Неемий 13 - Коми Библия 2023

Крам да войтырӧс сӧстӧммӧдӧм

¹ Сійӧ лунӧ Израиль войтырлы лыддисны Мӧисейлысь небӧг. Сэні вӧлі гижӧма, мый аммон да моав войтыръясысь некод оз вермы лоны Ен войтырлӧн чукӧртчӧмын.

² Ӧд тайӧ войтыръясыс эз вочаавны Израиль войтырӧс ваӧн да няньӧн, а мӧдарӧ, медалісны Валаамӧс, мед ёрны найӧс. Но миян Енным бергӧдіс ёрӧмсӧ бурсиӧмӧ.

³ Индӧдсӧ кывзӧм бӧрын Израиль войтыр торйӧдіс ас пӧвстысь ставнысӧ, кодъяс чужисны мукӧд войтырсянь.

⁴ Таӧдз Енлӧн крам видзанінъяс вӧсна кывкутысьнас вӧлі пуктӧма Товилӧн матысса рӧдвужысь Эльяшив попӧс.

⁵ Эльяшив торйӧдіс Товилы ыджыд жыр, кӧні водзынсӧ видзлӧмаӧсь нянь вись, ладан, дозмук-кӧлуй, попъяслы вайӧмторъяс, тшӧтш няньлысь, виналысь да выйлысь дасӧд юкӧнсӧ, мый Индӧд серти вӧлі сетӧны левитъяслы, сьылысьяслы да дзиръя видзысьяслы.

⁶ Тайӧ лоӧмтор дырйиыс ме эг вӧв Ерусалимын, ӧд вавилонса Артаксеркс ӧксылӧн комын кыкӧд веськӧдлан воӧ ме бӧр муні сы дінӧ. Но кад мысти ме бара вӧзйыси ӧксылысь.

⁷ Ерусалимӧ локтӧм бӧрын ме тӧдмалі, мый Эльяшив лёктор вӧчӧма: Енлӧн крам йӧрысь сетӧма Товилы жыр.

⁸ Ме ёна скӧрми таысь, шыблалі видзанінысь Товилысь став эмбур-кӧлуйсӧ.

⁹ Ме тшӧкті сӧстӧммӧдны видзанінъяс да бӧр пуктыны сэтчӧ Енлӧн крамлысь дозмук-кӧлуйсӧ, нянь вись да ладан.

¹⁰ Нӧшта ме тӧдмалі, мый левитъяслы, вӧлӧмкӧ, оз сетны налысь пайсӧ. Та вӧсна кесъялӧм пыдди левитъяс да сьылысьяс вӧлі петӧмаӧсь быдӧн аслас видз-му вылӧ.

¹¹ Ме чирышті веськӧдлысьясӧс. Юалі: «Мыйла эновтӧма Енлысь крамсӧ?» Сэсся ме чукӧрті левитъясӧс да сьылысьясӧс да бӧр сувтӧді найӧс вӧчны ассьыныс уджсӧ.

¹² Став Иуда войтырыс бара пондіс вайны видзанінъясӧ няньлысь, виналысь да выйлысь дасӧд юкӧнсӧ.

¹³ Крам видзанінӧ кывкутысьясӧн ме инді Шелемей попӧс, Индӧдӧ велӧдысь Садокӧс да левитъяс пӧвстысь Педайӧс, а Маттанай Заккурлысь Ханан писӧ пукті налы отсасьысьӧн. Тайӧ йӧзыслы позис эскыны. Налы вӧлі тшӧктӧма юклыны вайӧмторъяссӧ асланыс вокъяслы.

¹⁴ Енмӧй, казьтышт менӧ тайӧторсьыс! Эн вунӧд Тэнад крамыд вӧсна да сэні кесъялӧм вӧсна тӧждысьӧмӧс.

¹⁵ Сійӧ кадас ме казялі, мый Иуда муын шойччан лунӧ талялӧны виноград, осёлъяс вылын вайӧны Ерусалимӧ нянь кольтаяс, вина, виноград, инжир да уна мукӧдтор. Ставсӧ тайӧс вӧчисны шойччан лунӧ. Ме чорыда ӧлӧді найӧс шойччан лунӧ вузасьӧмысь.

