Неемий 11 - Коми Библия 2023

Ерусалимын олысьяс

¹ Израиль войтырлӧн юралысьяс олісны Ерусалимын. Войтырыс пудъясьӧмӧн индіс быд дасӧд мортӧс, коді овмӧдчас вежа Ерусалим карӧ, тадзи ӧкмысыс кольччис овны аслас карӧ.

² Войтырыс бурсиис быдӧнӧс, коді ас кӧсйӧм сертиыс овмӧдчис Ерусалимӧ.

³ Иуда муын мукӧд каръясын – быдӧн аслас карын да аслас овмӧсын – олісны израильсаяс, попъяс, левитъяс, крамбердса кесйӧгъяс да Соломонлӧн кесйӧгъяссянь чужысьяс. А Ерусалимын олісны Иуда муӧн юралысьяс,

⁴ кодъяс вӧліны Иуда да Венямин чужанкотыръясысь. Иуда чужанкотырысь Парес рӧдысь сэні оліс Атай. Сійӧ вӧлі Озейлӧн пи, Озей – Закарлӧн, Закар – Амарейлӧн, Амарей – Шефатайлӧн, Шефатай – Махалалеллӧн.

⁵ Шелай рӧдысь Ерусалимын оліс Маасей. Сійӧ вӧлі Баруклӧн пи, Барук – Кол-Хозелӧн, Кол-Хозе – Хазайлӧн, Хазай – Адайлӧн, Адай – Йояривлӧн, Йоярив – Закарлӧн.

⁶ Парес рӧдысь Ерусалимын оліс нёльсё квайтымын кӧкъямыс тышкаморт.

⁷ Венямин чужанкотырысь Ерусалимын оліс Саллу. Сійӧ вӧлі Мешулламлӧн пи, Мешуллам – Йоэдлӧн, Йоэд – Педайлӧн, Педай – Колайлӧн, Колай – Маасейлӧн, Маасей – Итиэллӧн, Итиэл – Исайлӧн.

⁸ Нӧшта Габбай да Саллай олісны Ерусалимын. Ставнас Венямин чужанкотырысь сэні оліс ӧкмыссё кызь кӧкъямыс морт.

⁹ Зикрилӧн Йоиль пиыс вӧлі карса юралысьӧн, а Сенуйлӧн Иуда пиыс вӧлі сы бӧрся мӧд юралысьӧн.

¹⁰ Попъясысь Ерусалимын олісны Йояривлӧн Едай пиыс, Якин

¹¹ да Серай, коді веськӧдліс Енлӧн крамын. Серай вӧлі Хилкилӧн пи, Хилки – Мешулламлӧн, Мешуллам – Садоклӧн, Садок – Мерайотлӧн, Мерайот – Ахитувлӧн.

¹² Тайӧ поп рӧдъясысь Енлӧн крамын кесъяліс кӧкъямыссё кызь кык морт. Попъяс лыдын вӧлі Адай. Сійӧ вӧлі Ерохамлӧн пи, Ерохам – Пелалийлӧн, Пелалий – Амцилӧн, Амци – Закарлӧн, Закар – Пашхурлӧн, Пашхур – Малкийлӧн.

¹³ Адай рӧдын рӧдкутысьыс вӧлі кыксё нелямын кык морт. Попъяс лыдын вӧлі нӧшта Амашсай. Сійӧ вӧлі Азарэллӧн пи, Азарэл – Ахзайлӧн, Ахзай – Мешиллемотлӧн, Мешиллемот – Иммерлӧн.

¹⁴ Амашсай рӧдын вӧлі сё кызь кӧкъямыс тышкаморт, медбуръясыс. Налӧн веськӧдлысьнас вӧлі Гедолимлӧн Завдиэл пиыс.

¹⁵ Левитъясысь Ерусалимын оліс Шемай. Сійӧ вӧлі Хашшувлӧн пи, Хашшув – Азрикамлӧн, Азрикам – Хашавийлӧн, Хашавий – Буннилӧн.

¹⁶ Сэні олісны тшӧтш Шаббетай да Иозавад, левитъяслӧн юралысьяс, кодъяс кывкутісны Енлӧн крам йӧрын уджъяс вӧсна.

¹⁷ Ерусалимын олісны тшӧтш Маттанай, Бакбук да Авдай. Маттанай вӧлі сьылысь котырын ошкӧм-кевмысьӧм дырйи шылад босьталысьӧн. Сійӧ вӧлі Микейлӧн пи, Микей – Завдийлӧн, Завдий – Асафлӧн. Бакбук вӧлі сьылысь котырын шылад мӧд босьталысьӧн. Авдай вӧлі Шаммуйлӧн пи, Шаммуй – Галаллӧн, Галал – Едутунлӧн.

¹⁸ Ставнас левитъясысь вежа карын оліс кыксё кӧкъямысдас нёль морт.

¹⁹ Дзиръя видзысьясысь Ерусалимын олісны Аккув, Талмон да налӧн вокъясыс – ставнас сё сизимдас кык морт, кодъяс видзисны карса дзиръяяс.

²⁰ Мукӧд израильсаяс, попъяс да левитъяс олісны Иуда му пасьтала мукӧд каръясын, быдӧн батьсяньыс вичмӧм му вылын.

²¹ Крамбердса кесйӧгъяс олісны Офелын. Наӧн веськӧдлісны Цихай да Гишпай.

²² Левитъяслӧн веськӧдлысьнас Ерусалимын вӧлі Асаф рӧдысь Уззей. Сійӧ вӧлі Банилӧн пи, Бани – Хашавийлӧн, Хашавий – Маттанайлӧн, Маттанай – Микалӧн. Асафсянь чужысьяс вӧліны сьылысьясӧн Енлӧн крамын кесъялӧм дырйи.

²³ На йылысь ӧксысянь вӧлі тшӧктӧм, мый колӧ сетны налӧн быдлунъя олӧм вылӧ.

²⁴ Иудалӧн Зерах пи рӧдысь Мешезавеллӧн Петахий пиыс вӧлі ӧксыӧн индӧм морт, коді кывкутіс войтырлӧн могъяс вӧсна.

Иуда войтырлӧн сиктъяс

²⁵ Иуда чужанкотырлӧн вӧліны видз-муа сиктъяс: Киръят-Арба да сыгӧгӧрса грездъяс, Дивон да сыгӧгӧрса грездъяс, Екавцел да сыгӧгӧрса сиктъяс,

²⁶ Исус, Молада да Бет-Пелет,

²⁷ Хацар-Шуал, Бер-Шева да сыгӧгӧрса грездъяс,

²⁸ Сиклаг, Мекона да сыгӧгӧрса грездъяс,

²⁹ Эн-Риммон, Цора да Ярмут,

³⁰ Заноах, Адуллам да сыгӧгӧрса сиктъяс, Лакиш да сыгӧгӧрса ыбъяс, Азека да сыгӧгӧрса грездъяс. Иуда чужанкотыр овмӧдчис Бер-Шевасянь Хинном ковтысӧдз.

³¹ Венямин чужанкотырлӧн оланінъясыс вӧліны Гевасянь да водзӧ: Микмас, Айя, Вефиль да сыгӧгӧрса сиктъяс,

³² Анатот, Нов, Анания,

³³ Хацор, Рама, Гиттайм,

³⁴ Хадид, Цевоим, Неваллат,

³⁵ Лод, Оно да Ге-Харашим.

³⁶ Иудаын олысь левитъясысь кодсюрӧ овмӧдчисны Венямин муӧ.