань. Мунігам ме видзӧдалі Ерусалимлысь жуглӧм стенсӧ да сотӧм дзиръяяссӧ.

¹⁴ Сэсся ме мӧдӧдчи Дзульк дзиръялань да Ӧксы вайӧртӧдлань. Но верзьӧмаӧн ме сэті муннысӧ эг вермы.

¹⁵ Та вӧсна ме муні войнас ковтысӧд да сэтысянь видзӧдалі карлысь стенсӧ. Карас ме бӧр пыри Ковтыс дзиръяӧд.

¹⁶ Веськӧдлысьяс эз тӧдлыны, кытчӧ да кутшӧм могӧн ме ветлі. Иудейяслы – попъяслы, нималана йӧзлы, веськӧдлысьяслы да налы, кодъяслы колӧ тайӧ уджсӧ вӧчны – ме таӧдз нинӧм эг висьтавлы.

¹⁷ Ме шуи налы: «Ті аддзанныд, мый миянӧс суис: Ерусалим карнымӧс кисьтӧма, сылысь дзиръяяссӧ сотӧма. Выльысь лэптам карлысь стенъяссӧ, вештам ас вылысь янӧдӧмсӧ».

¹⁸ Ме висьталі налы, кутшӧма менам Енмӧй отсаліс меным, да мый шуис меным ӧксы. Сэки найӧ шуисны: «Кутам лэптыны!» Сэсся босьтчисны тайӧ бур уджас.

¹⁹ Кор та йылысь кылісны хоронса Санваллат, аммон войтырысь Тови чина морт да Гешем араб, серамвыв лэптісны миянӧс. Найӧ увтыртӧмӧн шуалісны: «Мыйсяма уджӧ ті босьтчинныд? Он-ӧ ӧксылы паныд кыпӧдчӧй?»

²⁰ Ме вочавидзи налы: «Енэжвывса Ен отсалас миянлы лэптыны тайӧ карсӧ. Ми, Сылӧн кесйӧгъяс, лэптам сійӧс, а тіян некутшӧм пай оз ло Ерусалимын, тіян йылысь весиг оз казьтыштны тані».