¹⁶ Ерусалимын олысь тирса йӧз вайлісны сэтчӧ чери да мукӧд вузӧс и вузавлісны шойччан лунӧ Иуда войтырлы.

¹⁷ Ме чирыштӧмӧн шуи иудаса нималана йӧзлы: «Мыйла ті вӧчанныд татшӧм лёксӧ, пежаланныд шойччан лун?

¹⁸ Эз-ӧ тадзи вӧчлыны тіян батьяс? Таысь Енным ыстіс миян вылӧ да тайӧ карыс вылӧ став тайӧ шогсӧ. Но шойччан лунсӧ пежалӧмнаныд ті содтанныд Израиль дінӧ Енлысь скӧрлунсӧ».

¹⁹ Шойччан лун водзвылын, кор Ерусалим дзиръяяс дорын шондіыс саяліс, ме тшӧкті йигнавны дзиръяяс да эг лэдз восьтны шойччан лун помасьтӧдз. Ме сувтӧді дзиръяяс дорӧ ассьым кесйӧгъясӧс, медым нинӧм эз лэдзны вайны карӧ шойччан лунӧ.

²⁰ Вузасьысьяс ӧтчыдысь и мӧдысь узьмӧдчылісны Ерусалим кар ортсыӧ.

²¹ Но ме ӧлӧді найӧс: «Мыйла ті узьланныд стен дорас? Нӧшта кӧ тадзи вӧчанныд, тшӧкта босьтны тіянӧс». Та бӧрын шойччан лунӧ найӧ сэсся эз нин волыны.

²² Левитъяслы ме тшӧкті сӧстӧммӧдчыны, сэсся мунны да видзны дзиръяяс, медым шойччан лунсӧ вӧлі вежӧдӧма. Енмӧй, казьтышт менӧ тайӧ вӧчӧмторсьыс! Аслад ыджыд буралӧмыд кузя ло бур сьӧлӧма ме дінӧ!

²³ Сійӧ кадас ме нӧшта казялі, мый иудейяс босьтӧмаӧсь гӧтыръяссӧ азот, аммон да моав войтыръясысь.

²⁴ Та вӧсна джын челядьыс оз тӧдны еврей кывсӧ, сёрнитӧны азот кыв вылын да мукӧд войтыр кывйӧн.

²⁵ Таысь ме чирышті да ёри тайӧ айуловсӧ. Кодсюрӧӧс весиг вачкалі да някралі юрсиӧдыс. Тшӧкті кыв сетны Ен водзын, мый водзӧ найӧ оз сетны нывъяснысӧ мукӧд войтырлӧн пиян сайӧ да оз босьтны налысь нывъяснысӧ гӧтырӧ аслыныс да пияныслы.

²⁶ Эз-ӧ на вӧсна Израильлӧн Соломон ӧксы мыжсӧ вӧч? Некутшӧм войтырлӧн эз вӧв Соломон кодь ӧксыыс. Сылӧн Енмыс радейтіс сійӧс, и пуктіс сійӧс ӧксыӧ став Израильлы. Но мукӧд войтырысь босьтӧм гӧтыръясыс кыскисны сійӧс мыжас.

²⁷ А ӧні ми кылам, мый ті тшӧтш вӧчанныд тайӧ ыджыд лёкторсӧ. Мукӧд войтырысь аньяс вылӧ гӧтрасьӧмнаныд ті эновтінныд миянлысь Енмӧс.

²⁸ Эльяшив аркирейлӧн Йоад нима пиыслӧн ӧти пи вӧлі хоронса войтырысь Санваллатлӧн зять. Ме сійӧс вӧтлі син водзысь.

²⁹ Казьтышт налы, Енмӧй, мый найӧ пежалісны поп чинсӧ и торкисны йитӧдтӧ, мый Тэ кӧрталін попъяскӧд да левитъяскӧд.

³⁰ Ме сӧстӧммӧді войтырӧс йӧз пежысь, сувтӧді попъясӧс да левитъясӧс кесъявны, медым быдӧн вӧчис ассьыс удж.

³¹ Тшӧкті индӧм кадӧ вайны крамӧ пес, медводдза воӧм нянь да быдтас-вотӧс. Енмӧй, бурӧн мынтысь меным!